见工求职面试陷阱　4条问题愈大路愈易答错　失分随时与星座有关

唔少同事／朋友都会“想转工但怕见工”，结果拖下一年、拖下又一年，越唔鼓起勇气见工，只会越拖越唔敢做。除非你已经打算做而家份工直到退休，否则间中见下工系有益处的，可以知道外面缺咩人才、其他管理层点睇你现有经验等等。

面试嘅方式有好多，但面试问嘅问题离唔开以下基本料，准备见工嘅你不妨参考下。撰文：诗宁

【点图即看】常见见工问题，你又知道如何应对吗？＝＝＞

第一类：了解求职者工作经验嘅问题“过去嘅工作经验中，你最引以为豪系咩Project？”

须知道，职场上好多同事有十年八年经验，事实只系“坐咗十年八年”，并非真系有为公司带嚟贡献。以上问题系问紧：“你有咩代表作？”。“代表作”唔一要惊天地泣鬼神，但要畀人感觉到你对工作有几投入，系清楚知道自己过去几年做过乜，答嘅时候记得要重点提自己喺Project入面担当咩角色，小薯唔紧要，小薯点配合上司？点同其他同事Team Work？

例如讲下单Project有咩难度？你点解决困难？又或者帮公司建立过咩新客源之类，只要表达到你喺公司入面唔系好似家私咁得个摆字就得。

“你认为自己喺工作上有咩不足？”

对于呢条问题，答咩都好，但一定唔好答“冇”。无论几高级嘅人都唔会“从来无错过”又或者“冇不足”。答嘅时候态度要诚恳、避重就轻，例如：“平时少去应酬，令到人脉唔够广，未来我打算参加多啲商会举办嘅活动……”

承认完自己不足之处，最尾记得加埋解决方法，令人觉得你真系有自我检讨，而唔系“我系咁样，冇得改”。一个人连自身问题都解决唔到，点令人相信你能帮公司解难呢？

第二类：睇下求职者有冇诚意嘅问题

“你对我哋公司有咩认识？”／“你对我哋而家做紧个XXX campaign有咩意见？”

咁问系想知你系咪真系有诚意加入呢间公司，定只系渔翁撒网周围Send CV、有得见咪见下啰？我个人认为，有时急揾工，渔翁撒网唔紧要。但一般由收到电话到约见都有一两日时间，应该把握𠮶一两日睇熟公司网页、睇下最近有咩Project做紧、甚至谂下如果个Project由你负责，你会点样做？有咩可改善嘅地方？

话晒你未系公司员工，就算答错咗少少背景资料都冇人会怪你，最重要系显示你有了解过、分析过，否则请咗你发现双方了解唔够，结合只系源于一场误会……即系公司又要再请过人，好烦架。

第三类：性格决定命运嘅问题

“工作以外，你平时有咩兴趣？”

对方问嘅时候笑笑口，你唔好天真到以为佢真系关心你，唔少HR会以“星座”、“九型人格”之类去估求职者性格，而“兴趣”当然亦系睇一个人性格嘅方法，答咩好？唔知道，有人觉得“钟意化妆”系“尊重自己同场合”；同时有人觉得系“花瓶发姣”。

我哋无办法控制接收者睇法，但你要清楚讲出自己有咩兴趣同原因，显示你系了解自己、知道自己想点。