【来稿】上水人夜归手记　两点开始等车，返到屋企𠮶阵系日出

一班人聚会，预咗大家玩得夜，所以基本上大家都会拣旺角、尖沙咀或者铜锣湾呢啲交通方便嘅地方。而因为大家都好关顾我，知道我都就嚟住到返大陆，多数都唔会咁残忍要我过海，而系好sweet咁约喺旺角。但即使系咁，每次同朋友分别之后、到返到屋企之前，𠮶段时间一般都足够我反思自己成个人生。
最近有区议员争取北区增加通宵巴士，有啲人就觉得无呢个需要，因为北区都有通宵小巴啦。所以跟住落嚟我就介绍下，一个上水人深宵由旺角返屋企，可以有咩选择，同埋呢啲算唔算系选择。
撰文：边境人

选择一：的士

其实呢个对我嚟讲就唔系选择嚟嘅，因为由旺角搭的士返上水，起码都要接近300蚊。本人就是一名穷L，次次玩得夜就搭的士，sorry，我真系唔舍得。

可能有人会话，旺角有泥鯭的嘛。系，不过泥鯭的其实系唔合法嘅（而且大学生时期，真心，连搭泥鯭都有少少肉痛）。如果有足够嘅通宵车，泥鯭的点会做到风生水起、几分钟就上满一架开得车？

选择二：小巴

啱呀，旺角系有小巴返上水呀，不过无论系上唔上到架小巴，你都注定要经历一连串嘅挣扎同考验。

首先，搭红Van嘅话，条龙系会短少少嘅，不过上咗车之后呢，佢系会兜中大、大埔公路沿路嘅所有屋苑、大埔市区、粉岭、联和墟……当小巴喺上水警署对出个回旋处兜第二个圈时，恭喜你，你终于开始入上水喇！

不果如果你搭绿Van嘅话，相信好多北区人喺排队期间，都有经历过究竟放唔放弃嘅内心挣扎，而呢个挣扎可能系会维持一个钟以上（因为你仲未上到车），到你上到车𠮶阵，你嘅内心可能充满悔恨同愤怒，但最大嘅都系无力感，因为你已经攰到虚脱。

话说大学时期，成日都会因为搞活动、开会、同朋友聚会等等，搞到两、三点先返屋企。到大家去到旺角解散嘅时候，我嘅噩梦就开始。我一般都会去搭唔使兜埋大埔嘅58S通宵绿Van，但多数你未去到小巴站附近，已经见到龙尾。

无尽的等待与内心挣扎

如果系星期五、六、日凌晨一点左右呢啲高峰时段，通常人龙系最长嘅。条队转两个弯、排到去快富街都试过，咁大约等十部八部就会上到车，但问题系啲班次系无固定嘅，一切由站头个阿叔主宰。有时佢会行埋嚟安抚我哋话好快有车（但可能大家价值观唔同啦，好快都至少要20分钟左右先有一班）。上咗16个人，我终于转咗弯见到OK便利店。

见到隔离线去大埔𠮶班通宵小巴，条龙郁得好快，迟过我嚟嘅大埔友都上晒车，有时仲要系小巴等客，但北区呢边仲系一架车都未返，会开始有啲心理不平衡。

等咗接近一个钟，一般都去到168大厦出面㗎喇（但仲未转弯望到旺角道嘅站头），我开始收到朋友喺whatsapp group讲低大家已经返到屋企、互报平安嘅讯息。

放弃与不放弃之间

最后一段路先系最难挨嘅，有时明明已经见到曙光（个站头牌），但成半粒钟都未有一架车返嚟，感觉自己嘅命运只能够被人支配。试过有个女仔顶唔顺，离队嬲住咁逐个问我哋夹唔夹的士，但一众嘅穷人（包括我）考虑到返一程屋企要畀多一百几十蚊，加上心存一丝侥幸，觉得等咗咁耐应该就嚟有车啩，我拒绝咗佢。最后佢愤而一个人跳上咗架的士，而我哋嘅等待依然没有尽头。

以上呢啲内心戏，我由大学时代到出嚟做嘢头一两年，上演过无数次。喺漫长嘅等待中，由焦急到怨恨点解仲未有车，有时甚至开始自我怀疑：咁大个人都仲要搭小巴系咪好废？其实我系咪要转下份工？

有时人龙无咁夸张，但其实可能系一个陷阱嚟。试过两点同朋友喺旺角聚会完，见到条小巴龙好短，预计第二班车就上到。满心欢喜跟队，点知第一班车等咗45分钟。

第二班车嚟到，我终于上到车，但已经系再一个钟后嘅事。即系等咗差唔多两个钟！结果返到屋企光速冲好凉、挞落张床𠮶阵，我听到清晨嘅鸟鸣声，望一望个钟，已经接近5点。

最后选择：巴士

其实真心，以上情况近年已经改善咗好多。因为由2013年中开始，九巴开咗条270S线，由尖沙咀返北区，初时尾班车系凌晨2点，后来开多一班2点半。就系咁，我唔再需要屈服喺钟意就畀车你、唔钟意就一个钟都唔嚟一班车嘅小巴之下。

不过有时OT完好饿，同同事食个宵夜吹两句水，就唔小心过咗钟，搭唔到尾班车。所以如果北区人可以有架真正嘅通宵巴士，会系几感动嘅事？