【武术01】香港几时先可以有光剑比赛呀？

话说《星战》新三部今年就会迎黎终章，系时候同大家讲下一个我一直都好想参加嘅比赛。

就系光剑格斗比赛！唔讲咁多，去片先：

搞呢个比赛嘅组织叫LudoSport International，佢哋亦有整自己比赛用嘅光剑。无错，成件事系十分傻，同时又十分青春嘅。其实，又有边个睇过星战嘅人，会无幻想过自己用光剑同人格斗呢？一世人，就系应该揾机会做下呢种事。话晒都系运动，总好过成日坐系到睇电视唔郁卦？

讲返条片，可以见到落常转转下先斩，系会输俾正正常常用剑嘅人。不过，你玩得光剑，好心你都转返两个剑花先啦！比著我，玩光剑一定舞来舞去，赢输其次，最紧要型。

你睇返佢哋官网，仲写埋有七种剑型，即系唔同打法，右面仲有数值表：力量呀、防守呀、速度呀、不可预测度呀、仲有需要嘅体能，件事真系十分之打机，十分之中二病。但系大家要知，首先，呢七个剑型（战斗形式），星战入面系有嘅，唔系佢哋自己作；第二，其实都几型几开心丫，正所谓人不中二枉少年嘛。

（维基百科：中二病是源自日本的互联网流行语，泛指一种自我认知心态，用以形容一些经常自以为是地活在自己世界或做出自我满足的特别言行（多数处于青春期）的人，青春期特有的价值观的总称。）

而佢哋并唔系唯一玩呢种运动嘅团体，Golden Gate Knights、The Saber Authority、New York Jedi、Terra Prime Lightsaber Academy都系呢几年兴起玩光剑格斗嘅团体。 虽然我已经唔再系少年，但其实都仲有颗年青嘅心。香港有嘅我一定会参加。

盲人武术

最后讲两句《侠盗一号》，唔想spoiler，只讲下甄子丹。

当赤手空拳打十个又试过，唔畀用脚打外国人又试过，拳王泰臣都打埋，当大家烦紧下集叶问喺地球已经无晒对手，仲可以打咩嘅时候，甄子丹就喺宇宙另一角落打紧白兵。

戏中佢做一位盲嘅武者，喺大家都用激光枪嘅时候用枝棍（其实系杖）打人。本来个角色唔系盲嘅，系甄子丹觉得盲嘅话更合乎剧情需要，结果就变成大家睇到嘅样。

可能一望盲嘅武术家就会谂起《盲侠座头市》，但其实现实中，亦有好多视障人士去学武术。最为人熟知就一定系残疾人奥林匹克运动会入面有嘅盲人柔道比赛（唔一定要全盲，视障人士都可参加）。

香港都有呢方面嘅运动员：“盲佬”自白：因为柔道，我才走出盲人圈子！

上网睇返，不同武术都有视障人士参加。学武术可以有好多理由，为搏击、为嗜好、为健康、为型，全部都系好理由。同时，天下武术／运动如此多，总有一个岩你。

今次系咁多！

（本文纯属作者意见，不代表香港01立场。）