冇功劳都有苦劳 点样打救新世界？│刁佬
对于市场敏感资料及传闻，越去澄清股价越跌，已是新世界发展(0017)的常态。2025年刚刚开始不久，市传新世界已请求银行提供一项期限三年的融资安排，以旗下一些知名物业作为抵押品，包括旗下酒店式公寓K11 ARTUS、写字楼K11 ATELIER及中环新世界大厦等，为今年及明年到期的581亿元的无抵押贷款进行再融资。睇嚟香港嘅银行家真系好勤力，都未过农历年已经做晒报告仲谂埋方案。
执笔之时新世界发展股价只有4.18元，市值约105亿港元。其实单是K11 ARTUS及瑰丽酒店的价值都已远远超过市值，还未计集团其他资产，不过话分两头讲，当然亦都未计佢哋嘅负债。新世界近来的跌幅比其他香港地产股都厉害，反映市场不单止不相信集团的资产值，更估计其负债相当沉重。《一代宗师》就话打功夫一系横一系直，刁佬就话公司入边唔系资产就系负债。大家对新世界嘅担心讲得白啲就系觉得资不抵债，佢嘅资产可能真系好宝贵，不过喺呢一刻真系买唔出价钱。刁佬曾经讲过房地产最重要嘅系Sitting power，即系要坐得起。资产价格高高低低，如果系市场低潮嘅时候被人追债夹仓还钱，宝贵资产只能拱手相让，好多时瑰宝级资产的转让，都喺不情不愿地于这样的背景之下进行。
根据报道，瑞银已停止接受部分新世界发展证券作为保证金贷款（Margin 孖展）的抵押品，瑞银嘅财富管理部门 (Wealth Management) 最近几周更减少了此类贷款。花旗和汇丰的私人银行部门早几个月前就已经停止接受新世界的证券作为保证金贷款抵押品。就算与集团的债务无关，都反映这些私人银行认为新世界的债券及证券会继续跌，并不足以做抵押品。刁佬亦与新世界旗下的二按公司交过手，近日二按公司发信表示已转手，受益人已变，不过一切不变，最紧要刁佬继续供款万事大吉。新世界旗下的资产相继已被各界债主刀仔拮紧大髀，情况好似一碗裂咗漏紧嘅双皮奶，上面已经摷哂皮。
据大行的综合统计报告，新世界已落成投资物业估值逾1,780亿元，当中36%已作出质押，无抵押的投资物业账面值至少达1,140亿元，而集团嘅无抵押银行贷款余额达930亿元。假设投资物业估值没有水份，又假设而家仲可以全数卖出呢千多亿嘅楼，咁样债务与投资物业估值相若。不过大家买过楼做过按揭都知，如果你层楼嘅价值同贷款额差唔多，银行系唔会借钱比你嘅，因为银行需要预留楼市下跌作为缓冲嘅空间，所以自住物业最多都系借到楼价嘅七至八成（视乎总体楼价而定），至于投资收租物业一般银行只会借到四至五成。新世界押尽所有系咪合格？相信能否达到安全范围都系一个问题，始终而家现楼都难卖，更常见有业主蚀卖，市场有大量的减价货供应，如果新世界唔劈价，刁佬好难相信呢一批物业推出市场可以维持账面上嘅估值。
刁佬觉得要救新世界，佢嘅股东必须要表示出诚意，唔可以再恃住“有限责任公司”嘅免死金牌保护自己。始终过去赚咗咁多年钱，大股东又点会无钱落自己袋，不过以前赚返嚟嘅钱今时今日洗净几多就唔知啦。刁佬相信债主十分愿意重组债务，因为呢一刻相信连银行担心如果接手资产，无论打靶或者经营都唔容易，无谓债主变业主。不过如果要银行披荆斩棘，上报老细去重组债务，大股东家族必须要注资出钱救个仔。银行要同好多人交代，见唔到大股东表现出一定嘅诚意，又点样同老板申请将债务重组延期去救你？
至于政府又点呢？既然大新世界好多倍嘅恒大都可以唔救，政府又点有理由去救新世界。而且库房而家又干溏，出口术叫银行灵活处理，尽力支持已经好好。而且事件曝光已久，政府能活动的空间更有限。刁凤问：“咁你觉得新世界仲有无得东山再起？”好遗憾刁佬觉得喺正常情况之下救得返已经系奇迹，如果仲要东山再起再战江湖，刁佬就只可以拭目以待。
始终新世界系大股东郑氏家族嘅地产公司，喺大股东立场，地产公司应该专心一致独沽一味做地产，极其量将地产项目注入艺术元素，艺术可以触动心灵，不过就系推唔郁个价，尤其是要卖𠮶阵。至于分散投资，都系留返畀股东自己安排。富豪的确唔易做，计数机清楚显示畀钱救返有啲蚀底，不过行走江湖咁多年，呢间公司喺香港留低不少足迹，冇功劳都有苦劳，就咁由佢折埋又好似唔系几好，呢铺真系情与义值千金，刁佬未去到呢个境界唔识评论。
简介：游走在中环黑白之间，自觉是个穿著西装的古惑仔，在波诡云谲的金融市场中，钻研刀不血刃的秘诀。
免责声明︰以上内容仅代表作者的个人立场和观点，不代表香港01的任何立场，香港01亦无法核实上述内容的真实性、准确性和原创性。
另外，以上纯属个人研究分享，并不代表任何第三方机构立场，亦非任何投资建议或劝诱。读者务请运用个人独立思考能力自行作出投资决定。