旧电视城废虚满回忆 惊见李国麟三字尘封14年
上回讲到，有位废墟摄影者，名叫阿海。他曾3次到访过TVB旧电视城废墟的见闻及照片，上载到由他所管理的Facebook专页“5.76亿世界”跟网民分享，并引起不少回响。有趣的是，云云相片之中，发现有一张摄影室墙上写了“李国麟”三个彩色大字，就咁睇又几好笑，不过谂深一层边个咁大整蛊，写个大名上去，间接成为旧电视城check point？
（图片经Facebook专页“5.76亿的世界”同意转载）
《香港01》就这张照片访问过李国麟本人，起初他听到旧电视城有人在墙上写下他大名，都感到莫名其妙：“唔系啩？会唔会就搬厂啲人手痕涂鸦下咋？（但写你个名㖞，系咪整蛊你？）我真系唔知呀，好奇怪㖞都真系。”其后他突然想起细节，反问记者：“啲字系咪彩色㗎？有几大粒呀”记者再形容字是彩色，有一个人咁高，字形带有玩味，他如梦初醒，说：“啊！系我画㗎！我十几年前做访问，当时就有个主题，我都唔记得啦，系用喷漆画㗎！我谂系搬前做㗎个访问，我又唔系成日做访问，所以讲讲下就记得，原来仲喺度！”换句话说，摄影室的墙上是李国麟的真迹！望望下又几靓，李国麟都几有艺术天份。大抵当时快将搬离清水湾，所以画完未有用油漆髹走。
讲起旧电视城，李国麟坦言充满回忆。他经历过两次TVB搬屋，印象最深刻就有：“当时仲喺总台（广播道），就会出外景，当时都有去过清水湾片场㗎！记得有一个系片场出面，见住狄龙大哥，佢揸住吉普车，后面仲有只大狼狗，就咁望就觉得佢真系好鬼死有型，心谂如果日日都嚟呢到就好啦，可以有机会见到佢。点知过多一排，总台就搬过嚟清水湾。”唔讲唔知，除了最多人知的总台、清水湾电视城之外，很久以前TVB的录影厂遍布各地，例如葵涌厂及坚地厂，李国麟讲完笑说：“真系要老鬼先知㗎！”
除了集体回忆，清水湾电视城最多就是都市猛鬼传说，李国麟听罢，笑说：“真系去到边都有呢啲鬼故，由总台到而家将军澳，都成日传㗎！其实好多都系道听涂说啰。（你自己有冇见过？）我做咗咁多都真系冇乜点过，不过我信呢样嘢系存在嘅，如果我见到嘅话，咪打声招呼啰，都唔需要怯嘅。”而他在清水湾的日子，听到闹鬼故事，可信性比较高就有：“有时候会听到同事喺邵氏五场停车场，夜妈妈见到有嘢飘过。又或者明明时装厂，就会见到个古装嘅人行过啰（咁女厕系咪真系好猛鬼㗎？）呢个我反而就冇点听过。”不过李国麟再讲一个同事经历，相对地恐怖：“有个同事佢就系新闻部做化妆，当时佢就系化妆间等standby，佢就伏咗喺台到，佢就趴住睁开眼，点知见到有个著住绣花鞋嘅人行近。当时佢就谂好好地新闻部点会有人著绣花鞋，即刻惊到唔敢擡起头。”
其实点解好传唔传，会传电视台好猛鬼？Long哥就此分析：“好多时都系人多口杂嘅啫，有好多地方、人都会有宗教信仰，信神，或者有阴阳眼。真系见到嘅话，咪同人讲，讲下又加啲，加下加下就讲到好恐怖。”不过，就环境角度，Long哥都有一番见解：“电视城有booking嘅时候，咪有好多人气喺度啰，但一到夜晚，就会变得冷清，又阴暗，就会好容易令‘佢哋’聚居喺度，会静啲。以人性角度，都唔会想畀人骚扰啦。”不论这些传闻孰真孰假，Long哥话：“只要你冇做咩亏心事，其实唔需要惊呀！”有道理！