想要Creative Idea？给多点时间吧！│Sci Papa

“你可唔可以做快啲？”“你可唔可以做多啲？”“你咁做咪得啰，谂咁耐真系嘥时间！”呢啲对白，可能系你脑细嘅口头禅，亦有可能系父母们不经意嘅对白；因为喺香港，差唔多样样嘢都讲求“速度”同“份量”，用最短嘅时间做最多嘅嘢，先会被人认为有效率。所以作为香港人，做事都好容易以效率行先。明㗎，香港人，秒秒钟都几百万上落，正所谓执输行头惨过败家。但当“快”或“多”成为终极嘅目标时，仲边有时间去揾新灵感创造新意念？！

一个伦敦大学玛丽皇后学院嘅研究发现，人嘅大脑其中一个运作方法就系：

要有创新意念，必先压抑守旧思想。

睇落去好似老生常谈，但做落原来都几神奇。事实上，人嘅大脑系会不其然咁喺𠮶记忆宝库入面，寻找一些旧有嘅知识及资讯，目的？就系为咗用一啲过往嘅经验来处理当前的问题。但正正系我哋都太依赖以往嘅经验，喺未尝试揾新方法时，已被自己说服用旧有嘅方法解决。

我哋嘅大脑其实有𠮶机制，去抑制呢啲用旧方案去解决问题嘅想法，亦只有将呢啲想法抑制，先可以开始去创造新方案。

“脑细”只求快，下属当然唔会嘥时间去谂，尽快做好交功课完成使命。教小朋友其实都系一样，如果将佢哋完成任务嘅重点放喺速度同数量上，咁佢哋只有疲于奔命达成父母要求，仲边有时间用𠮶脑去处理新资讯同谂新意念？最后只会放弃创新，走上一条“完成到任务就好”嘅路！试问成日好似俾人赶羊咁生活，仲边有时间同心情去谂新嘢呢？

要有创意？俾足够时间你嘅下属，俾足够时间你嘅仔女啦！

参考资料：https://www.sciencedaily.com/releases/2018/12/181210150622.htm

Sci Papa （专页：Scientific Papa）

喜欢科学，但更喜欢老婆跟女儿。觉得科研跟“凑女”都是要有极度的耐性，不怕失败，还要懂得自我反思后用不同方法再尝试！将育儿及科学融合，期望伴著女儿走一条快乐的成长路。