Pure Fitness中环店欠租遭入禀 拖租可威胁业主定太天真？｜刁佬
冠君产业信托(2778)旗下CP(SH) Limited入禀高等法院指Pure Fitness中环分店违反租约，要求法庭下令PURE连本带利还款逾1,358.6万元，法庭文件揭发Pure Fitness中环分店，原来自今年4月起欠交租金及管理费等费用，平均计每个月要交270万租。
冠君产业信托被租户欠租都唔系第一次，上一次同医思健康(2138)合力演出以股代租，当时股神股圣股侠合力发功，加埋投资公关齐心合力吹奏，最后成功炒起股价，叫做有交代。不过冠君有冇趁机会卖出股票赚钱收番啲租就不得而知啦。不过呢个案例都算是中环的经典范例。可惜今次Pure Fitness唔系上市公司，股票唔值钱，以股代租就难以重演。
市场传闻，其实Pure Fitness的苦业主其实不止冠君一位，金钟英资大地主同样受Pure Fitness欠租之苦，有内部人士话Pure Fitness老板，想以拖租威胁大地主减租，不过据探子回报大地主寸步不让。
大家不要觉得地主寸步不让不近人情，老实讲如果Pure Fitness盘生意仲睇得到有起色，叫业主稍稍同你一齐挨，渡过难关真系冇乜所谓，反正咁大地方，赶走咗Pure 都唔系即刻做得返出去。但如果睇唔到未来，咁就难搅啦，地主啲伙计都系打工嘅，老板问一声系咪减咗租以前欠落的钱就追到，除非生意模式改变又或者市场突然间都重大调整，如果唔系个报告你话点样讲，就算减租畀你条数都系越拖越大，倒不如尽早解决，早死早投胎。
如果刁佬系英资大地主的财务顾问，真系叫佢快啲清Pure Fitness盘算数，揾执达吏扣起啲机，封咗个场，转手畀人做，地主仲有啲渣拿，攞返些少欠租。否则再继续拖落去，随时会total loss。
男嘅健身为操大只，女嘅为保持优美线条，大家健身做运动，出力流汗都系为咗变靓啲健康啲，总之就成个人阳光健康又大方。刁佬系一个算死草嘅中佬，去GYM要比千几两千蚊一个月，当然希望又近又方便，最好更可以令双眼健康啲啦。
根据年轻金融才俊汇报，时下年轻人都唔再喜欢限时限刻跟死一间Gym，钟意周围去，听讲而家最受欢迎嘅系24/7健身室，可以无论咩钟数都做gym，仲要无人sell你上堂买套票，耳根清净不知几好。Pure现时的生意模式的确面对很大挑战。
其实 Pure 一开始以瑜珈馆起家，瑜伽馆唔使太多装修，只要有瑜伽席同埋一个吸引人气嘅老师就可以，所以基本投入相对比较少，而且因为同学嘅凝聚力加上老师嘅吸引力，地点好多时都未必系开馆嘅首要考虑，变相租金就好大嘅议价空间。不过Pure 就由瑜伽馆进化成健身室，呢个进化真系一阔三大，去到gym无返咁上下嘅健身器材一定俾人投诉，时下嘅带氧运动健身机器每件起码都两三万，加上机器体积唔细，每件占地不少，搅到健身室无返一万几千呎，都唔见得人，更莫讲话收会员。
而家目标客户群仲要系高端中产及白领，地点要近佢哋Office，又要有更衣室同冲凉嘅地方，有啲仲巴闭有桑拿。呢个咁嘅设计梗系正啦，不过自然要负担沉重嘅租金，计埋灯油火蜡同埋人工，条数实在太襟计。刁佬粗略估计无返三四百万一个月根本支持唔到开销，就算每个会员每个月俾两千蚊你，都要2,000个会员先至可以收支平衡。
其实近年新建屋苑大多数有会所健身室，时下更流行街头健身。睇嚟除非地主大发慈悲，将一啲死埸俾你做健身，否则写字楼地段嘅健身室只能够比甲级价钱先可以入会。
简介：游走在中环黑白之间，自觉是个穿著西装的古惑仔，在波诡云谲的金融市场中，钻研刀不血刃的秘诀。
免责声明︰以上内容仅代表作者的个人立场和观点，不代表香港01的任何立场，香港01亦无法核实上述内容的真实性、准确性和原创性。
另外，以上纯属个人研究分享，并不代表任何第三方机构立场，亦非任何投资建议或劝诱。读者务请运用个人独立思考能力自行作出投资决定。