香港宽频争夺战 中移动遭私募基金剃眼眉｜刁佬
八九十年代香港商业腾飞，股坛狙击手不少，由置地饮牛奶至大刘吞并华置，单单都引人入胜，成为至今经典，过去的争夺目标，今时今日已经成为商业巨贾。不过经典矜贵，能够承传至令真系少过黑胶唱片。事隔几十年，最近香港宽频(1310)掀起中外争夺战，刁佬觉得今日新闻随时成为未来经典，当然要讲下。
早前中国移动(941)旗下中移动香港以每股5.23元向香港宽频股东提出有条件自愿全面现金要约，每股5.23元，以香港宽频已发行股本计，公司总估值达69亿元。岂料前几天由境外资金主导的环球全域电讯(HGC)股东 I Squared Asia Advisors Pte Ltd有意提出全而收购，收购价不多不少，亦同样为每股现金价5.23元。不过目前I Squared 只系表达有收购意向，并未正式提出邀约。不过提出呢个价钱真系有啲剃中移动眼眉，收购价冇升到，只不过话俾小股东听我大小通杀，唔同中移动要收到50%+先至肯执行。对想走嘅现有股东的确唔错，不过对中移动而言就唔系太友好。
只要价钱一样，小股东卖畀边个都一样，中移动提出嘅有条件全面要约，即系话中移动香港及一致行动人士要确定50%以上股东愿意出让，要约才会进行。用返人话嚟讲就即系话买唔够50%，中移动系唔会畀钱。小股东既然要买股票，净系会问，几多钱？同几时俾？如果卖畀I Squared 可以马上收到钱，做乜要等中移动？
香港宽频既然受到各方追捧，当然要分析下佢嘅财务状况。根据2023年年报显示，公司的现金流十分良好，每年营收达到107亿，不过成本与开销亦唔少，扣除成本管理费用成97亿，其实所剩无几，最惨系融资成本（主要系利息）差唔多8.6亿，睇落有10亿利润，减理利息、税金同其他杂费之后都系得千零万。
至于资产负债表，眼见总资产有成177亿都叫做家大业大，不过净资产就只有25 亿。而商誉及无形资产已经超过100亿，而物业都有31亿。基本上商誉及无形资产与长期负债107亿元相若无几，除非公司进行集资行动，否则香港宽频现时嘅资本结构绝对系资本不足（Under capital)。喺资金成本低容易贷款的年代，这是一个优势，但系当利息上升，市场流动性减低，麻烦就会接踵而来。公司现时长期贷款利率平均8%，基本上公司全年嘅利润超过八成系用嚟畀利息。
香港宽频表面上仍有25亿元净资产，但实际上负债压力极之庞大。如果无办法压缩成本，再营运落去都只是帮银行打工。最惨系𠮶25亿净资产，其实就系一啲旧嘅机器同机楼。所以公司嘅价值在乎于佢嘅客户，当然佢嘅电讯及互联网供应商牌照，同埋喺地下铺好嘅光纤网络，都系公司极之重要嘅资产。其实香港宽频都算有良心，冇喺资产负债表反映其公平价值出嚟，如果要计条数都唔细，睇落会大只好多，只系内伤极其严重。
I Squared 作为一个私募股权基金，赚钱为上，经营实业并非他们的生意之道，有好价自然想卖。香港宽频在市场上一直放售卖盘，如今中移动香港有意购买，都算揾到住好人家。I Squared 却突然反咬提全面收购，价钱又要同人哋一样，明显是要逼迫中移动香港提价。不过电讯网络公司呢一啲战略性资源唔系任何人想买就得，要过电讯管理局，仲要阿爷嘅默许同祝福。今时今日地缘政治咁敏感，外资又点会冇任何审批就可以喺香港买个电讯公司。
收购嘅嘢，同大家出街买𩠌一样，一系极需要急住买，好想食；一系霎时冲动见猎心喜。中移动真正家大业大，大把生意好做，香港嘅收购对佢来讲也不会提升多少利润，极其量可以返去同老细汇报进一步推动大湾区融合。I Squared 突然玩嘢插只手落嚟，用同样价格去收货，随时玩到北大人冇兴趣收购，虽然未来两年利息会逐步降低，但电讯与网络的回报已经去到平台期，要靠新服务再去争取多一点的回报，短期内难以实现。简单嚟讲香港宽频嘅业务已经近乎系固定回报，成败在乎于佢自己嘅资金成本。
收购合并好多时都要靠一鼓作气，畀人窒住条气就真系会有啲唔开心，不过买唔到亦未必系坏事。毕菲特讲过，投资就好似棒球员挥棒一样，打唔中唔紧要，最紧要有下一次机会，买唔到钱仲喺手自然有下次机会，如果胡乱操作，就系金山银山都只会变成投资者嘅坟场。
简介：游走在中环黑白之间，自觉是个穿著西装的古惑仔，在波诡云谲的金融市场中，钻研刀不血刃的秘诀。
免责声明︰以上内容仅代表作者的个人立场和观点，不代表香港01的任何立场，香港01亦无法核实上述内容的真实性、准确性和原创性。
另外，以上纯属个人研究分享，并不代表任何第三方机构立场，亦非任何投资建议或劝诱。读者务请运用个人独立思考能力自行作出投资决定。