专访丨李枫瞓过公园长櫈家当只剩一个箧　人生格言“难得糊涂”

甘草演员李枫，早前因网上一个手绘肖像寻人Post引起大众关心。原来李枫在一年前入住老人院，有人感慨她晚景凄凉，但她却心存感恩能有三餐温饱。2020年，李枫约满离开TVB后就没有再拍剧，亦甚少接触同行朋友。当获传媒邀请做访问时，李枫爽快答应。

居于不足一百呎的板间房内，难得有客探访，李枫笑逐颜开。她盘膝坐在床上，“招牌大粒墨”不见了，只留下岁月沧桑的倦容。“每朝8点起身食早餐，做完柔软体操，跟住又安排劳作堂、睇电视，10点前关灯瞓觉，生活好有规律，唔太难挨。”

“家当”不多的李枫，只有一个细小行李箱和随身袋，木板墙上挂了约10件衣服、一对鞋、两对拖鞋便是她的全部，她笑言“拎起走得冇负担”。明知要出镜，李枫却未有刻意换件“靓衫”，不施脂粉，仅用“五指梳”扎整齐头发，好随性。她手执写有郑板桥诗句的金扇，潇洒地说：“把扇唔记得杭州定西湖买，‘难得糊涂’我好钟意，做人就系咁，有时你做人太认真、太刻意系反效果，呢个难得糊涂唔系叫你随便，而系叫你凡事睇轻啲、睇淡啲、放远眼光，个人胸襟咪宽啲，唔使去钻牛角尖。（视为人生格言？）系，咩都唔带带把扇。”

债主临门淋红油

现年69岁的李枫（原名李惠欢），在六兄弟姊妹中排行第三，一生大起大跌；年轻时嫁给从事制衣生意的老公，育有一子一女，不过可惜老公因生意失败及沉迷炒股、炒楼两度破产，导致她要卖掉嫁妆及珠宝为夫还债，甚至全家由九肚山搬到村屋居住。

1995年，李枫跟老公离婚，为避债主临门，她将一对子女交托弟弟及亲友分开照顾，自己则逃难到石岗一个百呎小房遮风挡雨：“带埋两个仔女离开都好凄凉㗎，日子唔知点样过咗。为生活为避债主乜都有啦，总之好多原因要暱埋唔可以见人。贵利佬真系淋油就淋油，你死就死，横尸街头，我唔系话佢哋衰，但真系有呢啲情况，惊㗎 ！”

生意佬炒楼炒股票大上大落，李枫用“恐怖”来形容：“𠮶时佢（前夫）好钟意炒（楼股），做生意嘅人钟意夸大，明明得3千万，佢就讲到9千万，但楼市调控啲楼全部压死晒，楼跌卖唔出，银行一定系落雨闩遮，好天开遮（苦笑）呢个差唔多系例，算啦，一笑置之。九肚山真系一个故事，入去几十万，走时过亿都得；今朝豪宅、听日路边好肚饿呀.....有冇饭食？”

最穷日子饮水当一餐

问到最穷日子是怎样？李枫摸一摸衫袋谓：“穷到冇钱开饭啰，真系冇钱开饭，一起身 ‘死嘞’，摸吓个袋，十蚊都唔够，真系饮水咋，唔系讲笑。最差时仲试过冇屋住，真系瞓街，喺公园啲櫈坐足一晚！后期有个朋友落到嚟问我咩事，我话冇屋企返，咪招呼我去佢屋企住吓、啲货仓又住一两晚，又租过一百几十呎嘅屋住吓，跟住揾嘢做。但真系…...好容易挨㗎啫，只要你肯做，冇话生存唔到嘅，揾两餐唔难。”李枫坚拒攞综缓，咬实牙根炒散拍戏、拍广告、街边卖杂货，自言：“总之揾到钱唔犯法都做！”

未知是否积劳成疾，约十年前李枫发现脑部生了一个水瘤，要做开脑的大手术。她形容是死过翻生，“（个瘤）爆咗自己都唔知，痛到呼天抢地，后来去急症室，医生即刻揾到我个仔要开刀。要喺个头边㓥开佢，好大手术，所以医生要我签生死状，有咩事，医院唔负责任，有啲人都系会救唔到。”她称政府医院每日住院费一百元，对她而言是个大数目，所以留医一个月便急急出院，继续打工赚钱为生活费。

谈到子女，李枫直认有所亏欠，自觉“我唔系好妈妈”。幸现在仔大女大，各自有自己家庭，晚年与儿子关系修好，自己亦总算有个落脚地方。她说：“我有一个男孙，一个女孙。个仔毕业后揾到份好工，生咗个仔。我个女都好早嫁人，又生咗个女，不过较疏离少见。”

经历足以写一本自传，但李枫仍然是那一副乐天安命的样子：“又唔觉有甚么大不了，人生就系咁，太过顺景，又唔系话唔好，而系我觉得有经历先系一个人生。”她透露前夫已在年前离世，对方临终前自己亦有到医院见他最后一面。

延伸阅读：李枫脑水瘤后记忆力变差仍恨演戏　贪靓脱墨：冇咗只乌蝇喺个嘴度