【情人节】相恋七载女友愿挨㓥房 “毒男”陈泽滔叹对她有所亏欠
常被外界认为是“毒男”的陈泽滔，却有一个低调的女友。身任东九龙社区关注组召集人，现时在迪士尼工作，他拿首付去选区议会、立法会，选了一次又一次，现时与女友齐住㓥房。陈泽滔慨叹“如果唔系选举，会租到个好啲嘅地方住”。
求学时期的陈泽滔，切切实实是个毒男。中学读男校，即使对面街是女校蓝田圣保禄中学，他也没有在街头溜跶认识女生。
“真系无？”记者惊讶，“无呀，Christmas ball（圣诞舞会）𠮶啲完全无去过”。陈泽滔形容当年认识的朋友都较为纯情，大家都认为无特别需要认识异性，反而特别需要打机。“今晚返去又打喇，都系𠮶班中学同学”，他称，“打Winning啰！”中学只有打机、踢波、读书和打桥牌，“我系桥牌学会会长，嘻”。
那么总有同学能结识女校生拍拖吧？“都有friend成功沟到女㗎，我哋反而会耻笑佢”。
由男校到中大入读男女比例严重倾斜的计算机工程，继续毒男生涯。遇上自己不太喜欢的课堂，他会选择走堂，“咁咪返房打机啰，瞓醒就打，肚饿煮个面返嚟，又打。”大学生亦爱举办舞会，“都无join啲咩ball，自己都唔钟意，又唔系成日跳舞啲人”。身为毒男，他打趣道，“怕丑，见到靓女都唔会走埋去结识佢”。
表白三战两成功
虽说是毒男，追求异性经验不少，但成功率也有近七成；三次表白，两次成功。第一次，数个男女较为熟络，“我钟意其中一个女仔，点知佢又钟意（群组内）其中一个男仔。”俨如电视剧桥段，“男仔女仔就系咁㗎啦！”初恋女友是大学同学，year 2开始拍拖，“都系大O（迎新营）识，可以试咪试下啰！”直至七年前，到澳大利亚working holiday时，认识现任女友。
与女友相识过程，陈泽滔形容“系个几得意嘅经历嚟”。那些年到澳大利亚参加working holiday，在网上讨论区集合一堆在澳港人，“add MSN，大家喺悉尼，就约咗几个出嚟”。其中一人，网名是由数个英文字组成，陈泽滔不懂发音，询问称呼为何，对方回应女姓名字，才赫然发现对方是女儿身。“咁咪胆粗粗照约啰！”
之后陈泽滔再约女网友踩单车、行山，“人在外国可能孤独啲，想揾个伴一齐，所以容易啲（成功）”。那年元旦，他和女友在悉尼桥下看烟花，“咁就一齐咗”。可知道女友喜欢自己甚么？“可能都系无奈㗎咋，比人氹咗落搭！”
他笑说，“佢（女友）有时都问我，假如唔系喺working holiday认识，而系喺香港嘅地铁站撞到，会唔会有胆去认识我？”他又再毒男上身说“痴线㗎你都！三唔识七走埋嚟！”
与女友同住㓥房
女友与自己走过working holiday、预演占中、占领、区议会、立法会选举，到特首选委选举，陈泽滔坦言关注政治，会牺牲女朋友，“住屋上一定最大，如果唔系选举，会租到个好啲嘅地方住”。
读计算机工程，现时在迪士尼任工程师。虽然此工程师不同彼工程师，但两者都解决不到土地问题。女朋友是自雇人士，他俩现同居于㓥房，安乐窝连房间也欠奉。“有时就系要面对现实，大家而家会谂点样将啲钱运用得好啲，其实都系揾个地方瞓下觉、煮下嘢食、上下网”。陈泽滔对生活可说是无要求，女友亦有为生活改变，“佢要降低要求嚟就返我”。
曾经有报道说，陈泽滔把首付花在竞选上，“其实系买唔到啫……我拎住40万，知道会选，就唔会扔啲钱嚟买楼”，他亦透露女友间中和他开玩笑，“几年前又话买楼”。区议会及立法会皆未能成功当选，他参选特首选委时，女友亦有微言，“佢有话过我㗎，又选乜鬼呀！”陈泽滔笑言“我成日都同佢讲唔会再选㗎喇”。
拍拖七年 爱女友唔港女
面对肯和自己挨㓥房的女友，除了将首付花在竞选上外，自己有甚么做得不足？陈泽滔自认无心装载，“我本身唔系一个会记呢啲嘢嘅人”，大时大节的庆祝活动，就是买寿司和生蚝回家吃，“情人节我都未谂呀唉”，连女友也抗议他粗心大意，“女朋友话我新年都唔买啲嘢比佢拎返屋企，希望今年中秋记得买月饼啦！”
政治是妥协的艺术，爱情如是，生活也如是。拍拖七年，他与女友均“钟意卢巧音、钟意黄子华、钟意讲笑、钟意窒下人，呢啲生活上嘅小细节就几适合”。陈直言女友是理想对象类型，“非常之唔港女”，行文青路线，直言“女友有品味啲，对好嘅嘢要求高，我自己生存到就算，有嘢食，食得饱就得”。
访问地点马湾是他俩较常去的地方，因女友喜爱欧陆式风格，笑著说“好烦㗎佢！”虽说马湾常去，但其实亦有两三年无踏足。女友约他行山，他也拒绝，原因是懒，“好远呀，要搭车”。
“懒”得不愿出轨
陈泽滔这种懒，也是女友放心的一大来源。“一脚踏两船好辛苦个㖞，一个都已经要嘥咁多时间！”陈笑说。大慨女友也看穿他这种懒，他直言假若现时爱上一名超级美女，也未必敢放弃现任女友，“两个人相处唔系睇两个人有几叻、有几多身家，系真系顶唔顶得你顺。你已经唔会再有信心，又要再同新嘅人磨合，唔觉得会有一个人更适合”。
那短期内会结婚吗？他说两个人均无生育打算，结婚诱因不大，“而家咁嘅生活都OK，签个名个意义喺边？”又担心终有一日会因政治连累女友，“好似游蕙祯咁，随时比人告到破产”。
话说到最尾，陈泽滔欠女朋友多吗？“有……其实无得计”。他顿了一顿，“要喺个人生度揾到一个适合，又顶得顺你嘅人唔系一件好易嘅事，本身自己系一个奇怪嘅人，有人顶得顺你，都系一个幸运”。