中原发火告上庭　屯门缇岸懒俾面照卖　施永青都话唔敢再做｜灯神

近年楼市表现疲弱，发展商纷纷以低价促销策略散货。一啲接管咗内房楼盘的发展商就更加心急，将价钱劈完又劈，为求尽快套现。近期最瞩目嘅就一定系屯门扫管笏缇岸，发展商喺两个礼拜前将27伙单位作减价重推，最劲帐面减价6成咁多！不过呢个咁常见嘅销售策略，竟然令佢地再次惹上官非。

讲返少少前情提要，楼盘最初命名为恒大．珺珑湾，但自从内房恒大爆煲之后，就由福彩发展接管销售，并改名为屯门缇岸。项目其实一直以嚟都好多纠纷㗎啦，当中最严重就系之前中原、美联等多间代理行曾多次向法院入禀诉讼，声称发展商拖欠代理佣金，涉及嘅金额超过1亿。而且更因为呢个问题而一度宣布中止销售呢个楼盘，种种争议当时引起咗市场巨大嘅关注。

而喺佣金风波之后发展商都非常低调，呢几年无再出嚟见过人同埋做宣传，加上扫管笏呢几年多咗咁多新楼，竞争咁大，估计佢地嘅销情应该都“麻麻地”。

上周减价重推27伙货尾、最劲劈价6成

如是者过咗几年，发展商可能见近期市场有返少少起色，亦都唔想再揸住咁多蟹货。项目突然喺上两个礼拜更新9张价单，将当中27伙单位作减价重售。呢批单位嘅户型涵盖一房至两房，售价减幅由47%至60.8%不等。

当中减价得最劲嘅单位系5A座19楼F室，实用面积305平方呎，一房间隔。单位本身喺上年3月嘅定价系743.2万元，最新售价大幅减到293.3万，由700万减到“2字头”，帐面减咗449.9万，足足劈价60.5%咁多！个价劈到咁，完全睇得出今次发展商想散货嘅决心有几大啦？

中原、利嘉阁发声明指已向高等法院申请判决、停止前线代理销售

其实发展商用减价促销呢招嚟吸客，理应都唔系咩新鲜事㗎啦。只可惜呢个盘本身有“黑历史”㗎嘛，所以今次大劈价去货呢个行为即刻触动咗部分“苦主”嘅神经。

被拖佣的苦主中原地产，就喺项目宣布咗销售安排之后嘅两日，火速出咗一个声明，指由于发展商自2019年委托地产代理销售缇岸至今，仍拖欠超过1亿嘅佣金；因此中原地产已向高等法院申请简易判决追讨，亦考虑向法院申请禁制令，限制楼盘继续销售甚至查封货尾，以保障中原地产的佣金权益。

同时中原都对前线代理发出指令，停止员工对缇岸呢个盘进行销售，而且需要提醒客户如果想买呢个盘所需要承担嘅风险。除咗中原之外，利嘉阁亦喺随后发出咗类似嘅声明，似系唔想当咩都无发生过。

发展商态度如常、成功卖出26伙 部分代理行继续销售

咁又唔怪得人地中原份人“方丈”嘅，大嗱嗱拖咗成亿佣金，无理由潜咗水几年就扮无事㗎嘛。之不过睇返发展商个边嘅态度就真系惊都无惊过，照样喺原定嘅16号销售呢批减价单位，仲要成功即日卖出咗26伙，反应十分理想，话咁快就套现咗八千几万。

灯神好奇就去了解下呢26伙成交系边啲代理行做㗎啦，发现美联物业、世纪21同埋其他细行都仲有继续帮手销售。咁难怪发展商完全当份声明无到啦！反正中原唔肯卖啫，“总有人肯做”呀嘛。

未能申请禁制令 期望7月聆讯赢得判决、查封资产

见到发展商咁唔比面，灯神决定打比中原创办人施永青问下佢宜家打算点处理。施生回复指，同律师研究过后发现呢刻要申请禁制令比较困难，因为楼盘仲有好多货尾未卖，喺余下嘅单位嘅价值足够偿还佣金嘅前提下，系申请唔到禁制令嘅，因为发展商仲有偿还嘅可能性。只有楼盘剩余嘅单位嘅价值唔足够，先可以申请禁制令。

所以目前中原就向法庭申请简易判决，希望喺7月7日聆讯嘅时候赢得判决，到时“赢咗就可以封佢资产”。

中原施永青：唔敢再做 呢个盘好多麻烦

对于虽然中原同利嘉阁表明唔做缇岸生意，但市场仲有其他代理行做，施永青就指可能其他发展商想“搏一铺”，或者同发展商有其他协议，但佢自己就冇了解。

佢解释，因为呢个盘第一轮销售系中原做得最多，欠佣亦系最多，所以依家已经“唔敢做”。除咗代理佣金问题之外，仲牵涉买家回佣，导致当时涉事嘅买家已经周围向监管会、消委会、议员办公室等部门投诉。林林总总种种嘅问题导致施生都直言：“做呢个盘以来好多麻烦啰。”

宜家件事发展成咁，计我话最惨嘅都系𠮶班被拖欠回佣嘅业主，除咗变相买贵咗个单位之余，仲要面临层楼大幅贬值嘅情况，灯神唯有喺度祝佢地好运啦。