【热评】朝韩统一实力可望超越英德法日，但真系咁易？
文：李声扬
世事嘅嘢，话变就变。几个月前好多人仲担心紧朝鲜半岛打仗甚至核战，几个月后，肥仔金金正恩同韩国总统文在寅已经手拖手在三八线玩跳飞机，讲停战，朝鲜半岛无核化。咁玩落去，佢两位分分钟有得拎诺贝尔和平奖。唔系讲笑，外国赌博网站已经贴佢两位系大热，唔系今年都可能系下年。
事情发展到咁，似乎可以再认真谂下朝韩统一之后会点。朝韩运动员唔止一次在奥运会一齐入场，甚至组联合队出战。呢啲左胶场面香港人几难想像－即使以前东西德都好似冇联合队。但毕竟国情不同，韩国人对统一嘅渴求，又唔系香港人想像到。即使到而家，主流民意都系认为可以实现朝韩统一。
朝韩统一，其实好理所当然。睇返朝鲜半岛历史，自古以来统一嘅时间占绝大多数。而且朝鲜半岛上嘅国家，N咁多年都系单一民族，冇种族矛盾，语言亦都大致一样，啲朝鲜间谍可以潜去韩国做卧底。
除咗民族大义同埋家庭团聚外，朝韩统一仲有一个最重要嘅诱因：国力。东亚局势向来系中日韩三国主导，韩国作为一个夹在中国日本中间嘅小国，咁多年都企得住，叫做可以平起平坐，本身已经系一项成就。统一咗嘅韩国，国力只会更强－亦都因为咁，我怀疑韩国以外，好多人根本唔想见到朝韩统一。
韩国外交部出过一份报告，讲话如果2030朝韩统一，就会变到有8000万人口嘅世界第7大经济体。呢啲政府报告，当然有预设立场。况且，8000万人口，而家朝韩加埋都有。至于第7大经济体系？韩国而家已经排11，上到第7唔系不能想像。
投资银行高盛出过份报告（虽则系2009年嘅事），更加有趣。讲如果朝韩统一，去到2050年，经济体系会大过日本－亦都大过晒德国法国，七大工业国（G7）中仅次于美国。听落好似好夸张？其实又未必。
韩国大约5000万人，朝鲜2500万，加埋7500万－全世界可以排到20，净系呢个内需市场都够晒大。更重要嘅系，全世界都担心人口老化，韩国亦都系。韩国而家嘅劳动人口已经萎缩紧－而朝鲜嘅人口系相对地年青。韩国中位数年纪系42岁，朝鲜系34岁。
固然朝鲜堆劳工冇乜技术可言，好多都营养不良，要拎救济。经济阵痛实在不能避免。但，人多自然就有影响力。你见东西德统一，南北越统一，开头都挨过阵痛，但因为够大，假以时日就成为区内重要嘅国家。
另一方面，韩国其实唔系天然资源特别丰厚嘅国家－相反朝鲜就好啲。留意日治时代嘅工业中心主要在韩国。据说朝鲜不少矿产嘅蕴藏量系韩国十倍八倍，包括高科技工业经常用到嘅稀土元素。朝鲜铁路网同公路仲长过韩国－当然状况得啖笑。但掉转头，有危有机，正系因为朝鲜咁落后，先大把机会做基建。韩国自己做又得，引外资亦得。之前中国印度越南，而家缅甸堀起都系咁上下回事。
军事方面，朝鲜军队人数系世界五大（同中美俄印齐列）好多人知，虽然有几打得就系个问号。但韩国军人都好多，人数都系世界十大，朝韩军队加埋都几得人惊。当然朝韩咁多军人正因为仲系交战状态，如果真系统一，大幅裁军就系必然－但同时间又可以释放大量劳动力。唔好忘记朝鲜仲有核武－固然统一后应该都唔会有得剩，但在讨价还价过程中呢堆嘢可以成为重要筹码。仲有少啲人提到嘅系，朝鲜似乎有唔少世界顶尖嘅黑客，呢班人去到韩国唔忧揾唔到食。
讲咗咁多好嘢，讲下唔好嘅。朝韩统一，先苦后甜，短期经济代价应该好大。有人会拎东西德统一嚟比，我相信太乐观，照计系比较接近南北越统一。理由：朝鲜实在好穷，穷过东德好多，仲要好多人。
留意韩国经济大幅跑赢朝鲜，系市场经济，资本主义嘅胜利，唔系民主嘅胜利。证据：朝韩分裂后，其实朝鲜经济一度系好过韩国，韩国几时赶上？系大独裁者朴正熙“汉江奇迹”嘅年代。到韩国开始民主化时，经济已经远远越过朝鲜。
问题就嚟啦，同样系冷战产物，东西德统一之时，经济水平并冇好似朝韩争咁远。首先西德人口系东德4倍，要消化东德班人相对冇咁难 - 而韩国人口只系朝鲜2倍。另外，当时西德嘅名义GDP（编按：国内生产总值）“只系”东德6倍，朝韩而家争80倍 – 可见朝鲜有几穷。计人均GDP仲明显，东德绝对冇你想像中咁穷，当时西德人均GDP系东德2倍左右（如果计及物价汇率，以Purchasing power parity﹝编按：购买力平价﹞，PPP去计，就3倍）。朝韩呢？人均GDP争40倍（计PPP都仲系超过20倍）。 简单嚟讲，朝韩统一后，朝鲜贡献嘅经济总量微不足道－但就多2500万人嚟分（韩国先5000万人口），咁人均GDP当然大幅下降。呢种情况，应该比较接近北越统一南越，当其时南北越人口亦系差不多，闻说共产北越的人均GDP远低于资本南越，可惜年代久远，揾唔到可靠数字。
睇返历史，东西德统一后，当然付出代价，经济差失业升，被誉为“欧州病夫”（Sick man of Europe），但统一后嘅德国十几年已经变身成为欧元区无可争议嘅大阿哥，而家成为世界典范。南北越情况复杂啲，因为共产主义嘅北越统一越南，但到搞改革开放后，而家一样成为区域大国。朝韩如果统一，先苦后甜应系必然－但其他国家又点谂？特别系，日本会点谂？一度主导朝鲜半岛局势嘅“六方会谈”，而家应该会演变成“四方会谈”，日本俄国被飞出局。日本系咪会坐视朝韩堀起？定会同美国“反映”一下？
另一方面，而家韩国系美国盟友，美军在韩国驻军。要中国同意朝韩统一，美国撤走驻军应系必然－否则中国会同一个美国驻军嘅美国盟友有边境接酿。 但其实朝韩统一的话，在经济上倾向中国嘅机会都几大，美国又会点谂？
所以，统一当然对朝韩好有利－但其他人未必想见到。中国咁多年支持朝鲜政权，自然唔止因为咸丰年代嘅兄弟之情。美国咁多年都打朝鲜，亦有其原因。亦都因为咁，肥仔金三代先可以不停咁在呢个局势之中左右逢源捞油水。
（文章标题由《香港01》编辑所拟。文章纯属作者意见，不代表《香港01》立场。）