【早霸王】男听众回味如何被女神迷倒　森美忍笑忍得好辛苦

识朋友，第一印象真系好重要，就好似今期《你知道唔知道有人挂住你 》男主角Bosco，佢准备同一名叫芳芳嘅女子表白：“第一次见佢系朋友介绍，佢着住半披外套，好有全智贤女神feel，跟住个样似吴若希。”听到吴若希呢个形容之后，森美即时静咗一秒，然后投诉感觉如同由太空跌落地面：“吴若希出名唔系因为样㖞！而系性格。”Bosco话女神性格爽朗、直接、强悍，同吴若希都好相似，之后更举例说明。“第一次见时食饭，佢一坐低就已经话想饮汤、想食中菜，冇点问我意见，心谂呢个女仔都几客气下㖞……不过就系呢个性格吸引我。”森美听完都指Bosco：“想揾个恰自己嘅。”

之不过，原来呢个饭局仲有下文，据Bosco形容，芳芳当晚饮水时，拨头发嘅动作令佢完全沦陷。“佢嘅优雅令我真系以为佢饮紧红酒，𠮶刻好吸引我。”听Bosco回味嘅语气，真系陶醉到不得了，而森美就笑到收唔到声，指Bosco似“中毒”，之后Bosco再分享同女神第二次约会，并笑言“呼吸都觉得靓”，赞到天上有地下无，森美准备打畀芳芳时，Bosco仲话要夹下流程。电话接通后，芳芳把声确系爽朗，佢同森美讲暂时没有拍拖，更笑言“因为啲男仔衰咸湿”，但之后都有解释“衰冇feel”。

但系咪真系一个啱feel都冇？芳芳又话唔系㖞，并指近来都系同某人出街，但就嫌对方“唔系好话得事”，又指之前对方约佢睇灯饰好冇新意，森美听到都十分认同，并教路︰“当然唔系话去睇灯饰啦，话去影相咪得啰。”双方电话接通后，Bosco深呼吸一口气，读出爱的宣言：“我记得你问过我有咩条件，我嘅要求就系必须要系你，另一次我唔舒服，你问我做咩身体咁差，我答你，对住你冇咩抵抗力，你望住呢一分钟，系属于我同你，可唔可以做我女朋友？”Bosco深情到一个点，但森美就应该忍笑忍得好辛苦，咁女主角又点呢？佢就好爽快咁话：“可以谂下。”