【溏心风暴3】48岁唐文龙点解可以咁fit？　街头体能训练操到爆肌

好耐无拍无线剧的唐文龙 (Michael) 有份主演TVB 50周年台庆剧《溏心风暴3》，虽然不是男主角但都依然好抢镜。48岁的他完全无走样，好似食了防腐剂咁，仲愈来愈man，型佬味出晒嚟，加上他身形Fit爆又大只，网民更激赞他是港版水行侠，仲话好想快些睇他在剧中爆衫骚肌。在今晚播出的第17集，大家有眼福喇！他会同陈敏之偷食偷到去上海，仲一齐在泳池嬉水，震撼胸肌终于出现！究竟Michael有咩防腐秘方同操肌秘诀呢？Michael的体能又有几fit呢？他接受香港01记者电话访问时表示：“我一次过可以做90-110下掌上压，状态好就做到130-140下，sit up就一分钟做到80下。”哗，好劲呀！

Michael坦言要操到这副爆肌身形确是需要持之以恒，绝非一朝一夕可以练成：“我有打功夫、泰拳同练体能，每次练个半钟已经好够。我好少去做gym，而系会去公园做街头体能训练，例如好似军人咁做豹跑，fing绳、蟹爬、掌上压，爬马骝贡马骝架、大楼梯做级跳等等综合性嘅训练。我都有玩兵器，例如玩双刀，可以令啲肌肉结实啲。夏天仲会游水。如果唔使开工我会每日都操，周末就休息，唔系嘅话好易劳损同受伤。”Michael亦无请教练指导，全靠自己在网上睇以及睇人练习来偷师。

目测Michael的胸肌至少都应该有44寸以上，不过他就表示自己从没有量度过：“自己由细到大都有做运动，个胸系比较大，我会因为胸大而觉得唔好意思，系近年先流行大胸肌，所以依家觉得无所谓。”饮食方面，Michael不会戒口，但就会少食淀粉质：“夜晚8、9点后唔食晚餐，早啲食。如果夜晚口痕就会去做运动。有时拍戏拍到凌晨4点先返屋企，太肚饿我就会食个提子包甚至系高热量嘅鸡尾包，临瞓前做20分钟运动先再去冲凉瞓觉，咁就唔会肥。”

原来为了方便可以于家中随时随地都操体能，Michael的家还有个好特别的设计：“我装咗条可以承受5千磅嘅钢铁喺天花板，好似树枝咁可以畀我做马骝爬，长度大约有5米，有转弯位嘅，占半个厅左右。我做嘅运动系少少时间有大大成果，慢慢累积，都有饮氨基酸蛋白质。”

问到今次是甚么促成了Michael返无线拍剧，他说：“呢套剧有好多高手前辈，而我系全部都无合作过嘅，家豪哥 (监制刘家豪) 同另两个监制又一齐邀请我，大家都好有诚意。自己系饮TVB嘅奶长大，都想再同香港观众接触返，亦都想新一代可以认识下我呢个演员。”至于他在《溏心3》所饰演的Nic到底是否反派？他说：“无可否认呢个人物嘅行径同感情上都系反派嚟。(第几集先骚肌？) 我同敏之有唔少床戏，大家一定睇到嘅。”