反黑2‧专访｜宋本中铭记吴孟达叮嘱　陈国坤：佢改写我哋好多嘢

2017年网剧《反黑》推出后大受欢迎成热话，全球各大串流平台累计播放次数50亿。身为剧集监制嘅陈国坤、宋本中当时已落实开拍续集，但一直只闻楼梯响。6年间，喺“招积”张健声变肥变瘦3次、剧本重写2次之后，90集嘅《反黑2》终于铁底开拍，加上后制，预计2025年播出，整个《反黑》系列足足用上10年完成 ，陈国坤同宋本中认为比起辛苦，用痛苦形容整个过程更为贴切，但一切皆是值得。

写剧本写到癫

疫情令《反黑2》开机时间一廷再廷，身为导演同监制的宋本中唯有将剧本疯狂雕琢，他说：“咁大嘅剧本无可能一两年就做到，国内平台想我快啲出，但我话唔得，最早期嘅剧本啲艺人睇完都唔系好入脑。 最后重写咗两次，今次大家睇到都觉佢世界观好大，不停问呢个角色边个做。” 陈国坤表示过去每次见宋本中时，话题离不开剧本，完全系癫嘅状态。“因为佢系主导呢件事，长期都留喺工作室，而我仲可以去拍戏开工、凑仔。”

难在⋯⋯无收入

宋本中认为一切都系上天给他的试炼，亦感恩自己可以经此一役，问到如何解决斋写剧本无收入问题，他拍拍身旁的陈国坤：“ 我有阿哥喺度，有人照住，基本上唯一有住家饭地方就系佢屋企。”陈国坤说：“总有办法嘅呢个世界，方法永远比困难多，例如系我伸出援手，佢又唔系花天酒地，同埋我哋都系投资喺自己身上 ，我同佢真系无计呢啲。” 陈国坤与宋本中相识多年，早年成立制作公司，虽然有唔少作品，但连老婆黄伊汶都曾经问过“到底你两个咁多年做过乜？”而当初《反黑》未有投资者时，亦是他与宋本中倾尽身家投资，一切如陈国坤所说“无计”，他笑指自己是精神领袖，当宋本中太埋头于剧本时，他要抽离一点才能自满整个局面，这种一前一后的默契，并三言两语能说清。

吴孟达改写《反黑》

《反黑》找来不少老戏骨加持，令每集都充满话题性，惜过去几年，黄树棠、吴孟达先后离世，陈国坤透露达哥当初戏份唔算多，但在角色设计方面却有着极大的帮助。“有啲可能我哋谂一星期都谂唔通嘅嘢，佢好快就搞掂，佢真系改写我哋好多嘢。”宋本中续说：“ 一季度时佢曾经讲过‘你会有第二、二季架嘛，记得听阿叔讲，你开二季度之前将会系你人生最难过嘅时间’，所以我一直都好担心几时开二季度，遗憾嘅系佢睇唔到，但佢永远都喺我心中⋯⋯”

仲跪紧老戏骨出山

谈及《反黑2》的惊喜位，两位都十分保守，只愿透露招积会全面升级，且在第一集出场时而令观众“哇！导演真系同佢有仇㖞”；而传闻中嘅奥斯卡金像影帝罗拔迪尼路，陈国坤好老实咁话：“制作费都唔够俾佢，我哋如果揾佢演一集，但我要翻译晒全个剧本俾对方，几百万字点翻？” 咁老戏骨呢？宋本中略有保留表示：“有几个30年无演剧，真系跪到佢哋肯出嚟，难跪在唔系你想跪就跪， 要知去边跪，绝对系几经波折。”既不能剧透，又未成功跪到老戏骨，唯一可肯定嘅系不会有《反黑3》，但绝对有电影版本。