【任噏乱评】港姐冠军点解令人讨厌　自信雷庄𠒇其实衰啲乜？

2017香港小姐嘅赛果令到好多人喺呢几日多咗唔少茶余饭后嘅话题，个个都争住话边个边个唔抵，边个边个唔值。不过赛果就已经出咗，无论系被传媒热捧嘅伍乐怡，有家姊光环嘅张宝欣，愈跑愈有力的何依婷，通统都输俾雷庄𠒇（Juliette）呢个黑马。先唔理无线嘅选举制度，反正选咗出嚟都无得再推翻，但系Juliette当选完之后立即惹来大众嘅负评，究竟系点解？

话明选美，个样一定系大众第一个专注嘅地方，Juliette样子有别于一般香港女性，带点儿混血的味道，而大家对佢样貌最大嘅批评始于佢棚牙。不过审美呢家嘢就好主观嘅，想当年陈凯琳都系咁上下样喇，咪一样选到。既然个样未必系大家负评佢嘅主因，仲有咩因素令到佢俾咁多人闹呢？

除咗呢样嘢，喺选完𠮶一晚，当各位参赛者，无论落选又好拎奖又好，都纷纷喺网上平台打返啲感言，多谢吓大家咁。但系Juliette继续维持住佢一贯自我嘅表现，喺系自己Instagram上留言话：“So this happened...”睇埋堆hashtag，“#queen #firstplace #winner #champion”剩系呢几个已经睇得出系真系自信爆棚，不过就一个thanks都未有提及过。其实佢自我都唔系第一日知嘅事，未选之前TVB有个泳装彩排及试戴后冠环节，虽然个泳衣系有啲老土，不过佢就好大胆咁讲：“我自己就唔会拣呢啲泳衣。我谂呢个泳衣系中国啲，like more conservative（保守）。我返去加拿大𠮶边可以再show-off啲。”连自己老板都敢窒，可能TVB就系睇中佢呢种咁自我嘅性格。

睇返近几届嘅港姐冠军，前两年的冯盈盈和麦明诗都明显系做贴地路线，两位讲嘅嘢都比较贴近而家香港嘅时下话题，亦因为呢个point渐渐得到一班人支持。再对上两届的邵珮诗和陈凯琳，则走高贵路线，无论系外貌定谈吐都比人感觉系大方得体，虽然比较离地，不过都印象鲜明。咁今次Juliette嘅形象又系咩？佢连季节呢个词语都唔识，我好难相信佢可以贴近香港嘅话题，喺佢个直播live入面不停讲I don't care，话人智慧唔够，话人教育不足，更加同高贵拉唔上大缆。唔通作为一个香港小姐嘅冠军形象就系够自我？

好多人都会话，咁佢都系表现自己真性情嘅一面啫，有乜问题？问题在于香港小姐一向自称系“美貌与智慧并重”，Juliette美唔美就真系见仁见智，不过以文章上述的几个point，佢𠮶种处事手法系多么的唔圆滑，当你本身已经喺一个无公信力嘅选举制度下赢冠军，系咪应该收一收歛，等大家啖气下一下，而唔系风头火势𠮶阵仲要去拨火，智慧去咗边度呢？

谂深一层，大家对佢咁大怨气仲有一个原因，就系本身嘅大热门全部都落晒马。讲明大热门就一定有班fans撑架喇，伍乐怡基本上第一日就已经展现咗佢嘅冠军相，最后竟然连三甲都入唔到，成晚陪跑乜都无。何依婷正宗本土代表，城大一级毕业，道地港女靓样，又俾Juliette压住只得第二。金美黎广受网民欢迎，Big Big Channel心心大比数抛离其他佳丽，一样五强就byebye。各自嘅fans加埋嘅怨气绝对唔讲得笑，不过多要帮Juliette讲返句说话，呢啲一切都系TVB嘅安排，唔可以怪佢嘅。

根据传媒披露，Juliette自细就好钟意跳舞，不过佢知道跳舞系赚唔到钱，一定要出名先得，可能就系因为咁回流香港返嚟参选。其实追梦真系好热血，我都认同佢想跳舞跳到出位，出名系一个好方法，不过如果以佢而家呢个情况，出咗𠮶个名都一定唔会系好名。上一上Ｇoogle打雷庄𠒇呢个名，差唔多全部都系负面嘢，其实佢系咪应该收一收自己咁“火辣”嘅性格，用吓追梦去包装唔系几好咩？