【热评】政府年年派$2000　阿叔公开谈论用医疗券买伟哥……

文：陆小菲
小菲𠮶日陪朋友去探阿婆，阿婆行得走得煮到一台畀我哋食，但系成台有成五、六包中医药包。我问婆婆系咪有啲咩唔舒服无出声，点知佢话：“无呀，我调理身子咋，我啱啱够秤用医疗券嘛，啲老友记教我㗎，唔用过期，个政府难得有著数畀我哋香港人，唔用嘥晒。我都系睇中医咋，佢哋（指教佢𠮶啲老友记）买花胶、补品添啦。”佢讲我知，医疗券最多可以累积到5,000蚊[1]，如果无病无痛斋储就等于益咗政府，与其畀佢赚，调理唔到个政府都不如不如调理吓自己。

接著第二日小菲就响西铁听到两个阿叔高谈阔论讲吓伟哥边只好。大家异口同声都系百零蚊𠮶只唔掂，要买三百几𠮶只先有效，大约半个钟到，佢话万x要医生纸先买到，出去药房买就不如去医生度买。“医生食水深好多，出面买至少平几十，医生实赚你，但医生度可以用到医疗券嘛”、“你又啱呀，食一次玩得半个钟。唔用医疗券真系肉赤”、“半个钟，唔算耐”、“我同你呢啲年纪，唔用起唔到添呀”、“心脏有咩所谓，买完上去慢慢玩”。虽然阿叔对话其实各有各讲，但小菲都听得出佢哋无病无痛时医疗券的最大作用系买北上欢乐嘅道具。

其实，政府喺2009年开始就实施医疗券试验计划，当时50蚊一张，70岁以上每人5张。2013年加到1,000蚊，2014年追加到2,000蚊，当时最多累积4,000蚊。其实好似你打工仔储假咁，如果储埋唔用，同无畀假你无分别。啲老友记好醒，调理吓自己，调得几多得几多。

01观点早就有讲过，医疗券嘅普及同投诉成正比，食物及卫生局收到嘅投诉涉及怀疑诈骗和不当申报医疗券。当中4大落搭的普遍过案有四种：都系啲强身奶粉呀、贵价老花镜、养生参茸海味，同埋见你用医疗券就开天价杀你一颈血𠮶啲啦。但正所谓你精我都唔笨，虽然话奸商同无良医生做法违背医疗券原意，收取歧视价格；但事实睇到老友记自己都好识利用。

[1]喂，话时话，估唔到啲老加记追得几贴市。其实都系上年年中先将受惠合资格年龄由70降到65，啱啱今年先将累积由4,000蚊提到5,000蚊，估唔到老友记睇新闻追得紧过自己。

Facebook：陆小菲 Fifi Luk 与某种忧郁的声音

（文章纯属作者意见，不代表香港01立场。）