【九龙不败】张晋打到刮甩层皮 陈果想转拍主流︰我都要揾食
由陈果执导、张晋、Anderson Silva、郑嘉颖、刘心悠和邓丽欣（Stephy）主演的《九龙不败》今日（20日）上映，早前导演陈果和张晋抽空跟《香港01》做访问，大谈当中拍摄过程的辛酸和构思。
摄影：叶志明
最辛苦系除衫拍打戏
张晋拍过大大小小不同的打戏，问到他今次最辛苦系边一部分，他笑指：“要除衫打应该系第一次。”陈果补充：“最惨系除衫打。”他继续解释：“一来唔带得pad，又惊纹身会甩就算抖个时都唔着得衫，我哋拍澳门铁塔外景时，系圣诞节都好冻，唯有暱入帐篷去避风。”
最大挑战的一幕戏
张晋在访问中提及自己有一场戏印象很深：“我记得有一个镜头我哋喺绿布景拍，系灯塔那场，首先Anderson已经出咗去，而我要撞玻璃出去再碌去尽头，望下去好高好惊，跟住企返起身。呢个镜头一撞出去还要滚嘅时候，一定要啱啱好滚到去个边缘位，总共应该拍咗21个take。有一次Dee哥（董玮）和导演都收货，但我成日觉得好似争啲，想再险啲，想半个身同一只脚吊咗出去，再爬返上嚟，咁我就话再俾多次机会我。之后我再叫武师放多啲威吔俾我，结果就跌咗落去，其实下面有好多条铁柱，好彩头冇撞到，但我感觉到右脚好似俾火烧一样，原来是身上的4条威吔，滚一圈就俾威吔缠住，结果成层皮刮咗落嚟，就算着住裤都冇咗层皮，可想而知。”
陈果补充：“呢幕的确系最难，所以想在动作上俾到新意大家，时下的动作片都好鬼劲，去到愈嚟愈难拍，好多嘢都有人做过，实际上喺香港拍返出嚟都好难，剧本写出来又唔知拍唔拍到，好多时都会有呢个问题出现，不过我哋都好okay，整体上都完成咗剧本上嘅嘢。”
陈果拍《九龙不败》救突破
陈果继《三夫》后再推出新作《九龙不败》，不过《九龙不败》是一套科幻犯罪动作片，跟他以往的风格有很大分别，他解说：“最想系有个突破，不过唔知成唔成功，要等观众去评论，其实《九龙不败》都系一个警匪片嘅基础，如果唔谂多啲以外嘅嘢就好死板，无乜突破性。今次老老实实都有啲叫做踩钢线，一般人睇警匪片就系咁啰，好实净嘅故仔，贩毒、杀人放火、查案，我就觉得可以多方面啲，加入不同嘅元素，希望有小小唔同啦，等你睇戏先会知咩事！”
陈果：对唔住我要揾食！
最后陈果更讲到自己接下来的计划，他：“希望在《九龙不败》后拍返多啲主流戏，我觉得主流戏都几好玩，虽然有时唔系咁容易去做，依家支援比以前好咗，我觉得我拍动作片有小小上咗瘾，因为拍动作片时导演坐喺度就得，演员就辛苦啲，可能好似晋哥咁讲‘啊，又打？’佢就会痛苦啲。希望可以拍多啲主流戏，多啲观众，呢个系对自己嘅改变，而且改变都好大啊，我啲粉丝可能会闹我，但无办法对唔住我要揾食啊！”
张晋笑言：“咁你拍文艺片嘅时候记得揾我！”陈果解释：“文艺片好啊！不过啲文艺片好惨㗎，又要咁又要咁，佢实质上唔比你舒服得几多㖞！你睇《三夫》女主角又要上山又要识做，又要落船又要识做，真系好痛苦㗎！”
鸣谢
化妆：JulieH @ J Lab（张晋）
服装：EVISU（张晋）
鞋：BALLY（张晋）
场地：Chill Hea Party