【职场技巧】收无礼email点得体回复？先深呼吸冷静、切忌恶斗

无论你做边行或咩职位，Email礼仪都好重要。根据Sanebox最近的一项研究，一般人用上28%工作时间睇email同覆email，所以写得一封大方有礼嘅好email非常重要。好多公司将email通信作为一种白纸黑字嘅记录，即系你系email所讲嘅嘢，之后可以畀自己、畀人揾返出黎。
好似当你请人地帮你做一件事，就黎deadline你去问佢几时有嘢畀你，人地先话你无畀过，咁呢个时候email record就有关键作用喇！

但收到公司同事或街外人嘅无礼貌email，你会点处理？我收过大量无礼貌兼粗鲁嘅电邮，紧记一点：你要冷静同佢地沟通。如果大家斗恶，覆就覆得爽，之后问题升级就大镬

深呼吸

听落做咩都深呼吸搞得掂？系真嘅，有啲人好容易受到一封电邮影响，挑起佢嘅怒火或带来好心情。你深知唔考虑清楚就send email会点，所以当你收到一封发脾气email，calm down！问问自己以下问题：

咩原因令对方send封无礼貌嘅Email？
点解sender要咁嘅tone讲嘢？
我做左令佢咁燥？
除左话返佢转头，仲有无其他嘢可以做？

思考完以上问题，应该可以揾到哩封电邮嘅前因后果，同埋要点覆先最帮到件事。处理电邮时总要尽量保持礼貌。要严肃，但唔好粗鲁。试吓将电邮中讽刺或批评嘅部分放埋一边，然后用专业方式回复，同时CC埋上司等有咩事都有多个人知情。

Send前停一停，谂一谂

电邮入面有“草稿”功能，不如考虑用佢做一份真草稿？好多人认为电邮应该即刻覆，即刻覆当然好，但手快快回复可能会有不足之处。先写好回复，退一步，再读一次。试下咁睇：要你当面真人讲呢番说话，你够唔够胆？如果要你同上司咁讲又会点？如果你觉得是但一个位唔妥，咁就唔好send out住。处理无礼貌嘅电邮时，你要宽宏大量过对方，心入面要谂住《莫生气》。咁做系会花多一啲时间，但通常比你匆匆忙忙send out嘅暗藏怒火email更有效率，帮你悭返好多后续工夫。

降一降温

根据情况，等件事稍稍降温先覆可能系比较谨慎嘅做法。如果问题唔系太紧急，可以系一两天内覆。通常，对方应该无咁火遮眼，会清醒返。

▼▼按图放大，看以下对着不同人的情境示范▼▼

老老实实，处理哩啲email真系劳心劳力。你要佛系上身，唔好畀对方挑起怒火，先可以好好处理。即使对方系无理取闹，都唔好以牙还牙。紧记，你唔可以嬲，暂时将情绪放埋一边，保持礼貌同专业态度，覆左email先闹！

【本文获“vanna.com”授权转载。】