衰老板有样睇！出问题不道歉反埋怨下属　遇“割席”上司如何自处

你有无试过，返工受完委屈之后有人安慰你：“算啦，份粮包埋嘅。”初初我都觉得呢句说话系有少少安慰作用，但慢慢就觉得唔对路，呢句嘢其实系帮啲衰老板／同事用嚟“行凶”，将佢哋恶行合理化。如果真系理直气壮觉得人工系包埋某啲不合理待遇，咁点解唔一早喺招聘广告写埋Job Duties系“食死猫、做出气袋……”？

作者：诗宁

返工当然会遇到唔开心嘅事，多嘢做？瞓醒一觉继续做；无职升？可能系时候未到。但返工成日“条气唔顺”就系死症，日日激心真系无心机做嘢。职场上令人“顶住顶住”嘅例子实在太多，今篇集中讲令人条气唔顺嘅老板！

【点图即看】老板、上司令人唔顺气？不外乎以下“死症”＝＝＞

特质1：未问清楚就闹

无人钟意畀人闹，但如果系自己做错事，畀人闹咪当上一课啰，但令人委屈气愤嘅就系明明单嘢唔关自己事或者系有合理原因而被对方无视，最过份就系连解释嘅机会都唔畀你。

叫得做“老板”，当然佢唔系落手落脚做𠮶个啦，佢无做过，难免有好多实行上嘅嘢佢唔明，遇到有疑问，佢一句就闹你：“点解你会咁做架？你搞乜呀？”老板唔知头唔知路，就直觉认为你唔啱，当你答：“因为…...”佢就打断你继续闹：“我做呢行咁耐从来未见过人好似你咁样XXXXXXXXXX”

然后世界静了，你只能内心讲句：“算啦，份粮包埋”。

特质2：心情差，揾人发泄​

更无辜嘅被闹情况就系你纯粹遇到老板当日心情差，可能系佢畀客闹完，又可能系佢老婆走咗返外家，总之你永远唔会知道佢嬲乜嘢，但佢就系全日都嬲爆爆。

我见过有日老板好嬲，叫同事帮佢斟杯水，同事斟完拎入房，点知老板突然间大叫：“乜你唔知我饮开三份一热水加三份二冻水架咩？”然后闹咗佢一轮，话佢做事唔细心、唔识替人设想……

然后世界静了，我们只能向同事讲句：“算啦，份粮包埋”。

特质3：踩低人为咗擡高自己

有种老板好蠢，好钟意喺外人面前踩自己下属，每次带下属出去开会、应酬，都讲到个下属乜都唔识咁，更甚者系小小事就叫个下属向外人道歉，明明系个客唔啱都话“顾客永远是对的”。

点解我会话呢种老板蠢？因为佢哋唔明“强将手下无弱兵”，意思即系叻嘅领袖之下，班细嘅都有返咁上下实力。

所以，喺外人面前踩自己下属，变相踩埋自己。

做细嘅睇住个老板冲出嚟出丑，也只能保持安静陪佢丑，“算啦，份粮包埋”。

特质4：出事后将所有嘢推晒落下属身上

上司之所以成为上司，除咗部分人系因为勤力同叻之外，当然也有人系因为喺“扮工”之中落唔少苦功啦。要步步高升，其中一项条件系唔好背镬，最快捷就系将所有镬推晒落其他同事身上。

升职之前推落同事度，升职之后推畀下属。就算份嘢有佢签名，出事时都可以讲句：“我一日签咁多份嘢，点样逐份睇呀？你一早做好啲就唔会出事啦。”

跟呢种上司预咗做箭靶，“算啦，份粮包埋”。

其实我唔介意份粮包埋好多嘢，但最紧要系份粮加返50%先。