【香港年金】定存好过年金？　年金公司新专栏拆解谜团

政府设立的公共年金计划“香港年金”，将于7月19日（下星期四）开始接受登记。对于这种新产品，坊间有不同分析权衡利弊。年金公司新推出专栏“老刘笔记”，因应市场意见发表评论，为大家解开谜团。

首篇文章比较年金与定期，两者操作不同各有特点，对于长者现金流及承受的风险亦有差别。

以下是“老刘笔记”首篇文章，老友记可以仔细参详：（小题为记者所加）

最近终身年金出炉，全城热烘，同世界杯都有得比，有好多人都为咗呢样嘢发表评论，咁都系好事，多啲观点，多啲角度，等我地班老友记谂清楚先好买。不过大家都要小心留意，有啲睇法同分析系基于理解有误，又或者将橙同苹果做比较，老友记如果照单全收，就可能误咗“终身”大事。

例如，我老刘最近见到喺网上疯传一个意见俾啲老友记，就系话不如将 $100万放喺银行做定期存款，以依家存款利息高达2.15厘计，利叠利滚存20年到85岁可连本带息攞番$153万，好过买终身年金，同样到85岁只可收番$1,392,000。

定存利息虽然高　不及年金可攞到终老

对于呢啲“精明贴士”，我第一个反应就系，将钱放喺银行原封不动20年做定存，咁样岂不是变咗失匙夹万，一个仙都无得使？我地做比较要均真啲，终身年金系你投保咗$100万系佢𠮶度，你下一个月就可以每个月 攞$5800（以65岁男士计）直至终老。如果有位65岁嘅老友记将$100万去做定存，但需要每月喺存款度攞$5800做退休使费，以2.15厘嘅存款利息计，佢呢笔存款喺17.3年后（即82岁）就干塘，无以为继。但终身年金就唔同，只要你仍健在，当你到82岁甚至更后嘅时间，你都可继续每个月攞$5800，愈长寿，回报就愈多，就算真系“长命120岁”，都唔使担心“坐食山崩”。 

买股收息？　要考虑当中风险

另外，呢位仁兄又话就算比你活到90岁，买咗终身年金都只系攞到$1,740,000，25年只系赚咗$740,000，等于年息2.9厘，不如买汇丰或公用股啦。香港人最紧要有得拣，我老刘绝对唔会反对人买股票或其他投资产品，只要考虑埋当中风险。首先，我仲未见到市场上有保证回报嘅股票。仲有呢个2.9厘回报又系基于一个错误嘅假设，就系将呢$100万嘅本金原封不动放喺度25年去生息。如果好似终身年金，喺第二个月就可以每个月攞$5800出嚟用，长攞长有，计埋呢个现金流，其实呢位65岁嘅投保人到90岁时已享有5%的回报率，而唔系2.9%。

讲咗一大餐，其实我只系想话，老友记买唔买终身年金都系要谂清楚自己嘅需要，仲要小心分析吓人哋嘅“分析”！