越野跑｜曾小强中年舍弃救护“铁饭碗”　全身投入教练及保育工作

香港越野跑手曾小强（Stone）一直兼职跑山，本身任职救护员25年，但他最近决定辞去“铁饭碗”，希望投放更多时间做教练、保育山野及行山径。他表示在3月完成台湾中央山脉的挑战，对人生有新的感悟，而且最近有好朋友突然离世，令他决心把握珍贵光阴。他承认教练的收入只有救护员的四成，或影响家庭的生活水平，所以他十分感谢妻子支持，让他可以在47岁之龄离开舒适区，实践理想。

曾小强辞职的消息令很多山界中人错愕，一来47岁不是冲成绩的年纪，按道理不会为全职跑山而辞职；二来他住宿舍，有妻有儿，两名儿子尚幼，生活开支大，没有理由在这个经济环境下辞去“铁饭碗”。曾小强也表示当他将辞职的决定告诉同事及好友时，大家都难以置信。

他解释：“一路计数，都觉得冇乜可能走得到。我觉得人揸住咗好多嘢，好难去放手，你嘅人工、福利，成日去计，计唔掂，系走唔到。不过，自从喺台湾返嚟，我发现我哋嘅生命已经好丰足，其实生命唔需要好多嘢，好简单都得。唔需要揸住咁多嘅嘢，都可以好满足。”

台湾之旅+好友离世　促使曾小强辞职

曾小强多年前想过辞职，那时他正值运动员生涯高峰，希望停薪留职、用一两年时间做全职跑手，但当时部门不批准，他就打消了念头。今年3月，他用7日挑战台湾中央山脉，如同野外求生，曾遇黑熊，试过缺水，爆林开路，湿身渡河，面对低温，令他反思生命的意义。他说：“我觉得人应该系去选择你嘅生活，而唔系活着你嘅生活。”

在4月回港后，曾小强再次考虑辞职，而且不幸地，他的一位好朋友因急病离世，令他体会到人生无常，故下定决心。他说：“活在当下好重要，以前成日识讲，但好难做到，好难跳出嚟。直至见到有朋友，唔知点解突然离世，生命真系好短暂、宝贵。人走嘅时候两手空空，冇嘢带得走，能够留喺大家心目中嘅，就系你喺人生之前做过嘅嘢。既然有嘢想做嘅时候，就应该去做。”

曾小强是香港跑山界的一代宗师，他是香港四径超级挑战的完成者，曾代表港队出战山路越野跑世锦赛，而且在环勃朗峰超级越野耐力赛（UTMB）跻身过前20名。跑山以外，他致力推广大自然及山径保育。

住在宿舍，育有两子，若果辞去救护之职，曾小强全家都要迎来大转变，所以他必须得到妻子同意。他说：“同佢（妻子）分享成个（台湾中央山脉）旅程同我嘅得着，亦好老实睇返个经济状况支唔支持到，其实都得嘅，但都要𠱁下太太。佢有问：‘我哋嘅生活质素会唔会降低？’我觉得心中富足就得啦，好似催眠佢啦。我都好快落到决定。”

曾小强的妻子有稳定工作，可以支撑家庭开支，他表示父母及念中一的长子都支持他辞职的决定，只有念小三的儿子担忧地问他：“爸爸会唔会冇钱买嘢食？”他在6月递交辞职信，9月将正式离职。

曾小强表示也喜欢当救护员，但他想试下花更多时间在教练及保育工作上。他说：“救护呢份工帮咗我好多去了解人生同一啲际遇。我做咗救护25年，当中好多得着，感恩自己嘅环境同身体其实好好。我钟意去帮人，同人倾偈，帮到人又有人工，呢份系咩工嚟！呢份工作畀我好大满足感，尤其走电单车𠮶几年，成区得一架电单车，所有紧急嘅救援都要去，令我见识咗好多嘢。”

曾小强希望分享跑山经验　帮助年轻人成长

被问到未来有什么大计时，他笑道：“真系冇大计！你唔走出嚟，你系plan（计划）唔到嘢。谂系得个谂字，系谂唔到前面条路点行。一定要先走出嚟，停咗份工，有多啲时间去慢慢行，先帮人教下班，做下啲保育、山径嘅嘢。慢慢做落去先会见到方向。”他希望可以到不同学校推广保育山径，宣传行山礼仪，加强下一代珍惜大自然的意识。

他还想更多分享自己的跑山经验，尤其鼓励及帮助年轻人成长。他说：“好想话畀年轻人听，你唔好觉得自己读书唔叻、好多困难、好似世界末日，呢个系磨练。路一定系崎岖，视乎你系点行落去。我要讲畀佢哋听，呢啲都系正常。只要一路行，就会见到条路点行。”由7月起，他会训练一班年轻人，帮助他们参与年底的The North Face 100越野赛。

被问到辞职后收入会减少了多少，曾小强叹了口气，续道：“就咁计，真系冇一半！帮人教下跑班，可能得返三、四成左右。有时都谂，呢个时势，系咪得？但你多咗自由，做啲自己想做嘅嘢，都好兴奋同期待9月之后会点。如果想揾我教班，就揾我啦。”

人到中年，离开舒适区，曾小强说：“有心唔怕迟，我又唔系要冲比赛、赢冠军。”他以帆船作比喻：“就好似帆船，你泊佢喺岸边，起风嘅时候，你真系应该揸佢出去，因为乘风破浪就系佢嘅使命，唔通等水静、风静先出去咩！既然风起嘞，觉得可以出去闯下就闯下啦。我哋预计唔到前路，但唔会后悔去尝试呢次旅程。反而你唔去试，真系会后悔。”