【专访】烂声照录音监制艺琛拍台闹　J.Arie：真系唔想㗎嘛大佬！

摄影：梁碧玲　黄浩晋

虽然J.Arie参与今次《我不怕唱歌》，但其实入行第2、3年，佢都怕过唱歌，仲觉得当时有啲“一蹶不振”。J.Arie表示：“好辛苦呀！𠮶一年有少少一蹶不振feel，试过做节目做到喊，成年都系咁。 入行第2年，踏入第3年𠮶个阶段时间系怕过唱歌。”

J.Aire形容自己当时系“冲出嚟嘅o靓仔”，对每一样嘢摆到自己个期望好高，成日好想有回报；到入行第二年发现自己又跟不上外界的要求，心情非常波动。

到入行第三年情况更差，断断续续病咗成年，声音状态冇好过，情绪跌到落谷底，J.Arie话：“唯有硬住头皮，沙声呀，唱几take又冇声呀，咁样习惯咗呢一种低谷嘅情况，踏入16、17年，个身体机能又好转番，个人又开心番。”佢讲到：“虽然Artist系好情感牵连嘅动物，但系我都好希望可以个人平和一啲，EQ好一啲。”

虽然J.Arie心情与身体状况都跌落低谷，幸好可以向身边嘅监制艺琛大吐苦水；不过拍住艺琛原来好大压力，J.Arie仲试过俾艺琛爆粗闹。J.Arie话：“尽管已经唱咗4、5年，每一次录一只新歌都系新挑战。同埋佢(艺琛)每一次都会X我嘅，每一次少不免有呢个过程，每一次录音录到忟，录到闹‘点你个状态又会系咁㗎！’不过呢一年好啲喇，之前仲系拍台闹！”虽然过程辛苦，但录出嚟嘅成果过到自己𠮶关就乜都抵番晒，《冰岛》 系佢暂时最满意嘅作品，而且亦系最花时间。

J.Arie声线状态差仍然硬住头皮录音，但照样要俾监制闹，J.Arie谂起都好激动：“系呀！喂！我真系唔想㗎嘛大佬！但系身体唔听话，病完一次第二个月又病过，自己都好嬲自己！但系一齐做嘢、录亲音又会俾监闹‘点搞呀你！’都会忟嘅！”

近来J.Arie较多幕前演出，会否因此忽略音乐，失去时间创作？答案竟出人意表：“反而唔系㖞！其实要拍系用好少时间㗎！基本上，上年我有大部份时间我系匿咗喺Workshop度写歌，录音室度录歌。其实我仲有一啲存货喺到未推出嚟，真系争拍埋个MV就可以推出，今年希望可以将之前一路写落啲Demo真系可以成事。”

J.Arie透露将会有一段时返内地，但仍然希望演唱广东歌：“我希望系带广东歌俾大家，我唔会忘记个语言，即使佢好难唱。”早前不少香港歌手都参加过内地选秀节目，但因为语言问题被淘汰，J.Arie会否对此有顾虑？佢表示：“呢啲顾虑唔到我谂，呢一个阶段我认为有咩歌最能够表现我嘅感受，同埋我擅长去演绎，而我能够赋予一个新生命畀呢首歌，我就会唱。我冇谂太多一定要我唱国语歌就去唱国语歌。你想冇咁玩自己嘅话咪拣国语啰，但系我觉得广东话呢个语言一定要带去有华人嘅地方，我首选系广东话。”