【来稿】有种关系　叫做中环同将军澳间嘅距离

“你住边？”
“我住中环。”
“咦，乜中环住得人㗎咩？”
“系呀……咁你住边？”
“我住将军澳。”

因为呢段同补习社男仔嘅对话，Amy先知，哦，原来中环系住得人嘅。Amy脑里嘅中环，只系小学参观过嘅立法会、好贵嘅IFC、仲有果个佢仲未够秤去蒲嘅兰桂芳。  原来中环除左平时返工既白领同埋星期六日成街嘅菲佣，竟然会有人起居生活。Amy谂到有人街坊look踢拖咁系中环走黎走去，忍唔住偷笑。

其实佢唔知嘅仲有好多。

从补习社的Cindy Ma和 Peter Wong说起

中四开始，Amy跟住家姐嘅步伐，报咗一间喺佐敦嘅补习社补英文。对于住将军澳，中学同所住屋邨不过3分钟步程嘅佢，40分钟既地铁历程就似场历险咁好玩。原来由油塘搭去北角果4分钟，佢就过左个海；然后由金钟上返去尖沙咀，只需2分钟，佢又过左同一个海。点解同一个海， 要分别用4分钟同2分钟？ 到而家佢都唔系好明。

呢间小班教学嘅补习社好出名，嚟嘅都系名校学生。嚟自将军澳屋邨学校既Amy第一次识咁多圣乜乜圣物物既学生，原来喇沙拔萃既人讲野真系串啲，又原来其他学校啲人会将英文名同英文姓一齐咁称呼人，好似Cindy Ma同Peter Wong咁，佢觉得好好笑。佢间屋邨学校， 只会叫人肥头、猪肉同大麻成。英文名基本上大家都乱咁起，曾经仲有个同学叫自己做Christmas，话反正都冇人会叫你个英文名。

补习班上面有个男仔叫Daniel Chong ，黑黑实实，个样鬼鬼地，读港岛男女名校。Daniel 确实靓仔，一开始已经好多女同学注意佢， 甚至连Drama Queen补习社Miss 都最钟意揾佢开玩笑， 用佢个名嚟做例句解释英文句式， Daniel又好似cool cool地咁，每次都系“chok”出一个不置可否嘅表情，但又有种自自然然嘅尴尬。

有次落堂，从来只知道由黑蚊蚊嘅地铁出黎就会到达某地方嘅Amy要去尖沙咀，一出补习社就呆左，慌忙之下同身后嘅Daniel 讲左第一句野：“我想问尖沙咀喺边呀？”Daniel 好从容咁指路。随后，佢两个人就正式识咗。

会考前的通宵电话粥

会考之前嘅一个月，明明系最忙最紧张嘅时候，佢哋偏偏就每晚倾电话倾到三更半夜。Daniel 话佢只去过一次将军澳， 就系去教会； 佢话有次上亲戚架游艇，见到梁朝伟； 有次无聊讲起报纸风月版，Daniel 话佢冇睇过，因为佢屋企只订《明报》。对于一个同朋友行街食饭睇戏都不出将军澳、大家屋企都不过系麻甩劳动阶层，觉得Daniel呢种人真系好mind blowing。睇报纸紧系睇《苹果》、《东方》㗎啦，Amy仲记得有个亲戚系家庭饮茶果阵大刺刺睇风月版。《明报》？学校迫你咋嘛，乜有人真系睇㗎咩？

两个人其实冇乜野好讲。但倾倾吓电话，唔知点解就越倾越无聊，越倾越大胆。Daniel话佢平时打飞机用完纸巾会掟落楼下游泳池，又话有次交地理功课时发现张纸上面有残留精液，即刻摵张纸出黎扔去垃圾筒。Amy一路听一路笑。又谂起Daniel呢种自命不凡嘅名校仔，平时补习时懒系正经个样，原来私底下咁胶咁无聊。咁佢讲讲吓，又讲自己屋企，讲平时同将军澳friend夜晚系公园食烟吹水，时不时仲会俾“龟”逗。佢觉得如果要用自己经验回馈佢哋之间嘅对话，就似乎只能用一种好将军澳嘅地茂经验。

佢哋两个之间果种嘢，其实连爱情算唔上。好似只系要揾一个人，一种好似中环同将军澳之间嘅距离，去倾吐一d同身边人唔会讲既野。

Why didn’t you call me?

佢哋好似讲过会考之后要见一见面，又好似冇。会考完，有一日Amy同班将军澳朋友抱住乡下妹出城嘅心态去港岛做游客，搭叮叮，游西港城，行上半山；佢好惊讶咁发现将军澳友从来都冇拥有过嘅野，好似石墙树、墙上一旧旧红砖，港岛人先有嘅果份历史感带嚟嘅尊贵同身份。将军澳只系一个好大嘅平底镬——佢细细个就见过呢个岩岩填海出嚟既平地，然后慢慢好似砌积木咁样起左一条条邨同方型商场，然后就装左好多新移民、排队上公屋嘅人、其他地方逼迁既人。

去完港岛一日游，佢send左个SMS 比Daniel。(系，当时未有Whatsapp)“I visited Central today.” 佢咁回：“Oh why didn’t you call me?”

之后佢哋就从来冇倾过计。

估唔到后来Amy喺补习社猛操下，A Level英文拎埋条A，入咗港岛大学，第一次体验“中环”生活。而Amy从睇Daniel Facebook知道，佢反而过左去九龙果边读大学。佢由将军澳忽然升Level到西环半山，每日上堂㗎双层巴士系般咸道兜嚟兜去，原来窗边系会扫到石墙树嘅树干，原来系红砖学校上堂特别潮湿闷热。原来都冇所谓中环人同将军澳人，大部分人都只系模仿一种佢想成为嘅人，但做唔到。

佢哋冇再见啦。或者已经都唔再需要一种中环同将军澳之间嘅距离。