【九龙不败．影评】魔幻就可以尽情无稽？　陈果不败定“毕”败

自从拍出一部《那夜凌晨，我坐上了旺角开往大埔的红VAN》，令众小说迷极度不满后，陈果在观众心目中一直处于又爱又恨的拉锯。年头以一部《三夫》，带住女主角曾美慧孜横扫不少电影奖项，似挽回不少声势后，陈果就是个不甘平凡的人，一个转身又整多部《九龙不败》出来刺激观众神经。电影自上画以来遭到爆闹，论据主要都系话剧情荒谬、对白胶到错晒、打斗场面唔好睇，就连结局都胶得彻彻底底……究竟系套戏真心胶，定系艺术层次太高大家攀唔起？

首先呢套《九龙不败》都拍完好耐，一直未能上画，官方解说是CG太多好花时间，如果你有睇套戏，CG场面确实好多，不过画质方面又唔似经年累月之作，相信最花时间挣扎的，应该系套戏到底点剪好？

即系咁，电影公司揾得张晋开戏，好明显系想拍一部动作片，最紧要系打到飞起！暴力啲，血腥啲都唔紧要。不过叫得陈果操刀，就预咗非池中物。纵使大家要求的动作场面应有尽有，但“耳目一新”的贯穿手法，就是叫人睇到一头雾水。

注意︰以下内容含剧透

结怨深到见唔到底

就先讲动作场面，张晋的终极对手系冼力山，由拳王Anderson Silva饰演，要营造二人结怨，先要好深的仇恨，呢个亦系全片一步步发展落去的悬疑位，好可惜呢个位悬到一直半天吊。原来二人陈年分别代表过港澳警队，打过一场拳赛，冼力山在阿仔面前输咗不特止，班港女警仲指住个细路笑佢爸爸冇用，笑到佢嬲嬲猪，返屋企途中突然落车搞到被车撞死。

就因为咁，冼力山对张晋恨之入骨，于是进行连环杀害女警案。明明嬲嘅系张晋，又好清楚佢守边个环头，偏偏就整场大龙凤去搞女警，为的，就系要剧情有意想不到的悬疑，制造烟幕，可惜最终悬到大家得啖笑。

对白意淫最爆笑

宣传方面已经好聪明，讲明系一套魔幻动作片，所以入到场，听见张晋话自己因为细个见过九头龙，仲同佢嬉戏一轮，都唔会感到惊讶。而这个遭遇就深深影响张晋，不单对条龙念念不忘要纹上身，仲凝住佢会不断赐予自己力量。又唔知点解呢个九龙纹身全城都知，人人都想望一下，连戏中饰演中医的刘心悠都心郁郁。把把下脉，眼神暧昧地扫对方一下说︰“可唔可以俾你条龙我把下？”到底系讲身上个纹身定另有所指？

其实心悠“追龙”之心并无停过，随后再有机会单独相处时，再向张晋提出等价交换︰“不如我俾（心口）你睇先？”好明显系又一次性暗示，不过编剧都系高手，为营造出张晋高窦，带出神女有心，襄王无梦的意境，就赐予张晋一句︰“𪠳！飞机场有咩好睇？”将对方荡漾的心一下止水。用到呢种手法营造二人关系，真系细胆啲都写唔出。

魔幻都遮掩唔住嘅无稽

睇到呢度，唔好以为心悠的锲而不舍纯粹因为春心荡漾，原来系铺紧一条最大的伏线。就在二人再一次见面时，心悠在冇提出“睇龙”要求下，反而自行剥衫造就一个“坦胸露点”画面。你正兴奋心悠终于肯为艺术牺牲？错喇，原来心悠在戏中有家族遗传乳癌，病发时索性切了两边乳房，所以除完衫一拧过来，得出一个平板效果。

呢个场面太震撼，跟当日剧集《踩过界》的陈庭欣变性人造型一样，不过更青出于蓝系，心悠连心口两点都被捽走埋，场面爆炸！咁乳癌同鼓励张晋俾条龙佢睇又有咩关系？其实去到呢度都冇再深究，又或者当下脑袋被冲击得一片空白，补充唔到，当时已变成但求有源源不绝的笑料送上已经好满足。

全片100分钟，唔知头唔知路入场的话，好肯定睇到一半已经想爆句︰“我净系想睇一部简简单单嘅动作片啫！”即使你袋住“魔幻”二字入场，感觉都唔太良好，即系魔幻都要有个谱，去到尾段九头龙现身把弄洗力山一幕，掉番佢上岸一幕已经系胶到冇幻想余地，佛地魔都唔够你玩。但可以肯定，以当下观众的极端反应来看，《九龙不败》绝对有机会问鼎2019年Cult片王。