【港女讲感情】关晓彤鹿晗拍拖唔系童话故事　自身条件优秀好重要

寻日鹿晗认爱关晓彤成为城中热话，微博仲因为咁而死机，鹿晗几千万粉丝当然嬲嬲猪，即刻去起底关晓彤到底系乜水，仲揾到佢几年前Po嘅相，逐张逐张去闹佢，爱之深恨之切，大家都可以想像呢班粉丝有几爱鹿晗，有网传话有粉丝因为知道佢两个拍拖，仲话要鎅手自杀，好彩最尾证实系假嘅。鹿晗个势咁劲，仲有淘宝商家趁机捞一笔，话只要证实到系鹿晗嘅粉丝（好似话要Cap微博/朋友圈图），买嘢有折扣，仲搞笑话只要知道系关晓彤粉丝，即刻加多你几蚊！

鹿晗喺大陆被大家叫佢做“国民小鲜肉”，个个当正佢系男神，未结婚嘅就当佢系对象，结咗婚嘅仲夸到话要生个女都要同佢结婚，今次鹿晗公开女友关晓彤身份，可以话系全国陷入失恋状态。大家对关晓彤都又爱又恨，嬲就当然嬲佢抢咗自己个FF老公，但又无可否认，佢的确各方面条件都好好，讲真，就算鹿晗唔系同关晓彤一齐，都唔会轮到自己，清醒吓啦大家！

关晓彤的确系人生胜利者，赢并唔系因为佢系鹿晗女友，而系因为佢好有上进心，系呀，就系港女最钟意提嘅“上进心”！成日都话男人穷唔紧张，最紧要有上进心𠮶个上进心，关晓彤就系最好嘅例子。

佢4岁已经做童星出嚟拍剧，系呀，已经自己揾零用钱，仲要本身屋企都好有钱，听讲系官唔知几多代，但佢并冇荒废学业，由细到大都系学霸，考第一对佢嚟讲易过食生菜，学业事业都咁得意嘅时候，大家都会谂佢有冇拍拖。关晓彤曾经讲话屋企人管佢好严，唔希望佢读书时候拍拖，甚至连拍戏锡吓都唔得，阿妈仲凶佢叫佢自己谂清楚。少女点会唔想拍拖，佢话身边拍拖嘅朋友都好几对，但为咗读书，佢除咗Part-time拍剧之外，其余时间都拎嚟揾书，佢讲过：“高考前我许的愿是用一年单身换高考取得好成绩。”好喇，最尾关晓彤真系成功咗，爆分用状元姿态入北京电影学院，最后拍剧同鹿晗戏假情真。

所以关晓彤同鹿晗拍拖并唔系咩童话故事，女仔只要有上进心，自身条件都好嘅时候，自然会吸引到优秀嘅人，各位失恋嘅小粉丝，都系专心读好啲书啦！