年度绩效关键　着错衫、唔搞关系是双输：打工唔同结婚　唔使专一

职场自保之道

部份公司会喺过年前后要求部门做appraisal，以决定来年加薪／加辛的幅度，各位打工仔应该明白appraisal并不客观反映每个同事的能力或付出，正所谓“识人好过识字”，上司钟意你就帮你写好啲，不咬弦的话就只有“加辛”的份儿。“如何打好一份工”涉及好多因素，但有啲基本嘢万变不离其中，学识咗，期望2020年行得顺利啲。

作者：诗宁

建立良好形象

细心数一数，能得老板心嘅人除咗擦鞋叻之外（另一个说法系识投老板所好），仲有一个共通点：自信满满！无论佢做得好唔好，佢都将啲嘢好有把握咁present出嚟，即使佢做错事，亦系用好肯定嘅语气解释返件事。其他人听落去，自然觉得呢个人头头是道，所以形象是很重要的。　

好少打工仔会话“返工令人好开心兴奋”，但都切忌阿愁上身，唔好畀人一睇你个样就知你唔想返工，咁样就算你几落力去做好件事，只要有少少唔合老板心水，佢都会认定你系返工唔开心所以无心机做，怪你搞到件事唔成功。我都唔想认同，不过，职场真系咁肤浅架咋，肤浅到你每日著咩衫都影响你升迁。

【点图即看】即睇女生返工穿搭宜忌 ==>

能力要畀人睇到

想职场之路行得顺畅，工作能力可能只占50%，如果你自觉已有本事拎尽呢50%，下一步就要谂下点样将呢50%放于高层眼前，畀真正话到事嘅人知道你存在，知道你好帮得手、有好多绝世好桥畀公司。

同直属上司打好关系可能只帮到你避开啲麻烦人事，但未必足以为你带嚟好消息，当你帮直属上司解决难题嘅同时，都要畀上司个上司知道功课系你交嘅，例如Email要CC埋畀上司个上司、有大Project时乘机开个工作WhatsApp Group之类。

最少两个势力做靠山

一间有咁上下规模嘅公司总有唔同势力，如果你对上势力强大，当然有助你平步青云，但局势变幻莫测，今日得势可能听日就跌落嚟，亦间接令你失去背后助力。

打工唔同结婚，唔使专一的，同Team A个Head食饭，都可以约Team B个Head Happy Hour，担心咁会令两边Team Head反感？做得Team Head，你估佢当年无做过呢类“醒目仔／女”咩，佢点会唔明你用意吖，我叫你同人熟，无叫你出卖人交换情报，千祈唔好乱做无间道，纯粹畀多个势力人士睇到你嘅能力同智慧，万一有日同其中一个反目，都仲有多一个选择畀自己。

（文章仅代表作者立场；题为编辑所拟。）