【热评】水曱甴系龙虾远房亲戚？　蜑家妹由细玩到大教你点样分

文：蜑家妹出走记
认得我耐嘅人都知道，我系会追曱甴踩死佢地嘅。重点在“追”字：唔系有只曱甴咁啱经过脚边吓到跳起然后咁啱踩中只狰狞小生物，而系见到疑似曱甴物体或听到有人惊恐尖叫就走埋去，证实系曱甴就一个箭步送佢一程。我之所以会咁做（经过长时间内心小剧场反复推敲），相信同两个童年深刻印象有关。第一个，就系细个唔记得几年级（我除咗识反驳老师，“鱼唔一定有鱼鳞”之外，都会乖乖听书嘅），又系上常识堂，老师讲人类滥用杀虫剂，迟早所有害虫如曱甴都会对化学物质免疫，要消灭害虫就唯有用手拍用脚踩。唔知点解由𠮶刻开始，我觉得自己身负重任，要保卫地球，就要靠自己勇敢同努力踩死晒啲曱甴。
另一个深刻印象，就肯定系同曱甴嘅水上兄弟——水曱甴有关。尽管我只系一个细个时part-time喺水上生活过嘅伪蜑家妹，不过我可以肯定咁讲，我见水曱甴嘅数量多过见曱甴。你有无见过水曱甴？我见过，我真系见过。

水曱甴系咩东东？平时你行过海旁，见到𠮶啲扁平长卵形，有点神经质、察觉到有人经过或感到有任何风吹草动，就会在岩石面或隙缝、或码头柱趸藤壶之间四处乱窜的小生物，就系水曱甴啦。不过水曱甴（sea slater）并唔系曱甴，更加唔系住喺水边或大海嘅曱甴，而系等足目动物（唔系昆虫呀！）。有好多人以为水曱甴系龙虱（diving beetle；又叫和味龙）；龙虱系又识飞又识游水嘅甲虫，同水曱甴系两种完全唔同嘅生物。等足目动物水曱甴即系咩呢？即系竹节虾、龙虾、长脚蟹等矜贵海鲜嘅远房亲戚。（有兴趣嘅朋友可以参考呢个网页：http://taieol.tw/pages/127722)

水曱甴其貌不扬，不过对于蜑家人同钟意“呔椅”嘅人嚟讲，系好有用嘅嘢——鱼饵。水曱甴走得好快，又钟意捐窿捐罅，点捉呢？呢个时候，又要靠特别技巧啦！前几回提到，我在8、9岁𠮶阵爷爷嫲嫲送咗只艇仔俾我地班细路。长辈教落：要玩就要负责任，于是打理呢只“探险船”嘅重任，就落咗喺我地身上。其实只不过系一只划艇仔，都无咩特别嘢要做，做得最多嘅，就系隔一个月铲船底——将艇仔底部嘅藤壶（蚝叔）清除。

为咗方便我地几只甩绳马骝安全又快手铲船底，长辈们会快手快脚将艇仔反转，擡上停泊嘅木浮桥上面，跟著我地就会攞住架生一拥而上（通常系一个cut开咗嘅四方形清洁剂或偈油胶桶，加一把油漆刮刀或刀仔，手套都无呀阴公），背后有嫲嫲大声打气：“快啲捉晒啲水曱甴呀！”话就话系劳动，但可以攞正牌揸住咁危险嘅工具，同啲水曱甴斗智斗力，都好好玩㗎！

其实喺只艇仔由水中被擡起反转呢几秒、电光火石之间，几百只原本响船底嘅水曱甴受惊四处乱窜，好多会跌落水然后游去旁边其他船嘅船底藤壶或浮桥木柱上，剩低唔敢跳海𠮶啲，一系跣落艇仔围边（因为有油漆面，佢地捉唔实，所以好难逃走），一系拼死抓住艇底藤壶。我地攞住把油漆刮刀轻轻一铲一拨，就可以将藤壶连水曱甴扫入胶桶入面。清理完艇仔，就会有一大桶水曱甴啦！

facebook：蜑家妹出走记 Strolling Tanka
 

（文章标题由《香港01》编辑所拟。文章纯属作者意见，不代表《香港01》立场。）