【我不怕唱歌】港女高材生唱功威尽亚洲　林二汶惊讶：啲力好直接

林二汶：唱歌唔同咗㖞！啲力好直接，我觉得佢真系唱得几好！
刘美君：都唔系好差，不过太conscious，变咗抒发感情𠮶到就去唔到，因为太用个头唱歌，think too much。
两位实力派歌手前辈对呢位“高学历港女”嘅评价一褒一贬，唔知你又点睇？
摄影：梁碧玲　黄浩晋
剪接：许柏伦　黄浩晋

今集《我不怕唱歌》为大家带来一位女歌手，13年金牌经理人Paco黄柏高听佢唱两句就话要签佢，净系讲呢个故仔就知佢系实力派啦！呢位歌手，当年参加《亚洲流行音乐节》夺得“Wechat人气大奖”及“超级新星大奖”，是第一位代表香港胜出比赛的歌手，都咪话唔厉害。呢个音乐节，就连红爆内地的陈伟霆，都赢唔倒！可想而知呢位歌手，实力非凡，难怪Paco曾大赞她是王菲接班人。

一头短发、眼大大、打扮斯文，咁多提示相信大家都估到系边个啦！

正式加入乐坛前，佢读大学时喺父母极力反对下依然帮监制艺琛唱Demo，又疯狂夹Band出Show，为唱功及演场演出打下根基，难怪当时Paco听咗佢唱两句就话要签佢做大阳娱乐旗下歌手啦。

13年出道，主打歌《第一志愿》“天空会给我意志/惊险也必要尝一次/趁这青春　要拥抱　心仪的事”相信呢几句大家唔记得晒成首歌都会有些许印象。出道第一年成绩唔错，推出首张专辑《Soliloquy》。除咗《第一志愿》，《我就是主角》、《大个》等等歌曲讲述自己坚持做音乐嘅原因，以及向父母诉说自己嘅心声，相信同样面对困难依然在追梦嘅听众都会有共鸣。

J.Arie父母反对佢唱歌并唔系单纯觉得做歌手收入唔稳定，觉得读港大法律系毕业走去做歌手太大落差等等。J.Arie如今重提呢件事嘅时候，都明白父母其实系想保护自己。佢话：“都明白嘅，佢哋系想保护我，因为我生出嚟扁桃线有两个瘤喺入面，好容易感染。人哋可能食两包薯片冇事，但我食两块就会喉咙痛，所以我细个我父母唔畀我玩Choir(合唱团)，又唔畀我朗诵，就系唔想我用把声，我都明嘅。”

J.Arie又讲到：“但系依家最讽刺就系我用把声嚟揾食啰！”虽然天生有小障碍，但仍然无阻J.Arie，正如歌词“惊险也必要尝一次”。J.Arie唔单止做歌手，而且近来有不少幕前演出机会，例如《今晚打丧尸》中饰演“揿钉华”个老师，之后仲要化埋丧尸妆面目全非，唔系佢喺facebook讲想信好少观众会认到系佢。

今次《我不怕唱歌》节目邀请到乐队Hey Joe Trio及键琴手阿一为J.Arie现场伴奏，令J.Arie拾回入行前夹band出骚嘅感觉。其实J.Arie现时演出都希望有live band傍住：“梗系正啦！我都好想有live band傍住我，我自己最钟意嘅表演方式咪就系bruno mars做紧𠮶只啰！但系依家因为钱嘅问题，令到未必每一次都做到呢件事，但系我好想啰！如果我开骚一定会摆队band好近好近我，甚至我会嗌队band出嚟同我跳舞。我觉得俾队band包围住个感觉好安全，好舒服，一齐玩咁！”

入行前J.Arie曾加入乐队Matchbox，而曲风色彩比较灰暗，J.Arie笑谓：“写𠮶个人长期都好灰冇计㗎㖞！”可惜Matchbox于月前解散，对于曾加入的乐队解散，J.Arie慨叹：“好唏嘘，大家都好唏嘘。”她续道：“唉，有好多时呢啲嘢，虽然大家音乐嘅理念系一样，但好多时最终大家可唔可以走埋一齐，系人嘅问题啰！你见好多时呢一行，边个同边个唔啱，好烦㗎呢啲嘢！有时去到合作去做一件事出嚟，已经唔系讲紧你能力有几高，你叻唔叻，你弹乐器有几好，已经唔系呢啲啰。系个人嘅性格嘅问题，可能几个好衰性格嘅人一齐，咁夹到咪夹到啰，磨合唔到咪……散啰！”