无电啦，你有冇充电宝宝？！│Sci Papa

电话只系50%电量时，大家都会开始警觉，担心电话无电时，会与世隔绝；但我哋反而很少在意自己嘅电量够唔够，唔单止系少留意自己有冇充够电，甚至无电时都会继续死撑。

典型香港打工仔，朝9晚7返到屋企差不多8点，仲要讲紧系无OT嘅情况！（笔者都唔明点解，做到7点已经不被认为系OT）。最惨，为咗悭番啲住屋费用，不少人屋企同公司嘅距离，系要用上成个钟去搭交通工具，差不多可以飞到去台湾！而呢一个钟一啲都唔轻松，可能要转车，又可能要坐只得一个阶砖企嘅港铁，这份精神压力，唔好谂自己可以放工就叉下电，唔再耗电都已经偷笑。

当返到屋企，电量都已去到红色警戒线，但那个属于自己人生最大，至少要跟进19年的一个project都系要做㗎！同女儿食饭、做功课、洗澡、讲故事、陪睡等，仲时刻刻都要集中及记著要有同理心等等，耗电量比工作有过之而无不及。

然后，直到10点，女儿都安睡了，自己电量已剩余无几，花了最后的力气去到浴室洗个澡，享受那只得自己在一个小空间的宁静，这个小小的充电时间，令自己能在睡前处理埋家中的琐碎事、及明天工作的预备。

子夜到来，电又再次用完，接下来就是黄金充电时间，但又唔想闭起双眼就咁瞓咗个黄金时间，反而hea活一会感觉更舒服，终于hea到双眼不受控合埋左就开唔番，就系真正充电时间开始。不过，好像睡著了才一阵子，闹钟忽然就响起，双眼还未来得及张开，双手已急不及待在乱摸，希望揿熄个闹钟，谁知闹钟愈揿愈响得大声，最后醒过来才发现闹钟原来系自己个女，反反复复无限轮回了一个晚上，电才充了一半，真·闹钟真的响起，又系时间起身返工了。

出门口前，望一望个女，见到佢熟睡得像一只小猪，心谂：“算啦，几辛苦都值得嘅！”发现原来囡囡就是自己的充电宝宝，把大门关上，深呼吸一口气，变身成超级香港人，充满电来迎接这一天，直至收到老细的第一个夺命追魂call⋯⋯