【港女讲感情】农夫氹Do姐笑到肚痛　人生有个搞笑朋友的确好极

近期最Hit嘅话题一定系农夫同Do姐夜晚𠮶个旅游节目，内容唔系重点，重点系人脚够好笑，讲真大台拍旅游节目基本上系个个月都有，都系换汤不换药，对上好似森美带住班𡃁妹，又或者杜如风Solo去日本，个反应都冇农夫同Do姐咁好，点解呢？森美同“学是学非”几个女仔虽然已经夹咗好耐，有晒默契，但可惜被森美一个做主Key大男人咁窒佢哋，第一次可能好笑，之后都会觉得闷，冇咩火花；而杜如风钟意佢嘅人就好两极，一系就好Buy佢呢种又癫又丧嘅风格，一系就话佢死港女净系识Shopping，即系食唔晒两家茶饭，都系fail。

但农夫同Do姐呢Pair就真系冇得输，唔系话之前嘅主持唔够好，只系相比之下，Do姐佢哋之间产生嘅化学作用赢几条街！Do姐贵为大台阿姐级人马，相比起汪阿姐，家燕姐，Do姐畀大家感觉系知性一啲，好似之前拍《男亲女爱》、《一笔Out消》都系做女强人嘅角色，之后再踏入广播界做DJ一样捞得好掂，所以好多重要嘅场合都会揾到Do姐做主持。而农夫初初入行系跟住陈冠希唱Rap，之后人人都识唱佢哋首《风山水起》，但未必好认识佢两个，到之后入屋拍电视节目先令大家了解到边个系农夫，原来佢哋转数咁快，讲嘢咁搞笑。

Do姐嘅知性威严加上农夫嘅风趣幽默，一拍即合，换咗其他人都唔会有咁好效果，即系变咗汪阿姐大家就会弹佢嫌三嫌四，但Do姐大家又会服佢㖞；而农夫呢种转数快，又肯做下把位，唔会下下都要攞彩唔受得气，实属难得，一凹一凸，，吸引咗一班平时唔睇电视嘅朋友，都特登早啲返屋企睇Do姐，你就知个节目有几成功同好笑啦。

其实一班朋友入面，“农夫”呢个角色好重要，唔理喺中学、大学，就算出嚟做嘢都好，都总有一个人系做下把位被大家笑吓，为大家带嚟欢乐。但边个会肯做丑人呢？人人都想做Do姐，做笑人𠮶个，又有边个会想唔讨好，被人嘲笑？但就会有一个人抵得谂，甘愿做笑柄，仲会肯主动自嘲，就系为咗令大家开心，如果有个咁抵得谂嘅朋友，大家真系要好好珍惜。