李枫脑水瘤后记忆力变差仍恨演戏　贪靓脱墨：冇咗只乌蝇喺个嘴度

原名李惠欢的李枫，最为人熟知的形象就是银幕上演活尖酸刻薄的恶岳母角色，“嘴角大粒墨”更成为她的标记。在老人院，最大娱乐是睇电视，李枫间中亦会在电视上看到自己的作品，“好多短剧长剧都睇到，咦，呢个恶妹有粒墨㖞，𠮶个咪自己嚟啰，哈哈哈。后期脱咗（粒墨），有次医生问我想唔想脱，唔贵又好快，卡擦，咁就冇咗只乌蝇喺个嘴度，哈哈。”李枫摸摸右边嘴角，回味一番。

相貌有点恶，但其实好感性。李枫自小便喜欢诗词歌赋，中学写一篇回顾五年中学生活的苦与乐，她都能够边写边流泪。1975年，李枫毅然放弃银行的安稳工作，投考TVB第5期艺员训练班，加入娱乐圈后拍电影、参与舞台剧，又先后在无线、亚视及香港电视拍剧。

但众所周知，演员多是“贴钱打工”，表面风光，问李枫可会后悔入行？她斩钉截铁地说：“一定唔会，因为我唔钟意太刻板，数钱都慢过人。以前银行做秘书对住啲鬼佬，钟意就Teresa（李枫英文名）‘I love you’，畀支香水你，唔钟意就巴巴巴。我入演艺圈系好自然嘅一条路，读夜校已经参演舞台剧，虽然揾朝唔得晚，但真系我嘅兴趣，可以演绎唔同人生，如果演番同自己相近角色，就更加系真情流露，我已经好满足嘞，唔收钱都得𠮶只。”

从影近半个世纪，李枫都有很多满意作品，当中包括1995年电影《海根》，戏中她饰演刘青云的妈妈。当年李枫42岁，真实年龄仅大刘青云11年，但她表示不介意：“虽然我唔系大佢好多，但我做到呀，大家睇都觉得我哋似母子。”她赞青云没有架子，而且好玩得，她续说：“佢好钟意玩我，坐喺船边就话想推我落海，哈哈，好彩我游水系攞金牌。我好钟意呢部戏，有机会大家都睇吓。”

2007年，李枫公演舞台剧《邓碧云夜游古迹》扮演粤剧名伶邓碧云，大受欢迎，连白雪仙都亲临欣赏，李枫自豪地说：“《邓碧云》可以话系代表作，多谢杜Sir（杜国威）唔知点解揾我？佢见完我之后，好快写咗个剧本畀我睇，最初演出系喺沙田一间石屋（王屋），但爆晒（坐位），记得首场狂风暴雨，之后场场爆好感恩，啲观众同我有共鸣，一齐笑、一齐喊，我都毕生难忘，多谢杜Sir，有机会见面都同我say hello啦，都好耐冇见。”

畀个Like王维基

演出超过60场，但做舞台剧收入有限，李枫称“真系够两餐食，纯粹满足表演欲”。相对来说，当年未获政府发免费电视牌照的香港电视，李枫大赞王维基是绝顶好老板，她说：“喺𠮶度人工最好，王维基好照顾员工，我系好欣赏！剩系食饭咁简单，都讲明要三𩠌一汤，佢真真正正嚟监督，唔够𩠌就即刻加，呢个我畀个like你！多谢王生关照过我两三年，唔算丰衣足食，但不愁衣食，佢系好好嘅一个人物。”

而《恶毒老人同盟》亦是她首部担正做主角的剧集，令一班老戏骨过足戏瘾。“同成班老鬼郭锋、元华、波姐（冯素波），好怀念佢哋，跟住有饭局，大鱼大肉唔使一百蚊埋单，但俱住矣。”不过，李枫最挂念的“老友记”是相识多年的好友邵音音，她说：“我哋好好朋友，佢系一个人好豪爽、大情大圣同心胸广阔嘅人。每次去佢屋企一定系大鱼大肉，打吓牌、呼吸吓（抽烟）纯粹娱乐，但我哋好似失去咗联络，如果音音姐依家见到我，就同我联络一下啦（合十双手），祝你身体健康，哈哈哈。”

李枫的床头柜上有一本ViuTV的《冰上花火》剧本，当中“贵婆婆”角色用萤光笔间住，但仍未落实。她承认生脑水瘤做过开脑手术后，记忆力大不如前，“记忆力系差咗，始终揭开个头剪咗啲神经线又再驳番。之前又曾经跌亲脚同扭伤腰，有一段时间行路跛吓跛吓，托赖仲久延残存，唔好话献世，但都希望用少少余生做番啲有用嘅嘢。”她表示仍很想演戏：“我会幻想代入每个角色，而每个角色都系真情流露，唔系呃人，系呃自己。我仲有戏瘾架，随时可以玩，但唔会太过刻意，随缘就最正。”