适时放低自我与保持原则如何平衡？中层温提血气方刚女生4大错误

本来，过完年系转工高峰期，但香港而家咁嘅环境，唔畀人炒都算好运了，或者衬呢几个月研究下点改进自己。另外有无啱啱毕业嘅女生惊紧难揾工？以下有几种情况，都系职场新人易犯嘅错，快啲检讨下自己中唔中。

踢一踢先郁一郁

唔该你记住，返工唔同返学，公司请你返嚟系做嘢唔系学嘢，出粮畀你系因为需要你去解决问题，而唔系报告问题。

话说公司大约12月尾𠮶时出现危机，运用接近八成资金入错咗一件有毒产品，同事Cherry系负责Crisis Management（危机管理）嘅，老板叫佢尽快交个解决办法出嚟，等完又等、等完又等，Cherry竟然话不如将啲有毒产品如期推出市场，然后叫Marketing同事出广告叫顾客唔好惊，只要唔惊，个问题就唔存在喇。

老板当然听到哑咗，好彩有其他同事帮手，有人提议不如揾专家研究下件产品有几毒、影响有几大，拎咗数据再睇下有无得加其他成份补救？期间问银行借钱周转下？虽然同事提出嘅解决办法未必系完美，甚或有可能失败，但个Project主要负责人系Cherry，而其他同事帮手，呢啲叫“主动”，返工系要主动架，唔同读书，等老师派功课畀你做，唔派Job你就坐喺度。

做嘢唔系做咗嘢就得，要做啱嘢、及时

虽然你返工系有Output，但“交咗”系唔够，对自己有啲要求，交啲好嘢出嚟，同埋唔该喺Deadline前交吖，因为你交完之后，仲要时间畀老板Comment，其他同事都要再跟架，唔好剩系谂自己，谂个大局，预松啲时间畀其他人做嘢，咁先帮到公司赚钱。

入错有毒产品系大获，但早啲讲，比时间其他同事帮手谂办法嘛。

适时放低自我，配合团队

成间公司咁多人，每个人都有自己谂法，夹得好就一齐赚钱，夹唔到就日日明争暗斗，心思花晒喺斗争之中，无人有心机做正事，所以Team ｗork真系好重要。就算你系想上位，都应该由Team ｗork之中突出自己，而唔系自己有自己行，唔理其他人意见。一大班人都同你讲向左行系啱，偏偏你就向右行，咁样唔系叫做带领团队，咁系整沉条船呀。

真系唔识就揾reference啦

老板叫你交桥，个重点系交条“好桥”！你自创到就当然最好，谂唔到？问人啰，一人计短二人计长，问下身边有无同事朋友做过差唔多类型嘅Project，叫佢哋畀啲意见你。无人肯帮你？咁唯有抄啦，上网睇下其他公司的网页、新闻，拎咗人哋优点再改良，老板锡晒你啦。

如果你都系唔明，就回忆下细个系点样抄功课嘅？点样抄得嚟又唔比老师发现？唔好抄足啰，改少少就大家欢喜。咩话，你无呢类回忆？因为你年年考第一？咁……