《美食敢死队 》试饮淘宝网红手摇奶茶 摇一摇 3秒就饮得！
唔知各位奶茶控有冇试过有一种一日唔饮奶茶就周身唔安乐嘅感觉呢？奶茶就好似我地嘅精神食粮，冇咗佢真系唔得㗎！为咗各位资深奶茶中毒者嘅福祉，今次小编率先为大家试饮手摇奶茶、手摇抹茶及即冲茶包。无论你喺屋企定喺办公室，只要奶茶瘾一发作，马上就饮得！
今次试饮嘅牌子就系喺小红书上好hit嘅【木马逐风】，木马逐风以“喝了不会胖”作为卖点，声称无香精、色素、防腐剂、奶精及植脂末，倡导饮得健康嘅讯息。每一杯奶茶嘅热量亦只有100卡路里，各位贪靓嘅姊妹们就可以饮得更安心放心啦～
冲泡嘅过程都十分简单，只需要倒入茶包及奶茶粉包，然后加入适量热水摇晃均匀，一杯香喷喷嘅奶茶就诞生啦！小编今次就帮大家试咗牛乳茶系列，分别有四种唔同口味！
木马逐风 ishake网红手摇奶茶 ¥59 (6款)
牛乳茶系列：
1. 抹茶牛乳
身为抹茶控嘅小编最期待就系抹茶牛乳口味，但系抹茶味并不突出，只有淡淡嘅抹茶味，相反牛奶味较浓。口感尚算顺滑，但饮前记得要摇均匀，如果唔系会饮到未摇均匀嘅抹茶粉。
2. 苿莉牛乳
加入热水后首先就闻到香喷喷嘅牛奶味，饮落口就即刻饮得出淡淡嘅茉莉花香味。可能因为低糖嘅关系，味道上亦唔会太甜，饮得出茶香味。小编私心认为呢款最好饮，会再回购～
3. 薄荷青汁牛乳
虽然呢款奶茶口味叫做薄菏青汁，但除咗奶茶颜色上系青绿色以外，味道上实在试唔出有青汁味。反而薄荷味十分突出，饮落口有薄荷清新凉凉嘅口感，非常特别，令奶茶整体嘅口感更添层次感。
4. 姜汁牛乳
扭开盖后姜味扑鼻而来，第一啖入口奶茶味比较重，慢慢地姜汁味嘅后劲就开始涌出嚟。如果平日钟意饮开姜茶嘅你哋，一定要试试呢款啦！
除咗手摇奶茶外，木马逐风仲有得买即冲茶包，同样都系标榜天然无添加，每一小包茶包热量只有10卡路里咋，啱晒钟意饮茶养生嘅你哋～ 而且木马逐风嘅即冲茶包包装颜值十分高，包装系简洁素雅纸盒设计，无论系自己饮定送畀朋友都一流！
1. 白桃乌龙茶 14包/盒 ¥39
木马逐风饮品销量第一位就系呢款白桃乌龙茶！茶香味浓郁但唔苦涩，茶中仲飘出淡淡嘅桃香味，三款口味之中呢款系小编嘅最爱！
2. 奶香椰子乌龙茶 10包/盒 ¥39
茶包里面特别加入咗日本低卡金平糖，热量只有普通砂糖嘅10%，可以唤起椰子果香味，令椰子香味更重。而且小编实测咗用冻水冲比用热水冲更好饮，大家都不妨试试冷泡方式。
3. 奶香椰子红茶 10包/盒¥39
呢款椰子红茶嘅茶味比较浓，味道上会稍为苦涩，爱好清淡嘅你哋可以选择乌龙茶口味。
另外，小编仲淘咗由日本伊藤园出品嘅摇摇绿茶，呢款摇摇绿茶有趣之处在于未扭开盖前樽身内只装住清水，但当你一扭开盖，盖顶内嘅绿茶粉就会自动倒入樽内；然后上下摇一摇， 等绿茶粉同清水溶为一体就饮得啦！而且绿茶粉系用日本本土绿茶粉，无添加蔗糖、零脂肪。如果你都系一位抹茶控，就一定要试试啦！
伊藤园网红绿茶摇摇乐 ¥15.8
(产品资料以官方最新发布为准)
(文章纯属作者个人意见，不代表香港01立场。)