瞩目配角｜林伟感谢亡母冇闹过佢拍三级片：佢仲同邻居讲关你咩事
59岁的林伟入行已差不多40年，于剧集多饰演江湖中人，近年最为人熟悉的非《使徒行者》以一打十的打手“猜Fing”莫属。但反派只是幕前形象，私底下的林伟可是一个超级孝顺仔，母亲住养老院时他天天探望，无奈两年前因为疫情封关，于内地工作的林伟未能回港见病母最后一面，只能视像送别。他坦言：“视像睇到佢临走个时刻，好难受，而家条片都仲喺度，但系我唔敢睇，一睇我就忍唔到。妈咪最后𠮶刹那都陪唔到佢，人生有啲遗憾。”而除此之外，廿几年前在台湾发火闹狗仔队，原来也是他另一个遗憾？
场地：柏龙国际泰拳搏击中心
星探发掘做模特儿入行 曾与李嘉欣做同学
睇惯林伟拍剧、拍剧，大家未必知道他其实是模特儿入行。二十出头时、着住一身西装、返写字楼的他偶然在尖沙嘴被星探发掘，邀请入模特儿公司，他当时最关心的只是有冇钱，对方答有，于是他就上去录了一饼自我介绍的录影带，等足半年才迎来第一个Job，“佢话公司有个模特儿班，问我有冇兴趣，我话我冇钱㗎，佢话唔使，你畀住一半先，第日有工作先扣钱，都好啦千零蚊啫，𠮶阵千零蚊差唔多一个月人工，佢话可以分期咁咪学啰，都未完成Aadvanced嘅课程就有人揾我行Show。”
当时他模特儿班上的其中一位同学，居然是中学时期的李嘉欣，林伟说对方的确几靓女，但自己比较迟熟，完全冇谂过追求对方，甚至是后来见到对方选港姐，才认得“咦？那岂不是我同学？”他谓：“选完港姐好彩有个Job见返，一大班人影婚纱，佢梗系新娘，我系其中一个新郎，𠮶次差唔多最后一次见，到而家都冇见过。”
首次拍戏表现差被丧闹 曾打消做演员念头
入行不久，约87年就有人找林伟拍摄首部电影《兄弟》，伙拍李修贤（修哥）、万梓良，但他形容这个经验绝对不成功，甚至打击了他的自尊心，“我好惊返去拍嘢，日日都好似俾人闹咁，你做得唔好人哋梗系闹你，以前菲林又贵，做错咗都闹得几犀利，但系修哥好锡我，佢同导演讲，话新人嚟㗎嘛，未埋位就闹人哋，人哋俾你闹到腾腾震喇！”
林伟听说连电影公司都想易角，惟修哥力保他，不过深知自己表现不好的他，实在想过从此不再拍戏，继续做模特儿算了，“Model简简单单，做开又唔使记咁多对白、灯光，喺Model圈都叫多人识，去到电影圈𠮶个界别，完全冇人识你，俾人闹、面皮薄，唔想拍喇！”
赴台行Show赚大钱 狂蜂浪蝶男女通杀
然后，他就真的回去继续做模特儿，80年代尾绝对十分好景，适逢台湾解放，很多时装Show，影两日相，扣除20%给公司，自己都剩袋32,000台币，行天桥一场都2、3千蚊台币，他做过最多钱的一个Job，是89年跟琦琦远赴瑞典帮“瑞典香港节”影相，“$3000美金，扣翻20%畀Agency，即系我自己都有$2400美金，影六套衫咋嘛！”
除了好揾，做Model还为林伟引来许多狂蜂浪蝶，男、女、外籍人士、亚洲人都有，有男性追求者花极大手笔频频为林伟送礼，问到如何拒绝对方，他笑说：“唔钟意啰，都唔啱嘅，插头都唔啱，点处理？唔使处理㗎，但系有啲变咗朋友，大家间中食吓饭，有啲原来有太太、仔女，真系好难解释。”然而，林伟始终认为做Model不能到老，这行尤其讲求新鲜感，于是他亦苦寻出路，恰巧遇上了著名广告导演朱家宏。
伙李丽珍拍露股三级片 后生冇心理关口
朱家宏是行内大名鼎鼎的广告导演，90年突然向林伟提出一个邀请，“佢话我唔系揾你拍广告，系揾你拍三级片。”那时期香港有很多三级片，卡士也不差，林伟首次演出就跟童铃做对手，接着还有李丽珍，问到有没有什么心理关卡要冲破，他指那时年轻、又不多人认识，根本冇考虑太多，“佢同我讲部戏唔系拍咸湿，有几十组戏，要拍两个几月，唔系乱拍㗎，我第一部三级片就叫《太太的情人》，我记得反应唔错，冇乜Cast，个票房都6、700万，𠮶阵时系好犀利。我知道呢个片仲攞咗去理工学院做灯光摄影教材，啲Love Scene打灯好花时间。”
尺度方面，林伟需要露股，而女主角则要全裸，但并没有“进入”的环节。不过林伟只拍过两、三部三级片就没有再拍，他机缘巧合下去了无线拍《都市童话》，“我自己话唔拍三级片嘅，你𠮶头喺电视做个纯洁小男孩，一阵间套戏上画又露屁股，冇理由㗎嘛。”
超级孝顺仔 每日赴养老院照顾病母
进入电视圈后的生涯，读者应该都颇清楚，林伟先后效力无线、亚视，也曾北上发展，不过总是饰演花花公子、江湖中人、反派之类，近年最为熟悉的当然是“猜Fing”。但对于“定型”他并没抗拒，“电视演员有咩call唔抗拒？做好个角色得啦！”不过，屏幕上的林伟，跟他本人绝对有着两极反差，私下的他绝对是个侍母至孝的超级孝顺仔。
林爸爸在林伟中学时离世，母亲于是肩负起养家责任，要重投工作赚钱，𡥧仔林伟跟着她四围打工赚外快，那时他朝早做清洁、下午返学、晚间就抹出租车，“去联谊会、台波啲地方做清洁，擒到好高抹吊扇、抹厨房、拖地、扫地简单嘢，好长时间都系咁。”林伟大半世人都跟母亲同住，直至对方80几岁因身体退化、患癌、行动不便等要入住养老院为止。尽管如此，林伟还是尽可能每日都去探望母亲，“我差唔多日日都花个几两个钟睇佢，就算佢讲唔到咩，我都同佢倾偈、按摩、讲笑，次次都系讲𠮶啲嘢，氹佢瞓觉，佢开心咪得啰。”
疫情滞留内地 无法见母亲最后一面成最大遗憾
即使后来母亲脑退化，但林伟相信有些事母亲始终没有忘掉，“有啲嘢真系唔记得咗，但系我相信有啲嘢佢系记得嘅，因为我成日陪住佢、睇住佢，啲人一讲‘阿伟嚟啦！’佢即刻擘大眼，有啲少见啲嘅人佢未必有咁嘅反应。”无奈母亲始终年事已高，两年前还是与世详辞，这亦为林伟带来生命中一个莫大遗憾。
当时林伟因工作和疫情未通关等缘故，暂居番禹，当收到家中消息指母亲似乎快要支持不住，任林伟再焦急无奈也好，也只能隔着冰冷的屏幕、透过视像见她最后一面，“不嬲我喺佢身边最多时间陪佢，但系佢走嘅时候我唔喺佢身边，我啲阿姐阿哥全部喺佢身边。视像睇到佢临走个时刻，好难受，而家条片都仲喺度，但系我唔敢睇，一睇我就忍唔到。妈咪最后𠮶刹那都陪唔到佢，人生有啲遗憾。”
拍三级片惹邻居闲话 母亲出声力撑
林伟坦言：“突然间冇咗阿妈喺身边，真系好唔惯，睇咗佢几十年。”但亦只得安慰自己，或许是身处另一个世界的父亲，比自己更需要母亲陪伴。他后来亦觉悟到，人生大概要有遗憾才会令你记得这件事，“如果太过完美可能你一阵间已经唔记得咗，所以我到而家都仲记得我细细个跟住我阿妈，点样相处，喜怒哀乐，点样同阿妈顶颈、好多往事。”
记忆中的林母是个很强势、不容许人欺负其老公、仔女的人，会替家人出头，很保护家人。想当初林伟拍三级片，左邻右里当然多意见，但母亲采取的是“点都唔可以输个势！”的态度，“我妈咪从来一句都冇闹过我，佢同人讲：‘赚钱吖嘛！唔系点呀！唔使食？’人哋话你个仔冇用，你唔可以话‘系呀，我个仔真系冇用’，佢系主动话：‘关你咩事呀？又唔系你个仔！’”
任性错失上位机会 首拍剧已熄机失场
林伟出道不久其实已经做男主角，但笔者曾听说他本来可以上位，不过却因性格而错失机会，林伟直认自己任性爱自由，不喜欢就不会做，又透露当年王心慰监制找他拍第一套剧《天桥》，自己神推鬼㧬、不知就里便答应，到头来却没法适应进剧组后那种不分昼夜的生活，“我试过唔去开工，𠮶阵冇电话，用Call机，我唔覆机，因为挨咗几日几夜太辛苦喇，朝头早熄咗Call机瞓觉，你话我几衰？后尾我同王心慰监制讲声好对唔住佢，非常唔识谂，佢话我Book咗架水车，几千蚊，你Call机都唔开，唔嚟拍！我知鬼咩？咁细个，系咁㗎啦！”
而讲到“不擅打关系”等，大概也是林伟事业受阻的因素之一，他甚至用“倔擂槌”形容自己，试过跟高层同车几个钟，整车人聊得兴高采烈，他却全程不发一言，又提到：“我唔系好识太多赞美说话，开工就开工，收工就收工，有时同事话应该去几多楼行吓，冇㗎㖞，之前艺员科有啲同事话得闲去亮下相，我话冇嘢做上去做咩？好奇怪㗎嘛！”
内疚曾发火闹狗仔队 廿几年仍耿耿于怀
林伟提到，母亲在他年轻时，总是很担心他在外头与人打架、撩是斗非，但他明明就是个没甚脾气的人，很少无缘无故发嬲。说到此时，他忽然自爆95年在台湾发生的一件内疚事，让他耿耿于怀至今，那时他跟有“琼瑶首席玉女”之称的陈德容同公司，两人去完公司派对从五星级酒店步出，突然有个讲广东话、疑是狗仔队的人举着相机狂影，“又唔声唔声，又问我哋‘做咩呀？今日咩活动呀？’我当时好激气闹佢，你突然间冲出嚟‘嚟嚓嚓嚓嚓嚓’，吓亲我哋，又唔知佢咩人。后尾听佢讲广东话，唔知边间报馆，我冇乜点同佢采访，闹咗佢几句，都几大脾气，我冇控制到自己情绪，佢好冇瘾走咗。”
林伟没留意最终报道有否刊登，但多年后他认识多了记者朋友，慢慢理解到对方也有交料压力，就对自己当初大动肝火感到相当抱歉，他表示：“人哋都系工作，何必咁大脾气？我到而家都觉得我唔应该咁样闹呢个记者，真系唔啱，应该要同佢讲声对唔住，非常之唔好意思，当初太细个，唔识处理自己情绪。（过咗几十年你都记得，证明呢个事件好深刻？）系呀，就算我死鬼咗都系一个遗憾，我唔应该咁对人，人哋冇错，做嘢咋嘛，唔可以因为影几张相照到你只眼就发脾气，而且又冇伤害性。”
按图睇更多林伟专访相及做运动靓相：