【专访】陈奂仁高中时期被欺凌患抑郁：最低爬返上嚟就系好汉

最近出演贺岁片《恭喜八婆》的陈奂仁Hanjin，充份表演其演艺天份，令人感叹这个人真是多才多艺，无论作曲、填词、唱片监制、混音、唱歌、做戏、运动都难不到他。其实，Hanjin有天生弱听，左耳只有七成半听力，右耳更只得五成，本身的成长路已荆棘满布，还不止，他有阅读障碍，在高中时更曾被欺凌致患上抑郁症。

天生弱听代表甚么？Hanjin用一个比喻解释，别人听到一至十，自己只听到一至五，但其实当事人并没有感觉差别，因为别人的十就等于自己的五。他说：“我生出嚟就有问题，但唔知，唔记得点解（发现），可能当时老师投诉唔专心，就去check吓耳仔，原来真系比常人听力少一半。正常人听到10分嘅嘢，我听到5分，但系对我嚟讲都系maximum。”

最初，Hanjin并没有因为弱听而受到困扰，根本不知道原来自己听到比别人少，但却有一些侧面的因素反映出他弱听的问题，“我谂冇人会觉得我有咩唔啱，唯一就系觉得有时候，点解佢冇反应？佢系咪唔专心？佢系咪好寸？因为听唔到嘛。”他讲话时会比别人大声，因为太细声会连自己都听不到。

在高中的时候，Hanjin经历了一生的转变，患上抑郁症。与弱听无关，受欺凌却是因为转校，他说：“我喺高中嘅时候真系被欺凌，我喺新加坡读所谓嘅名校喇，系有好多傲气㗎嘛，（𠮶阵）我为咗一个奖学金去咗隔离名校，因为我日文好叻，我读日本嘅course for A-Level系有奖学金攞，咁我就去喇。直到我发现个course系好低能，唔系我想读嘅嘢，唔系𠮶样嘢，咁我就唔读喇，返去母校算喇。一返母校就要顶（得顺）所有人嘅变脸，当然校长系觉得你终于返嚟喇，因为𠮶阵我成绩好，国家队游水，佢梗系想你返嚟，帮佢增光嘛。一入返去就大镬，𠮶个偏见同埋欺凌系唔单止学生，系老师都玩埋，佢哋又唔会打我嘅，但系佢哋系心灵上嘅欺凌，同埋会散发谣言。即系冇喇喇个老师会写6页嘅投诉信，副校长又会开咪叫陈奂仁立即到我office，佢（副校长）倾完之后就陪佢散步，我记得佢同我倾偈，问我系咪唔开心。Anyway，点解会畀人欺凌，因为我去咗敌校，因为咁𠮶阵时我有抑郁症。”

抑郁症，对很多人来说是一个恶梦，Hanjin也不例外，克服这个病足足历尽十多年的时间，本身是一个问题多多的人，也要放下执著，他说：“抑郁症表面嘅嘢好解决，但深底嘅嘢真系花咗好多年时间，17岁，食咗两个礼拜药。抑郁症系个人谂歪、自信不够、自我怀疑太多、心虚、惊，而家调节咗喇。啲人话跌到最低爬返上嚟就系好汉，好难，点样爬返上嚟呢如果抑郁症，你要放弃一啲执著，你要认知你嘅执著，慢慢去放弃。我系一个谂太多嘢嘅人，而家就系尽量放弃谂嘢。”

患上抑郁，亦成为Hanjin全心投入音乐的一个原因，弱听原来并不阻碍他的音乐的追求，一来他并不觉得自己与正常人有很大的听觉差别，二来他不并惧怕这个问题，“你唔觉你咪唔惊啰！”这是Hanjin的豪语。跨过了弱听的问题，还有两个因素令他如此醉心音乐，他说：“第二样嘢就系钟意，不过第三样嘢先系关键，我发现我钟意极音乐，都系喺抑郁症之后我先好似神经咁捐咗入去，学结他、学唱歌，我发现音乐特别帮到抑郁症嘅人，因为空虚，冇安全感，音乐系可以有治疗性，因为抑郁症病患者可以借用音乐嘅情感嚟畀返自己一啲存在感，我嘅伤心不止一个，或者系有个形状，咁就有个并鸣，点解抑郁症病患者咁钟意音乐？因为有共鸣。我揾到共鸣之余仲要多啲，我要制造音乐，我要提供共鸣，提供畀人哋提供畀埋自己，我谂个动力就系嚟自呢度。”

Hanjin在3日21日将会在香港文化中心音乐厅联同钢琴家何秉舜举办主题为“无限亮”的《小小仁小小BING》演唱会，再加上香港失明人协进会及香港聋人福利促进会的成员以手语或乐器，用音乐宣扬共融，他表示：“今次无限亮中心嘅概念，系大家都系奋斗者，所以叫《小小仁小小BING》，大家都奋斗紧，大家都有缺憾。（政府对有障碍人士帮助够唔够？）可以更加好，但其实已经好好，唔好话足够，因为已经有好多团体喺度积极地帮，例如聋福会，因为我系聋福会大使，我好知道佢哋入面嘅运作系点样，佢哋抱住咩心态去揾方法不断帮听障人士。啱啱聋福会宣布佢哋会做专业手语课程、手语课程，但系有冇人去留意呢？其实呢啲好重要，当你弱听时有个姐姐畀手语，你会舒服好多。”