环富士山越野赛｜香港女将甄智贻扬威日本　后劲凌厉超预期赢季军

香港跑手扬威日本！甄智贻（Angie）在环富士山越野赛100英里（Mt.FUJI 100）靠凌厉后劲，在最后一段路超越日本的细川由美，以26小时15分46秒赢得女子季军。Angie表示第三名是意外收获，她在最后检查站被第五名的跑手追上，激起了斗心，希望保住第四名，在不断加速下，她更无心插柳地超越了细川由美得季军。

环富士山越野赛｜黄浩聪跑得男子第八名　剖析166公里赛道最难处

上月在Lantau 70赢得女子亚军的Angie，过去周末到日本参加环富士山越野赛，上周五凌晨0时起步，挑战166.6公里赛道，总攀升为7039米。Angie表示起步天气好舒服，凉爽不冷，“头十几公里可跑性高，跑暖咗个人”。花了2小时24分，跑了25.3公里，她以第六名抵达首个检查站富士宫。

在路上，她一边欣赏富士山的黎明，一边向第二个检查站麓进发。她说：“𠮶日个天好清，见到星星，日出时候见到富士山嘅剪影，见到地平线红色嘅太阳光，个天慢慢红，真系好靓。”

用了6小时34分，Angie以第三名跑抵麓，支援队Christine准备就绪。她说：“第二个检查站比我计划早个半钟，因为夜晚比较凉，我系好唔耐热，喺香港试过中暑边缘。”

Angie在蔍大休，胃口很好，先吃粥，再吃饭团及香蕉。她表示落蔍时在山边遇到清泉，见其他跑手斟水也跟住斟，“我好口渴，𠮶个水系清泉，跟住我就醒晒嘞，可以jog（慢跑）返嚟”。她表示数次滑倒跌倒，有点小伤，没有大碍。她想不到初段那么快，所以想在蔍休息多一点。她也跟支援队表示，富士山的日出剪影真的很美。

进入日头，Angie调整速度，她说：“天清就代表日头晒同冇云，所以第二个检查站坐低休息一阵，知道自己要跑返慢啲，本身冇谂过咁快，喺出太阳之后要更好控制自己，因为仲有漫漫长路。”去一去厕所，在蔍休息了超过10分钟，Angie以第五名离开这个检查站。那时候，她没想过最终可以季军完赛。

跑到70.7公里的精进湖，Angie升上第四名；去到97.4公里的北麓公园，她再升上第三位，仅落后美国越野跑天后Courtney Dauwalter及清宫由香里，后两者已经远远抛离其他人。

她记得到第四检查站北麓公园前有十多公里石屎路，感觉那段很漫长，在心理上很难挨。北麓公园刚好是另一项赛事KAI 70的起点，她离开检查站时遇到一班领取KAI 70选手包的香港跑手。她说：“最令我开心同感动，好多人拎紧KAI 70的比赛选手包，有唔少系香港人，有啲系我识嘅朋友，佢哋系度拍手，叫我个名同叫我加油。”她希望多谢打气的香港朋友。

Angie认为最辛苦是122.5公里第六检查站山中湖前，她很累，睡意来袭，通知支援队成员想喝咖啡，更打算到检查站后小睡5分钟。正正在山中湖检查站前，她被细川由美过头，由第三名跌落第四。在余下40公里，Angie及细川由美上演季军争夺战。

“（细川由美）临入检查站嘅石屎路追到我，佢同我讲咗句日文，但我听唔明，我谂意思都系友善，但真系唔知佢讲乜。佢应该冇支援队，入到检查站攞咗啲嘢就走，我仲坐喺度抹紧身、休息紧、著紧保暖嘅衫。我见佢冇著长袖衫、冇加多啲衫，好有力咁跑离开检查站。𠮶刻我觉得佢系一个好有经验嘅前辈跑手，好有后劲。”Angie道。

细川由美在山中湖留了数分钟便匆忙离开，而Angie就大休了近20分钟，两人差距大约15分钟。在第七检查站二十曲峠，细川由美仍领先Angie超过9分钟。直至攀爬1598米高的杓子山，两人再相遇。杓子山是赛道上最具挑战性的一段路，她形容：“比较斜，上去某啲部分要手脚并用；落就系成个比赛最大嘅连续下降，11公里落900米，𠮶度好斜亦都有好多树根。”

Angie表示虽然上山过头，但落山又被细川由美抛开，她说：“上杓子山有段要手脚并用，好似攀石墙咁攀上去，𠮶段我追到𠮶位最后拎第四名嘅女士。当刻我见佢另转面见到我，佢系警觉性高嘅，一过咗攀爬路段要落山，佢就跑得好快，抛离咗我。”

“我望过表，由佢过我（山中湖检查站前）到我第一次追到佢，相隔23公里左右，所以冇谂过追得返，第一次追到，佢好警惕，一落山就加快，我哋冇交流。”

由杓子山落到第八检查站富士吉田的落山路，Angie十分难忘。她说：“𠮶时已经接近一百三十几、一百四十公里，我已经攰嘞。而且落山路段虽然我有能力去跑，但𠮶啲真系好陡斜嘅山，自问我落一啲咁松散、唔系铺得好好嘅路，只脚又攰，都系窒下窒下。𠮶啲路斜到树与树之间有啲麻绳，预你可以捉下；斜得嚟有好多树根，唔可以绊倒整亲，所以我落得比较小心。”这个检查站位于赛道上的147.8公里，离终点不足20公里。

“我落得相对慢，以至我入最后一个检查站前几步路，俾后尾第五名𠮶位女士追到上嚟，𠮶下我即刻好紧张，觉得自己维持咗第四名咁耐，冇理由到最尾一个检查站、最尾一个路段俾人追过。”据大会记录，Angie仍是以第四名入到富士吉田检查站，但第五名的矢野淳子只比她慢9秒。

在力保第四名的雄心下，Angie极速离开检查站，仅留了两分钟多。她说：“𠮶下感觉好强烈，唔想最尾检查站被追过，所以喺最尾检查站我好快手，𠮶个检查站有乌冬食，义工畀咗碗乌冬我，邀请我坐低、不断叫我坐低，但我企喺度，粒声唔出塞（碗乌冬）落个口度。佢哋都有啲错愕望住我，我估佢哋都留意我旁边有另一位女士，佢哋都明白，冇坚持要我坐低休息，跟住我斟埋水，好快就离开检查站。”那时候，Angie落后细川由美超过16分钟。

吃完乌冬，一出检查站，Angie就全速前进。她续说：“（一出站）系一啲喺小市镇入面嘅路跑，跟住先系山路上斜；路跑有3公里左右，我全部跑晒。到上山路段我都系有力嘅，我哋叫power hike或者power walk，唔系跑上山，但每步都系有力行得好快，因为𠮶刻真系好唔想俾第五名𠮶位女士（矢野淳子）追过。”

在攀登霜山及天上山期间，Angie再遇到细川由美。她说：“我心里面纯粹谂住好想保持第四名，唔好俾第五嘅女士追上嚟，结果竟然追上埋第三𠮶位女士（细川由美），呢次系第二次喺上山路段追得到佢，今次佢另转面对我笑，同埋让我过先。”

“佢有笑容，用日文同我讲咗句，做咗个让我行先嘅手势。我用英文同佢讲‘You are very strong downhill. You will catch me very soon（你落山好劲，一阵实追到我）’，我谂佢听唔明英文，跟住我就继续跑。”

“追过埋第三名，团火继续烧得好盛，最尾𠮶段全部都系跑，开始夜晚天气又冻、空气又干，我真系跑到气罗气喘。”Angie说：“原来我唔谂太多，只要执行自己订立嘅目标，就系加快脚步唔好俾人追过，按住自己想执行呢样嘢去做，会有意外收获。”

最终，Angie以26小时15分46秒在上周六凌晨冲线，赢得女子季军。细川由美慢18分钟多回来，得第四名。她们在终点再次遇见，Angie说：“唔记得我哋系握手定拍膊头，我有恭喜佢。我哋有眼神交流，感受到佢眼神嘅坦诚，佢同我讲‘Thank you very much（非常多谢）’。我哋每个人喺比赛都好认真，攞条命去博，但讲到尾都会识英雄重英雄。虽然言语不通，但冲线后见到，都系好敬佩对方。”

对于季军成绩，Angie感到意外，比计划快了接近两小时。她赛后说：“我从未参加过一个距离咁长同时又唔准用行山杖嘅比赛，我都知有啲路段比较崎岖，唔知自己应唔应付得到，所以预计28小时。最尾有第三系个意外收获，从来冇谂过做到呢个成绩。”她十分感谢支援队的Christine。

在上周六傍晚的颁奖礼上，Angie站上颁奖台，身边的是美国越野跑天后Courtney Dauwalter。在今次比赛，Courtney Dauwalter以压倒性的姿势赢得冠军，时间为19小时21分22秒，日本的清宫由香里以23小时36分55秒得亚军。

Angie表示能够在起点看到Courtney Dauwalter的背影已经非常开心，想不到有机会一起上台。她说：“（比赛期间）我同自己讲‘要继续呀，Angie，可以同Courtney同一个颁奖台系冇乜可能嘅机会，但原来系有机会’。排队上台、喺台上面同埋攞完奖之后，都有机会同Courtney倾偈、讲下笑。佢好冇架子、好可爱。”

“佢系一个神，我只系一个凡人，可以同佢倾偈真系好开心。”Angie说：“有时觉得世界好遥远距离，但有机会嘅时候，自己天时、地利、人和发挥得好，原来系伸手可触。”