【港女讲感情】卫兰唱功几好都冇用　港仔只会以外貌取人

年尾乐坛出成绩表，几乎都系分猪肉咁派，所以大家最睇好寻日嘅叱咤，感觉有公信力啲。适逢寻日系叱咤30周年，所以好似摆大寿咁，揾到厨神Chef Nic出嚟揸结他唱《玉蝴蝶》同《活著Viva》贺寿，之后侧田同at17又返嚟拎奖，歌神陈奕迅又孖住林海峰唱成8分钟Medley，陈广伟拎到最喜爱男歌手，卫兰亦断咗容祖儿连拎11年女歌手奖，接力做一姐，所有事情都好惊喜！大家都赞卫兰唱得好好听，好期待佢两个礼拜后嘅演唱会，不过……不过大家就加句，可惜佢好肥。

成日听人讲：“一白遮三丑，一肥毁所有。”即系个人生得白，就可以补救样貌阿、身材其他嘅缺点，相反只要你人肥，所有优点都会被你嘅肥遮掩住，大家只会睇到你肥，反正肥就系原罪！平时肥人经常都被人攻击，话搭巴士小巴坐多一半位，应该收两个人钱，而丹麦仲收肥人税，总之肥人就做咩都系错啦。

喺卫兰之前，最常被大家攻击嘅应该就系欣宜，可能因为佢遗传妈妈肥姐嘅关系，基本上佢就由细肥到依家，虽然佢就冇做过咩大奸大恶嘅事，记得有次佢系颁奖礼锡咗吴卓羲一啖，全城恶搞佢个嘴好似有毒咁，话系“死亡之吻”，事隔十几年大家都仲系攻击佢嘅体重身形。

肥人大概喺唐朝先生存得到，生活喺今时今日嘅社会，铺天盖地式嘅减肥广告，灌输大家瘦先系靓，就系黎明一句“卫兰肥过部电单车”，电单车基本变咗佢另一个名咁。其实人哋肥又点啫，唱歌好听咪得啰，又要嫌乐坛冇人识唱歌，得容祖儿一个独大，霸住个乐坛关爱座唔放，依家好喇，卫兰复出开演唱会，等大家可以听多啲好歌，依家又嫌人哋肥，卫兰讲过之前试过最瘦113磅嘅时候都仲系被人话肥，所以肥唔肥其实真系好主观。大家不如去欣赏吓人哋其他优点仲好啦，卫兰由唔识睇中文字，到唱足咁多年广东话歌，点解唔可以赞吓佢勤力呢，香港人唔好咁mean啦！