【早霸王】男听众诚信破产点收科？森美：我真系有啲替你担心

又到周五限定嘅“你知道唔知道有人挂住你”时间，男听众阿Car想藉节目同女友认错兼道歉，他表示女友因为要考会计试，于是主动提出帮手整理历年嘅试题同答案，等对方易于温习，之不过，由于时间安排失档，呢份贴心试题，最终都未能如时交到女友手上。“如果我肯主动同佢沟通，可能就算迟咗佢都会接受，但我就系无。”
 

就咁听，其实都唔算大件事，如果女友咁都嬲的话，绝对可列入港女系列。系森美追问之下，阿Car透露自己曾经离过婚，但原来佢从未同女友交代过离婚原因系因为有外遇……“同埋而家我哋一个香港、一个澳门，周末先会见到面，信心同信任都好紧要，所以应承佢嘅嘢都要做到。”男听众讲完呢句，连主持人Marco都忍唔住话：“咁点解唔见你准时整理好份试题比佢？”森美接著表示：“女仔角度，一次不忠百次不用”真系好一针见血。

见到男听众真人想道歉，森美都好认真咁教路，“你话佢知隐瞒系因为觉得太错同埋羞耻，唔系有心想欺骗。”不过，当听到阿Car表示女友呢几日连讯息、facetime都无应机时，森美都不禁表示：“我真系有啲替你担心。”阿Car指女友系《早霸王》忠实粉丝，所以相信对方都有听直播。但又或者可能系听到直播嘅原因，所以森美一连打咗两次电话，阿Car女友都无听电话，睇嚟真系嬲得几紧要……