【职场技巧】工作严重犯错忌私下极速解决　6个程序助拆弹减伤害

相信大家都试过，发现做错事当刻一定心情沉重兼难以置信，个心系咁跳之余仲不断问自己“点解会咁？点会我会做错呢件事？而家点收科？”

无论系Send错Email俾客，报价时报得太低，定睇错合约条款搞到公司蚀大钱，以上种种其实都可以归类为“人为过失”，时不时都会发生。虽然一旦做错就无得返转头，但即时采取行动一定会减轻后果。

有人第一时间想收收埋埋博大雾、卸责、逃避责任或者扮唔知，但都只系权宜之计，长远来讲无法解决问题。冷静啲，不如睇下有咩拆解方法。

即睇工作犯大错时6个拆解方法（点图浏览）↓↓↓

1. 避免不动声色极速解决

犯错嘅严重性可大可小，就算想趁无人知快速解决，呢个方法都未必可以套用到所有问题。何况面对突发情况已经急到一头烟，要理智作出决定可谓难上加难。更明智嘅做法系尝试抽时间，策划适切有效嘅回应。我地明白无人想丑事传千里，但建议最少向上司汇报，尽可能开诚布公解释来龙去脉。系呀，佢地可能会好激气，不过佢地带黎嘅见解分分钟抵消你所受嘅气。有需要嘅话就搬“人总会犯错”出黎挡驾，大多数经理都系过来人，总会明白的。

2. 承担责任，承认过失

用各种方法逃避责任根本避唔到一世，既然已经犯错，就算只占小部分责任都要企出黎承担过失同道歉。假如造成嘅破坏麻烦到好多人，就要向每位受影响人士道歉，可以嘅话最好亲自道歉添，充分发挥诚意，令对方觉得贴地，甚至切身处地作出回应，不至于令你太尴尬。呢个时候最忌胡思乱想，要冷静落黎睇清状况，明白到发生错误实属无心之失，而家重点系尽快拨乱反正。

3. 为多方考虑

当然唔系指胡思乱想、杞人忧天到胃痛，而系考虑到各个方面，以求照顾到唔同情况。呢一刻系解决问题嘅时候，最理想系预计最好同最坏嘅结果。你要思考各种可以达到最佳结果嘅方式，同时要谂好每个做法，避免导向最坏结果。前文都讲过身处突发情况时思路未必清晰，试下揾埋经理或者相关同事倾下，可能有帮助之余仲俾到其他睇法你。

相关文章：踏入30岁再没天真权利？　5大人生烦恼该学懂逆向面对｜自我管理

4. 即时行动

策划出解决方法就要全速执行，系咪需要重新审视成个Project、同客户开会认衰仔、定要即刻打俾律师？无论份工保唔保得住都唔好拖延时间。可能你呢一刻努力制止自己崩溃，好怀疑、好憎自己，但都要收拾残局，保持专业；最多解决之后再返屋企咬枕头啦。

5. 振作精神

想理清思绪的话，可以暂时避开风头。犯错后觉得尴尬并无问题，不过事发一日之后就好回复正常喇。错咗就错咗，第二日可能有人错得仲严重过你，令大家唔记得晒，所以要保持一份自尊。一次错误不足以抵消一直以来嘅付出，更加唔可以抹杀你犯错当日前嘅种种功劳。最后不妨喺适当时机同同事倾返呢件事，笑一笑又系一条好汉。

6. 吸取教训

唔使多讲，当事件已经结束（而份工又保得住）就要反思当初点会发生，着力改善，以免重复犯错。同时要俾因你而受影响嘅人知道，你已经吸取教训，唔会再出现同样错误。你会发现大多数人都肯原谅，毕竟教训都系学习嘅一部分；但亦唔好因此松懈，要表现出自动自觉、锐意改善嘅态度。

【本文获“vanna.com”授权转载。】

相关文章：坐垫护脊椎、加热杯垫方便润喉　6大小物办公室必备｜Office法宝