【早霸王】男听众成日讲I love you　暗恋对象唔应机但如常约会

又系《早霸王》嘅“你知道唔知道有人挂住你”环节，今次男主角Steven话自己十几年前读酒店管理课程时，钟意咗其中一个女仔。“成日约佢睇戏、食饭，最近一次去跑步比赛，影咗好多sweet相，即系摆下心心甫士咁。”Steven更指跑步比赛系女方主动邀约。

照咁睇，都好似几有机会表白成功，之不过，当森美问Steven女方有无做过任何事令佢觉得有机，Steven就话自己成日都会喺Whatsapp同女方讲“I love you”但对方就从未有回应过，而佢自己亦都无追问。“但之后约佢又会出嚟。”听完Steven嘅故事，森美虽然认为表白成功率都几高，但“如果无答I love you又怪。”为咗解开呢个疑问，于是就打电话比女主角Elaine，并巡例问“有无拍拖？”Elaine话同男友拍拖三年，而且感情仲唔错！森美于是同Elaine解释点解会出现呢通电话，又问佢觉唔觉身边有追求者，Elaine表示：“同男友以外嘅男性朋友单独食饭实有，普通朋友一定有架啦，但又唔觉有人追。”

好明显系襄王有梦，神女无心，森美当然唔会比Steven表白啦，不过最好笑系当Steven听到Elaine原来有男友时，仲反问森美：“系咩?唔知佢拍拖㖞。”森美问佢点解唔一早问，估唔到Steven再一次放笑弹:“无问㖞。”并不停傻笑，激到森美都忍唔住讲句：“你仲笑得出！”