【专访．有片】沈卓盈等啱时机结婚：我哋朝住呢个方向出发

每年演艺圈都新人辈出，过去一年TVB先后有多位艺员离开，当中包括不少当红花旦小生，相继宣布不再续约，有人回内地发展，有人回归家庭养尊处优。而现年34岁的沈卓盈（Jess）在去年底约满之后，今年年初宣布离开效力16年的娘家，一心向外闯。
摄影：叶志明
拍摄：叶志明
剪接：陈键乐
场地提供：Gary Kwok Flowers & Design

宣布离开娘家TVB　沈卓盈决心跳出舒适区

Jess 2002年参加第四届《TVB周刊》Cover Girl选举夺冠后，加入TVB，一做就做到去年年底。要离开这个16年的“家”，她坦言自己是经过深思熟虑后决定：“其实我都考虑咗足足一年，毕竟喺公司嘅保护之下成长咗16年，自己所做嘅工作全部都系公司帮自己安排，咁我觉得都16年，系咪应该畀自己跳出呢个舒适区，出去试下，挑战下自己呢？我觉得都系时候出嚟见识一下个世界，学多啲嘢。”

认好角色可遇不可求　Jess肯搏肯挨

眼大大皮肤又白净，加上身形高挑有一双长腿，Jess这么多年来一直深受观众喜爱，但回顾在TVB的16年，她只是担任配角。不过她并无怨言，反而很感激公司栽培：“由我入行开始公司畀咗好多机会我，主持、剧集、唔同角色，尝试咗好多唔同嘅角色先训练到自己。我觉得好嘅机会可遇不可求，要等一个好嘅机会都系要遇啱，天时地利人和。”Jess现时独立发展，凡事都亲力亲为，可能过程比之前辛苦，但她却乐在其中：“宜家自己去接洽唔同嘅工作，对我嚟讲所有嘢都好新鲜。其实我唔怕辛苦唔怕挨，呢啲都系经历，呢个过程都系一个学习嘅过程。”

与男友有结婚计划　Jess愿为事业拼搏

Jess与从事内衣生意的男友Calvin拍拖三年，一直以来男友都十分支持她的每个决定：“佢都有畀唔同嘅意见我，我都好多谢佢。（有冇叫你唔好做，做少奶奶？）唔会，因为佢知道我性格。我觉得做嘢系一个人展现自己魅力嘅方式，女人一定要有自己嘅事业先会有自信，跟得住社会嘅节奏，唔会脱节。做嘢最大嘅成功感就系，你做一样嘢出嚟大家系赞嘅，认同嘅，对我嚟讲就系最大嘅回报。”如今两人感情稳定，Jess都表示有结婚计划：“我哋有共同嘅目标，都系向住呢个方向出发，时机啱嘅时候就会去做啦。”

期望新年有进步　Jess尝试多方面发展

踏入新一年，Jess工作上有新转变，谈到新年愿望，她除了希望身体健康外，目标都离不开工作：“希望自己可以接多啲唔同类型嘅工作，可以猪笼入水，财源广进。希望有唔同嘅工作机会畀自己去发挥，继续进步。（有冇签约新公司？）其实自从宣布离开公司之后，一路都有唔同嘅公司接洽自己，呢个阶段都好Welcome，我都想慢慢去拣下，考虑清楚。”Jess目前有不少主持工作，未来亦希望多方面发展：“乜都试下，唱下歌拍下戏，做下舞台剧，学多啲嘢，咁就够喇。”

【周五心意运动】您捐一封$50利是，已可为基层送上温饱，01心意呼吁您支持【香港青年协会】 ，每$50即可制作5碗爱心汤和心意礼物：https://heart.hk01.com/zh/project/10095