【职场内幕】每间公司都有份黑名单? HR揭秘:这些人永不录用

撰文: 书摘
出版:更新:

打工仔普遍认为在人事部工作是一份优差。求职者面试时,永远对人事部表现得恭恭敬敬,而且亦掌握公司最高机密:在键盘按数个键,便能够查阅公司内所有同事的薪金。
在任职人力资源超过10年的“HR小薯蓉”以亲身经历,分享每间企业所拥有的“黑名单”,究竟犯了什么规条,才会被列入这本死亡笔记?

HR掌握求职者的“生死大权”。(视觉中国)

撰文:HR小薯蓉

传说话每一个邪恶HR嘅巢穴深处都收埋一份暗黑名单,喺呢份名单里面嘅人都系一啲十恶不赦嘅搞事分子,每个人都被施以一个“永不录用”嘅诅咒。如果要畀呢个诅咒一个限期,肯肯定会系一万年。

超过十年HR行业经验的小薯蓉透露每间企业存在“黑名单”,万一被列入名单,可能永不录用。(电影《Up in the Air》剧照)

当我初出茅庐,仲系一粒生薯仔嘅时侯,有一日我老细同我讲:“喂,薯蓉,呢个人今日突然冇返工,又冇请假,你帮我打畀佢睇下佢咩事。”

唔返工?咪即系旷工?当时听到觉得好大件事,以前返学走堂就湿湿碎啫,旷工对我嚟讲就好似犯法一样咁大镬。后来先知啲人旷工当食生菜。

当时听到老细咁讲,即刻觉得自己身负重任,即刻喺个极唔 user friendly 嘅 HR system 入面揾呢位旷工男嘅资料。翻过重重障碍后, 终于畀我揾到佢个手提电话号码。

拎起电话打畀旷工男,听到嘅声音系:“你已经接驳到 xxxxxxxx,请喺咇一声讯号之后留言。”
手提电话打唔通唔紧要,我再试打去佢屋企,结果都系冇人听。身负重任嘅我揾佢唔到 ……

因为惊佢唔知系咪上班途中出咗事,于是我就揾佢嘅紧急联络人资料,电话顺利打通,然后听筒传嚟佢妈妈嘅声音。

“喂!你好,我系薯仔公司打嚟,请问系咪旷先生嘅妈咪呀?”
旷妈咪有啲愕然。
“系呀 …… 有咩事?”
“因为我哋今日见旷工男佢冇返工,请问你知唔知佢喺边呀?”
“系咩?我唔知㖞,我都以为佢返咗工。”
“哦 …… 因为我哋都担心佢有咩事所以打畀你。”
“咁呀 …… 我试下揾唔揾到佢啦,有咩消息再打畀你。”
“好呀!唔该。”

收咗线之后到当日收工为止,我都冇再听到旷工男及旷妈妈嘅消息。到第二日朝早,就系我人生第一次见到人事部传说中嘅黑名单。

公司的黑名单,记录每位曾犯过错的员工,尤如死亡笔记一样。(死亡笔记剧照)

  无声消失的人 名字就写上“死亡笔记”

第二朝一返工就传嚟旷工男嘅消息,原来旷妈妈揾到佢,叫佢打返畀公司,但佢只系同一个相熟嘅同事交代自己要返大陆,决定唔做喇。佢冇交低任何辞职信,亦冇联络过自己主管,走得劲急好似走难咁。

主管尝试再联络佢但都系揾佢唔到,而且佢仲留低咗大量未完成嘅工作要帮佢跟进。因为旷工男辞职需要一个月通知,我仲要做埋收数佬问佢追返啲代通知金。就咁听都知,旷工男呢次咁不负责任嘅行为,留低咗几多麻烦畀公司,永不录用我谂系基本消费。

冇几耐,老细就指示我要将佢个名摆落永不录用嘅黑名单,我终于有机会打开呢个神秘嘅 Excel 档案。

打开被诅咒嘅黑名单,里面全部都系不能说的名字,仲写明各式各样嘅入选原因。于是我根据事件,输入旷工男嘅名字,感觉就好似将佢个名写落“死亡笔记”一样,令佢从此永不超生。

犯下什么过错会被列入为“永不取录”,要视乎不同企业的准则。若果遇上“方丈”,门槛可能会较低。(视觉中国)

  犯下什么过错 才会列入永不录用名单?

如是者喺呢十年工作里面,我都唔记得自己做咗几多次夜神月,写咗唔知几多人名喺呢份死亡笔记黑名单。虽然黑名单真系存在,但又唔使担心,自己讲错一只字得罪老细就畀人放入黑名单。到底系做咗啲咩嘅人,先会入到呢个名单?大致有以下呢啲例子:

欠公司财物或金钱无故失踪唔返工 工作表现极度差劣使用假病假纸虚报工作经验及学历做咗危害公司利益行为 严重行为不检,曾滋扰同事 曾于公司内犯法态度十分恶劣嘅求职者

喺黑名单里面出现嘅,通常都系一啲犯咗严重过失嘅人。不过当然,每间公司都有各自嘅记录条件同方法,例如方丈𠮶啲,门槛咪低啲啰。咁入咗黑名单嘅人又系咪永不超生? Never say never。

本文节录自《我系邪恶HR》​

作者:HR小薯蓉,facebook page blogger,商科毕业,做咗HR十年多,由薯仔做到变薯蓉。成日畀人话好得闲冇咩做,但几分伤心几分痴,辛苦OT冇人知。见尽奇形怪状CV、见工奇行种、各式各样吓死HR的事件,深明做HR的辛酸。坚信人力资源系公司最大资产,专业能够改变HR邪恶的形象。2016年起于《Jump职场生活杂志》撰写职场专栏。

出版社:非凡出版

本文经出版社授权转载,大小标题及引言,经过香港01编辑修订。