金融科技周开锣！早餐沙嗲牛面卖120蚊 呢样加钱好小器?｜温多娜
撰文： 温多娜
出版：更新：
金融科技周2024（FinTech Week）自今日（28日）起，一连5日在亚博馆举行。温多娜就八到，除咗喺迄今规模最大最瞩目一届之外，场内提供的餐饮价钱，亦同样令人“哗哗声”。
当中最为港人熟悉的早餐沙嗲牛面配菠萝油，就要125蚊，旁边仲有括号，写住用大光面㗎！如果想加杯冻奶茶，仲要另外加5蚊。呢个价钱，的确就真系一众金融才俊先食得起，娜娜就出返去行过隔离两条街，去揾间茶记医肚算数。
贵价早餐真系好难食得起，当中，鱼蓉肉碎粥配油条猪肠粉，都要120蚊；如果食素仲弊家伙，火龙果粒水果乳酪，再配个甜椒薄饼卷，就盛惠170蚊。反而系个All day Breakfast买165蚊，同出面食肆比起上嚟，算差唔多价。
呢样嘢仲要加5蚊 被指小气
早餐贵到吓死人，相比之下，午餐价钱就叫“抵食啲”。全个餐牌最贵𠮶两样嘢，都系芝士烟肉焗细新薯配烤猪排骨，同埋蟹肉金菇伊面配炸鸡翼，仲有碗杨枝甘露饮下添。不过同早餐一样，如果餐饮要冻饮，系需要加5蚊嘅。
嗱，散嗌呢，娜娜见到一样有选择，忌廉鲜吞拿鱼酸瓜菜沙律三文治，就位位170蚊。唔好话我净系报贵嘢呀，迷你松饼同支装水系最平，只系要30蚊就有交易啦。
“这些机会不属于我的”，咁嘅价钱，娜娜真系食唔落。但一众出席嘅才俊，听闻都叫唔落手，仲话最过份系话，都收咁嘅价，冻饮点解仲够胆加5蚊，真系好鬼小气咁话㖞。仲有才俊笑言，“乜大光面好劲咩，要特登highlight。”