【早霸王】教暗恋对象沟仔　男听众靠一招走出Friend-zone

“朋友以上，恋人未满”嘅Friendzone关系，真系好令人心痒，今次《早霸王》“你知道唔知道有人挂住你”男主角阿健正正就系站于Friendzone边缘。喺旅行社任职嘅阿健，话本身同暗恋对象只系同属一个部门，而且一啲都唔熟，但因为今年初佢带团时出现咗啲问题，令二人关系产生了变化。“佢本身都算系我上司，因为我带团时同个客意见不一，所以佢whatsapp问我成件事系点，之后好理性咁教我下次遇到问题时要点做。”

就系咁，阿健同暗恋对象渐渐由倾公事变为倾私事。“做咗朋友之后，佢话有朋友介绍咗个男仔俾佢识，仲叫我以男仔角度分析一下成数有几高。于是就提议不如约出嚟食饭倾，我仲教佢点approach男仔。”阿健话当时对呢位同事仲未有感觉，所以都唔介意佢有其他追求对象，直到几时饭局后，阿健开始对呢位同事有好感，所以就系8月时试探对方。“我问佢同个男仔点，佢话无心动感觉，话可能因为系朋友介绍，唔想得罪朋友所以先去见面，我同佢讲‘其实钟意咗你’佢当时俾唔到反应，吓完之后仲问我发生咩事。”

阿健透露其实都表白过好几次，但对方都系拒绝，直到最近觉得系时候要放弃。“我同佢讲‘唔再烦你啦，祝福你同个男仔’”以为感情就此无疾而终，谁不知呢位同事竟然同阿健讲“你咁坚定嘅人系咁易放弃架咩？”由红灯突转绿灯，小仪同Marco听到都十分振奋，仲话呢啲摆明系“ 柳暗花明又一村”。电话接通阿健暗恋对象Wendi后，佢第一句竟然系“点呀”并谓“知道咩事”，似乎系有听节目直播，所以都唔需要多讲，阿健嘅表白好简单好直接“我咃中间有好多阻滞，但而家已经解决咗，想问下你可唔可以认认真真咁俾次机会我”，答案当然是“可以”。