瞩目配角｜杨证桦拍拖30次却愿为沈可欣定性：十几年前已经想沟佢
杨证桦去年台庆冇入围，坐在观众席上的却被点名表扬，主持人说：“台庆十强剧，十套有八套都有佢！”访问过后，笔者绝对理解，他肯搏、肯做，连自荐着毛毛衫扮猩猩都甘愿，专业态度难怪当年获李添胜监制在节目上高度赞誉，事隔多年，谈起这次光辉时刻杨证桦仍难掩激动，落泪说：“我系一个咩啫？普通演员咋嘛，我做返我尽责嘅嘢……”而讲到TVB带给他的收获，又岂能漏了老婆沈可欣？自言十几年前已经想追求她的杨证桦却说：“佢开头好憎我，佢一直都好憎我㗎！”
场地：Glasshouse Greenery
摄影：梁碧玲
摄录：林志龙
剪接：叶思雅
弃做高薪发型师 挥低2千人直入艺训班
杨证桦相当猛料，早在14岁已拍摄澳门电视台的《阔少爷当差》，后来于美国生活其间，因担任《美东华裔小姐》舞蹈编排，获无线高层的姨甥女力邀加入TVB。然而当时担任发型师的他却毅然拒绝，因为剪头发是一门相当揾钱的行业，“当时剪头发嘅钱，我谂系香港平均收入起码一倍半。”直至他挥低一众对手勇夺《全球华人新秀歌唱大赛》冠军后，开始认真考虑要否回流，成为罕有地可直入无线艺员训练班的新人。
他说：“当年训练班同学话有2千人报名，我哋收14个学生，2千人得14个，我系其中一个唔需要考，直入去嘅！”杨证桦本来不太敢放弃高薪去冒险，但发型屋老板的一句话可谓改变了其一生，“佢话：‘阿Man，你走啦，你而家已经剪头发系一个几出名同埋几好嘅发型师，而家唔返香港试，你老咗一定后悔！万一你返香港试过衰咗，仲可以返转头、仲有门手艺，你可以揸返把铰剪揾食。’就系呢句说话，好啦，老板我辞职喇！就选择返香港直入训练班。”
被恩师罗冠兰打击自信：演员系一张白纸
成为2千个之中脱颖而出的14个，可说是万中无一，多少都增强了杨证桦的自信心，同班同学个个总以为自己一定前途无可限量，但杨证桦却说，在训练班的日子，每日都被恩师罗冠兰击溃自信，“佢个教法系好好，将我哋每个演员嘅自尊心打破晒，佢每日都返嚟系咁捽你、闹你、话你，‘你好劲咩？你好劲就唔使嚟读训练班啦！’我就系心谂我劲先入得嚟训练班，慢慢俾佢愈摵愈多，开始觉得自己系咪真系唔得，从零开始。”
罗冠兰向他说了一句毕生受用、牢记至今的说话，成为他做演员的座右铭，那就是“我哋做演员就系一张白纸。”他续说：“佢话入得嚟训练班你就系一张白纸，系零，我就算教咗你都好，只不过系教咗一样嘢畀你，你都要慢慢去实践、累积经验，你今日得一张纸，我当你踩咗个陷阱，衰咗都好，都系多一张纸摆落去，你唔好再踩落去，慢慢愈积愈多，𠮶叠纸就会好厚，我到而家都仲储紧呢张纸。”
帮汪明荃拍MV 等足成日只出一双手
每年艺训班都有人毕业，僧多粥少，总不是人人有剧拍，杨证桦入行没多久就获副导演邀请拍汪明荃《荃心荃意》的MV，对新人来说当然开心到跳起，但实际情况却与其想像有些少出入，“等咗成日，等咗好耐，佢话埋位，我问要做啲咩呀，佢话‘得㗎喇，你坐喺钢琴度，净系弹琴得㗎喇，净系要只手㗎咋。’”
尽管MV连样都不见，自问高EQ的他仍相当开心，至少有份参与嘛，他觉得做演员一定要学识自我调整心态，不要人比人。杨证桦出道早期常饰演小混混之类，可是却自问算幸运，出道没多久，终于由演甲乙丙去到有一、两句对白出租车兵仔角色，在林家栋主演的剧集《林世荣》中演出，戏份由头带到尾，哪怕新手上路在片场常常挨骂，他都当储经验，十分谦卑。
为《义海豪情》学日文 9句对白仍做足功课
要数到终于有观众知道谁是杨证桦，当然不得不提《巾帼枭雄之义海豪情》中的宫崎少佐一角，为了演好这个日本军官，即使只得9句日文对白他都做足功课，从零开始找日文老师逐粒音恶补、苦练，甚至主动提出带老师去监场，若发音不准可即时纠正，最终一、两Take就搞掂，第二日就收到李添胜监制（添哥）电话。
原来添哥以为他本身识日文，听不出他是日文初哥，“佢话我做得好好，多谢你，你谂吓，添哥咁大个监制亲自打嚟多谢我，已经开心到不得了啦！隔咗1个月，统筹打畀我话添哥揾你，佢话你上次做得咁好，今次畀一集你做！”如是者他再跟翻译学、做足工夫，完成了这个使命，“开头拍完我都预公司会揾返日本人配音，点知出街用返我把原声，我都呆一呆！都开心嘅，证明系Censor（审核）过系OK，得先会畀你过。”往后发生的事，更成为了演艺生涯中的一个转捩点！
落泪感谢李添胜表扬 成就人生转捩点
李添胜在《义海》大结局特备节目中，点名表扬杨证桦的专业态度，指他出场短短的一幕，好戏到足以令人心寒，更谓：“我要向你哋致敬，有咁出色嘅演员同绿叶，TVB先有好作品！”当日杨证桦根本连列席的机会都冇，正在甜品店开工的他突然收到戴耀明电话，对方告知：“添哥当住7百万人赞你㖞！”他不以为然，因为他当时都有开电视，却见不到这一幕，“小明话录影㗎，我话冇可能啰，转头咪又剪走佢，而家都做《新闻报道》啦，但我又真系戆居居等《新闻报道》完，再返嚟节目，播返𠮶Part……”
说到这里，即使事隔13年，他仍相当激动，眼里忍不住泪水，续说：“我依家讲起都毛管戙，即场喊出嚟，好感动、好感恩，佢冇需要咁样做，一个好大嘅大恩人！我系一个咩啫？普通演员咋嘛，我做返我尽责嘅嘢，讲起我都想喊㖭，死喇……系呀，一切就从呢一刻开始。”说来没夸张，当晚杨证桦收到朋友讯息轰炸、迎来人生第一个报章专访，自此亦多了更多监制乐意起用这位尽心尽力的演员，难怪他访问期间仍再三重复“多谢添哥！”并表示：“未试过有一个咁大嘅监制，李添胜，添哥……点石成金㗎㖞，每个俾佢点出嚟嘅都系天王巨星㖞，佢咁样赞一赞我，系好开心，真系冇谂过，人生好似发咗一场梦咁样！”
自荐着毛毛衫扮猩猩 台庆再被表扬
自那年之后，杨证桦十几年来每年都至少有11套剧，虽然偶然都继续做食客、车手、农民、律师等无名氏角色，不过演出机会的确比前多，亦创造了好几个让观众难忘的角色。至22年，台庆十强剧有八套他都有份拍摄，《万千星辉颁奖典礼》主持周奕玮走到他身旁，称赞他不但在《超能使者》演出感人肺腑的爸爸，就连《痞子殿下》中身穿毛毛衫、不见样的猩猩角色都自荐演出，当刻不但身旁的太太沈可欣泪流满面，一众候选的男、女主角更全体拍手站立致敬。
不过，杨证桦看来就有点不知所措，他透露自己事前原来全不知情，同事叫他到场，又迟迟不告知他要做什么，他甚至犹豫是否被整蛊，直至有工作人员带他坐到观众席头几排，他开始觉得事有跷蹊。当周奕玮陆续介绍完杨卓娜、戴耀明、李成昌等配角，他尚未回神，主持已不知不觉走近他身旁，让他内心七上八下，当下最强烈的感觉只有一个：“我起身定唔起身好呀？”
铭记两个光辉时刻 做下一代尽责榜样
杨证桦忆述那一刹的心情，“佢行到埋嚟讲嘢，我喺度谂紧究竟我要做乜嘢好呢？我坐喺度又好冇礼貌，企喺度，如果佢唔系讲我，我又好𤓓㖞……直至佢企喺我旁边，讲《超能使者》嘅爸爸，我开始肯定，系咪讲紧我呢？其实我起身果下系胆粗粗嘅，但你唔起身真系好冇礼貌，咁我就起咗身，直至佢话杨证桦，哦，原来呢Part系咁样表扬我嘅工作嘅！”
他说若大家翻看片段，就会发现他神情相当尴尬，即使感动，仍未知如何反应，只得礼貌地点头，又不知应否说话，问到若有机会讲感受，他会讲什么，杨证桦反问：“比着系你你会点？我真系唔知做咩好，我又想讲多谢，但系又冇理由抢人个咪讲多谢，我又唔系攞奖，只不过系一个表扬。”当晚回家后，他兴奋得彻夜难眠，形容感觉似得奖，像那次被添哥加持一样。当记者形容这两次都是他事业的光辉时刻，杨证桦也不敢承认，“历史性时刻啦，我会觉得当我7、80岁畀返啲子孙睇，你爷爷、你爸爸以前咁样㗎，你都要做一个尽责嘅人，做一个对得住自己嘅人呀！”
非TVB亲生仔难以上位 奖项只是锦上添花
喜获观众、同事认同，当然值得高兴，但如周奕玮在台上所言，杨证桦始终未获得过任何奖项提名，问他会否恨攞奖，他不讳言：“会㗎！”不过话说回来，两次获高度表扬，对他来说已等同公司颁奖给自己，至于奖项，就有如锦上添花，反而有没有观众认同更重要。
当讲到明明公司有很多台前幕后认可自己的表现，却始终未能攀到更高位置、只能继续担任配角，杨证桦却觉得，一套剧里面每个角色都重要，没主角配角之分，“一套剧集、电影，系一个Team work，缺一不可，有时我见到啲角色觉得好正㖞，点解唔到我呢？最主要我会觉得因为我唔系TVB亲生仔，我唔系经理人合约演员，有少少分别嘅。但系虽然我唔系亲生仔，亦都好多监制好用我，我会好开心，通常一套剧个摆位系摆好晒，唔到我控制。”总之他本住一个宗旨，不论戏份多寡、爆Show与否，都做好本分，“只要有工作派到畀我，我做好我嘅本分去演每一个角色，就得啦。”
愿在TVB打一世工 曾被挖角仍不为所动
杨证桦96年加入TVB至今已经27年，近年无线爆发离巢潮，他却从未想过走，更表示可以的话想在这间公司打一世工，“做人应该要饮水思源嘅，由我啱啱入训练班系一张白纸，佢慢慢栽培我，直至而家我识咗太太，冇TVB我识唔到我太太，冇TVB我就冇我呢两个小朋友。由细到大我都好钟意TVB呢间公司，我哋细细个睇TVB嘅剧大，好细个已经好渴望入TVB，系一个梦想，几多人恨入都入唔到。”
他更表示当年王维基的香港电视开台，都曾向他挖角：“𠮶时王维基揾人跳槽，揾过我㗎，如果要走，我走咗啦！好多人话去其他机构度做，我要走，走咗啦，系咪先？咁我做乜要继续留喺度？因为我钟意呢间公司。”近年不少艺员士气低落、唔够Show等等，他难以评论行政架构，始终TVB都是一门生意，不过他确实在这里感受到满满人情味，多谢曾励珍（珍姐）、多位监制、导演、同事的疼锡，“如果你问我，我签一世约都制，只要佢唔好炒我嘅话！”
请按下图睇其中几个杨证桦在TVB演过的深刻角色：
曾拍逾30次拖 十几年前已想追沈可欣
TVB带给杨证桦的其中一个收获，如他所言，当然是老婆沈可欣，杨证桦突然自爆：“我好耐之前，十几年前已经想沟佢喇！”奈何当时时机不对，但冥冥中自有自宰，对的人终究会在适当时间走在一起，两人14年拍《再战明天》时终于“挞着”，他说：“我哋搬埋同一区，成日车出车入，佢又得意嘅，有车牌又唔识揸车，我话我车你啦，车吓车吓，做埋我老婆啦。”
不过原来沈可欣最初很讨厌杨证桦，以往他常去夜场，令女方觉得他喜爱夜蒲、花弗又不踏实，他却解释说：“去Disco一定系蒲嘅咩？可以系识人㗎嘛，成日啲人话倾生意，有啲真系出去摸住酒杯倾，唔一定系去滚㗎嘛，系咪先？睇你本身个人系点样啰。”沈可欣之所以不放心，或多或少与其情史有关，原来他曾拍过三十几次拖，难怪女方冇安全感，“好多好快就冇咗，有啲个年期都几长吓，最长都七、八年，（最短呢？）最短唔讲啦，昙花一现啰。呢啲我计埋落去，我老实呀嘛，所以先三十几次啫，我系长情𠮶啲人，但系真系Timing唔啱，咁就冇啰，上天安排咗沈可欣嚟我身边！”
婚后谢绝应酬 最爱老婆悭家对演戏有热诚
要令一只冇脚雀仔停下，沈可欣想必有其魅力之处，杨证桦就说老婆爱小朋友、爱动物，而且又悭家，“佢好悭㗎，好师奶仔，佢为咗悭一毫子可以格好耐价、行好多舖头，话呢间平一毫子，我话你行咗成个钟头喇㖞，唔好搞啦，我话畀佢赚啦，佢系呢啲人，所以我同佢一个凹一个凸。”不过撇开男女关系不谈，沈可欣本身仍是他极为欣赏的一位演员，对演艺之热诚跟他不相伯仲，“佢工作态度、对拍剧嘅认真其实同我系Sync到，一模一样，呢样嘢系最夹嘅其中一Part！”
杨证桦自小父母缘薄，一直渴望组织家庭，他又讲到两人奉子成婚的那个时刻，“我哋有咗BB，咁佢就话‘上天赐畀我哋嘅礼物，我哋要珍惜。’跟住我话：‘结婚啦！’就系咁㗎咋，冇求过婚㗎。”自那一刻开始，杨证桦就逐渐变得顾家，更谢绝应酬，“而家你叫我出去食饭我都唔会出，𠮶时未结婚嘛，我仲单身，有资格出去冲出去闯、出去识人，而家我觉得好乌烟瘴气，都唔想出去，多啲留喺屋企睇吓小朋友好过啦！”模范夫妻、好爸爸原来因而育成！