【热评】最大钻石公司De Beers卖合成钻石 唔怕整cheap自己？
文：李声扬小故事一则：李克勤有首歌叫做《婚前的女人》，系佢自己填词嘅。入面有句歌词讲钻戒，原本佢系填“大一点细一点没有关系”，结果佢老婆睇咗，话唔符合现实，帮佢改为而家你听到嘅“但卡数跟深爱是正比例”。之后好多年找亲卡数我都会听呢只歌。国泰航空最近好似转口风，话唔排除会搞廉航。呢个课题写过几次，唔想再重复，我见好多人话唔好自贬身价整cheap自己。读过下书嘅会讲Cannibalization，自己抢自己生意（但其实对手新加坡航空都系咁做）。而家又有个类似例子，更加震憾，震憾过LV卖红白蓝袋，或者米芝莲三星搞放题。最新消息系：De Beers打算卖合成钻石。哗哗哗，公司一直誓“石”劈愿唔会卖合成钻石。当然商业社会适者生存，死顶冇奖。但，搞乜？
对于好多人嚟讲，De Beers就即系钻石，事实亦都差不多。唔止系呢间公司靠钻石，其实应该话，钻石系靠呢间公司。
应该好多人听过“钻石悖论”：是咁的，冇水你好快就死，冇钻石你其实唔会死。水有好多用途，钻石基本上冇乜实际用途—但点解钻石贵过水咁多？
古旧理论会同你讲咩use value同exchange value嘅分别，但冇乜说服力。亦都有人讲呢个根本系伪命题，点解话钻石贵过水？唔同嘅东西用咩单位比？（但，有人提出，一公升嘅蒸馏水贵过一公升嘅石油）。再先进啲嘅理论同你讲稀有性，物以罕为贵。
好似系。但未系事实全部。钻石系咪好罕有？睇你点睇，但至少天然钻石应该系。问题系咁未解释到所有嘢。一只烧鹅得一个鹅头，但点解鹅脾值钱过鹅头咁多？除左睇供应，仲要睇需求。
史上最成功嘅行销计划，系将《爱情傻恋La La La》嘅肥妹李美林 ，改造成亚州性感天后Coco Lee。第二成功，就系De Beers主理嘅钻石行销。一句A Diamond is Forever，成功将一粒碳变为爱情嘅考验。中文版嘅“钻石恒久远 一颗永流传”更系佳作中嘅佳作。就咁，原本系上流社会睇下嘅一粒石仔，变成订婚求婚必买嘅东西，仲畀埋指引你订婚戒指要用三个月人工。
留意呢种“传统”又系商人创造出嚟。即使系美国，呢种传统存在都唔够一百年，在外国例如亚洲更加系冇呢回事。但成功嘅全球行销令到几十年间呢样嘢由冇人买变成必需品，你话劲唔劲？
钻石有乜价值？其实冇乜的。工业用途？唔好信，因为一早可以有合成钻石，一样咁好用，化算好多。反而人类仲未可以化算地合成到黄金同白银，所以黄金白银仲有工业价值。钻石够硬？关你鬼事咩，你屋企采矿的？钻石够靓？平N倍嘅方晶锆石（又称苏联石）一样咁靓，普通人分唔到。OK，你坚持话专家分到，“唔系同一样嘢”。咁又系返返去合成钻石—系同一样嘢，公司自己都分唔到—但好聪明地唔会拎出嚟卖。
投资价值？更加系笑话，亦系通过精心操作，你发现钻石系冇乜二手价值嘅—同黄金完全唔同。钻石同新车落地差不多，一到你手即时贬值一半。我冇听过咁荒谬嘅投资工具。
唯一嘅讲法，你当佢好似艺术品咁。梵高真迹得一幅，就算有一幅完全一样嘅都唔系佢真迹，所以好值钱—但，即使讲天然钻石都好，系日日都系咁开采紧㖞。
相当明显地，至少在过去百几年，好大段时间，钻石都系一个垄断市场然后聪明行销嘅游戏。钻石真系好罕有？睇你点睇，但，我只听过有人买唔到黄子华飞，食唔到一乐烧鹅脾，而冇听过你行入舖头会买唔到钻石㖞。
楼上讲过，De Beers一手炮制呢个钻石行销出嚟。最初佢哋连对手嘅产品都推广，亦冇点特登sell自己牌子。原理好简单：造大个饼。反正好多矿场都系佢嘅，分少少钱畀人赚，搞旺个行业除笨有精。但之后已经唔同了，而家就冇咁慷慨。
上个世纪大部份时间，De Beers基本都系垄断晒全球市场，仲系成个产业链，发过猪头。去到今个世纪情况就有啲唔同，加上公司在金融海啸都受重创。其实好多行业都系咁，航空公司都系。一家或几大独大不再，自然就生意难做，自然就要谂方法。
De Beers摆明系想抢其他对手嘅生意，推啲廉价产品出嚟。你觉得佢系自己玩残自己，但公司觉得系开拓新市场，年青人，同埋中产（in this context即系穷人）。其实航空公司都系一样，未有廉航之前，唔系咁多人负担得起一年去几次日本咯。
当然，为咗唔好自己玩残自己，公司都强调返合成钻石系“假嘢”、“唔独特”、“唔特别”、“可以无限制造”。但事实系合成钻石唔系苏联石，合成钻石基本上所有特质都同真钻石一样，就不过唔系“梵高真迹”咁解。
亦都为咗防止自己抢自己生意，呢堆合成钻石唔会有咩评级，咩Cutting Color Clarity 全部欠奉，你当自己街边买嘢啦。
亦都系差不多嘅原因，所以你见“百佳牌”啲包装有咁颓得咁颓，经济客位亦都系要整得辛苦啲 —确保畀得起更多钱嘅人唔会去买。有机会再讲。
郑重声明：本人并无收取任何公司物质或非物质利益
（文章标题由《香港01》编辑所拟。文章纯属作者意见，不代表《香港01》立场。）