【热评】乘客买平机票　无坐全程惨被告　汉莎背后理据劲吸嬲？

文：李声扬
早排报导过德国汉莎航空（以下简称德航）在德国嘅官司（编按：相关新闻连结位于此段结尾），告个客要佢赔钱，绝对奇闻，亦都影响好多人，唔好以为唔关你事。今篇讨论下系咩回事，影响有几深远，同埋我认为谁是谁非。

下载“香港01”App ，即睇城中热话：https://hk01.app.link/qIZYuEC5LO

唔想睇晒旧文嘅，畀个懒人包你，出事个客张机票系“挪威奥斯陆—德国法兰克福—美国西雅图”嘅来回。畀人告佢，因为佢回程法兰克福落咗机后，无坐奥斯陆𠮶程。

个客九成系德国人，至少系当地居民。其实系想德国美国来回，所以回程喺德国已返埋屋企，由得最后一程作废。点解咁做？好简单，因为平过就咁买来回。点解会平啲？可以话系公司嘅漏洞，或者话因为供求，挪威去美国𠮶程无乜人坐，所以平卖，有人叻仔钻到空子。咁最初佢点上机？九成系买张廉航（应该唔系德航），单程德国去挪威上机—留意呢点好重要，下面会再讲。

点解我咁清楚？因为，我都试过做类似嘅嘢。唔讲边间公司，废事畀人追数。　

实情好多人都知呢个“漏洞”，甚至用过。上网揾下“台港欧”之类，大量资讯教你点玩，好多旅游Facebook群组亦有教学。

以下我就用台港伦，台北—香港—伦敦来回为例，等大家亲切啲。首先，咁样买台港伦，有时会平过你就咁买香港伦敦，原因上面讲咗。但都仲未够，你仲要买一程机票（或者坐船，你钟意啦）去台北。你问点解？唔系香港上机然后回程香港落机就得？梗系唔得。你张机票台北出发，你无上机嘅话，除非公司走漏眼，否则我保证你喺香港唔会上到机，成程都会作废。但有时计埋你要买张单程台北，都仲系悭到钱。

只要键入“台欧港”、“港欧台”、“港欧上”、“港欧广”等字，即可以在搜寻器中找到大量相关结果。

另外，你见原文有提，啲人多数无行李寄舱，因为怕回程件行李直送台北。但以我所知唔系咁，最后𠮶程香港台北，可以隔几日甚至十几廿日，航空公司亦乐于畀你中途拎件行李，喺伦敦讲定就得。至少我试过得。

成件事就系咁，德航唔抵得个客悭咗钱，同时间最后一程吉咗个位，明明可以卖，见财化水，就走去告个客违反合约，要补差价。咁都得？最初在柏林法院败诉，法院话唔知佢点计出嚟，但德航再上诉，会再审。呢个判决影响会好大。

德航嘅动机相当明显，拎返啲失去咗嘅收入，防止你哋“滥用”，杀一警百。理据好简单，条款写明。咁佢哋大公司咁大嘅律师团队，当然谂过先会告。事实你睇真啲机票条款，只字细过芝麻嘅条款的确系有讲嘅。真系做“法治精神”塔利班话“尊重合约”，理应告得入，所以我几奇怪最初会败诉。

不过记住，法律系死嘅，人系生嘅。你有条款唔系大晒，而家呢个世界有舆论压力，个个识上Facebook投诉，识去官方专页炸你版，行家亦乐于抽你水。

航空公司定价向来极奇怪（有兴趣可以上网揾If Airlines Sold Paint嘅文），同其他行业完全唔同。但今次都真系太过颠覆常识了。因为事件在德国先无乜人关心，换着国泰喺香港整单咁嘅嘢？几十万人又出嚟讲公关灾难又炸爆版喇。而我肯定间间航空公司都等紧呢个判决。

德航咁告个客，系完全打破消费交易嘅惯例，难免畀人觉得违反常识。一般人嘅理解，我消费，唔系买个产品或服务，而系买咗个权—我畀钱买咗飞睇戏，我可以唔入场，老子有钱，吹咩。我叫咗个餐，我照埋单，我可以唔食。你到时入唔到场或食唔晒，无可能叫戏院餐厅回水，同样地，我买咗飞唔入场睇戏，我食咗两啖有急事要走，你有无可能另外再罚我？哦，你原本可以卖咗我个位？咁都得？

正如网友评论提到，你去快餐店，有时只系想食汉堡包加汽水，员工都会（主动帮公司倒米？）提你叫个餐仲抵。咁我就叫个餐，然后唔要包薯条，唔通快餐店又几日后追我差价？我唔食鸡，但你叉鸡饭特价，平过叉烧饭，咁我叫个叉鸡饭唔食啲鸡，你又可以迫我食晒佢？条款还条款，道理上似乎几难讲得通。

更唔好忘记，其实航空公司向来都超卖机位，呢个亦系几反常识嘅一样嘢，亦都成日畀人闹。大家觉得根本你就可以卖走最后𠮶程—但戏院总唔可以超卖。航空公司系占唔到道德高地嘅。

解决方法？我估系无嘅。一系，一早收订金啰，你最后𠮶程有出现我先退返畀你。佢扣起你旧钱先，就易搞好多。但，我估实有对手唔行呢套，用呢个机会抢你生意—就去到第二个方法：我估总有啲公司manage得好啲，大约计到或估到边啲人最后会唔出现，然后最后𠮶程咪超额卖啰－睇死你唔会出现喇。仲有一招，听闻有航空公司都做紧—就系，罚个卖飞嘅agent，你帮个客咁买我就罚你！一样系罚钱，但唔搞着啲客，要中间人硬食啰。但如果系官网卖我就唔知点算啦。

仲有一个教训：其实呢啲漏洞过去几十年有，点解而家先畀人告？倒唔系德航人穷思旧债，而系因为资讯流通。以前可能得几个天才知，私下传畀朋友。而家个个大模斯样一传十十传百，仲开埋专页呃traffic，咪有人做嘢啰。

所以呢句可能令读者反感：但有着数，真系未必应该太过广传出去。呢啲嘢扬咗，最后大家都无运行。

Facebook：Ivan Li 李声扬 - 华丽后台

（文章标题由《香港01》编辑所拟。文章纯属作者意见，不代表《香港01》立场。）