【热评】叫“名店街”做“狗屎街”　蜑家妹同你图解铜锣湾避风塘

文：蜑家妹出走记
阿妈话，最怕我细个开始识讲嘢𠮶阵每事问，成日唔系“咩嚟㗎？”就系“点解嘅？”。点知，佢呢个恶梦，竟然喺三十年后又发生；今次，仲要全家陪玩。
早前我响外国某香港历史网上资源库揾到呢张图片，当然即系捉住老豆妈子姑姐叔叔舅公姑婆etc问一大餐，尝试整理一幅“一眼睇晒铜锣湾水上图解”。

下载“香港01”App ，即睇城中热话：https://hk01.app.link/l7U1Y7t5LO

1. 太平山 
阿妈同姑姐都话，以前无咁多高楼大厦，佢地喺艇上面可以清晰睇到山顶缆车上上落落。 

2. 西高山 

3. 大坑
传说中嘅大坑出海口，原来就喺呢度——即系而家告士打道天桥连接高士威道一段。阿妈同阿姨细个𠮶阵，经常“摇”（橹）船仔上大坑，去糖厂（即现在糖厂街）买牛奶同买冰。

4. 刚填海建成的维多利亚公园 

5. 百得新街洋楼
住洋楼，养番狗——点知搞到满街狗屎；铜锣湾水上人戏称今日嘅“名店街”做“狗屎街”

6. 红磡海底隧道的填海工程 

7. 吉列岛，古称灯笼洲

铜锣湾水上人称之为“洲仔”，（皇家）香港游艇会所在地

返归啦 ：
A. 太嫲只船
B. 阿爷（连父亲大人一家八口）嘅家艇
C. 妈妈嘅舰队——一个大家族十几廿人点样一齐住？就系靠连环船啰！何家嘅船队包括： 
- 3艘起居艇 
- 1只水艇
- 1只厨房艇 
- 1只柴艇
- 1只贮物艇 
- 2只“开埋”小艇；即运送人及物资出海（开）及靠岸（埋）嘅艇仔 
- 2只工作船；摇橹来往家艇及添马舰 （妈妈同其他亲戚嘅添马舰故事，有机会再讲。）

蜑家人唔只系“水上人”或“渔民”，佢地嘅生活同城市港口紧扣，睇下避风塘有咁多各式各样嘅船就知啦！

8. 长堤上1-3号街喉位置：接载游客去游河船（食避风塘美食𠮶啲）嘅小艇 

9. 长堤上4号街喉位置：接载游客去（皇家）香港游艇会嘅小艇 

10. 收费街喉

无咗街喉之后，艇户就要嚟呢度买水。点买呢？原来佢地要去筲箕湾海事处买水票，每张5毫子；水票交俾看守街喉水标嘅职员，就可以换领大约40英制加仑（约180升）嘅食水。

11. 经营“开埋”小艇的艇户 
 
12. 水上天后庙；而家仲喺度！

13. “耶稣船”：基督教会宣教船；长辈话每星期都有鬼佬牧师喺船上主持聚会，聚会之前仲会安排小艇接载避风塘嘅人上船。

14. 大名鼎鼎嘅避风塘“餐厅”兴记同汉记就喺呢度啦！ 

15. 几间水上士多

16. 歌郎船：蜑家人婚宴摆酒的场地

17. 油架船：好多进出维多利亚港嘅商船同战舰，会揾铜锣湾嘅蜑家人帮佢地修缮船身，特别系油返靓艘船；呢啲大型船只船身好高，所以就要喺小艇上面整一个特制嘅升降架，方便靠著大船补油漆 

18. 水上排：即小型水上船厂 

facebook：蜑家妹出走记 Strolling Tanka

（文章标题由《香港01》编辑所拟。文章纯属作者意见，不代表《香港01》立场。）