【迷】秘书王何绮云硬食白眼侮辱：匿埋喊好平常！

被网友称为“御用秘书”的何绮云，最近在新剧《迷》终于唔驶做秘书，饰演差婆Nat哥，做郑嘉颖上司，同下属关系好，又识走精面，但现实中的她刚好相反，不善于交际。她今日出席《迷》宣传活动接受《香港01》访问时，她说：“我性格完全唔适合呢行，唔识social，唔讲嘢，唔识讲嘢，唔系好敢同人打招呼……咁样机会当然唔多啦，系呢行我要好辛苦先食到一啖饭嘅人，但我好有火，如果唔系我唔会留喺呢到，我唔系好争取，但里面又好想，如果有机会的话，我会好努力去做，我唔会令畀机会我嘅人失望，如果唔系我弥补唔到我待人处事嘅失败。”

不擅交际唔埋堆　感激王心慰鼓励

不是性格巨星扮cool，何绮云由细到大都不懂交际，她说：“我细个喺街撞到屋企人，我会掉头走，唔系因为我唔钟意佢，而系我唔知点做。（系咪有社交障碍？）我谂系啩，但𠵱家好咗好多，我系拍完嘢就走嘅人，唔识social，拍嘢放食饭，如果唔系同事拉住一齐食，我会匿埋自己一个，大家话我系王心慰Amy御用，其实我哋只系工作上沟通，我哋唔会成日倾电话，讲亲都系公事无其他，但我好多谢佢，每次当我想放弃，Amy就畀个好玩嘅角色我，令我想继续落去，同佢关系我会觉得大家在心中。”

何绮云入行前为Starz People model，26岁入行，后来加入TVB读第17期训练班，同期有郑世豪、李霖恩等，挨了14年先有个好角色，但之前多做秘书角色，她说：“我谂我有10年冇拍过古装，做咗几多次秘书？多到我都唔记得，但我未做过秘书，文职我就做过，亦可能我以前做得多，大家先留意到我今次唔使做，一个演员当然唔想被定型啦，咁但系有人记得亦系好事。”

今次不用饰演秘书，连网友都替她高兴，但何绮云不敢上讨论区，怕自信心再受损，她说：“我𠵱家唔敢上讨论区，你话我知有人留意到我，我真系好开心，但我自信心已经跌到去底点，我直头睇返自己演出都觉得唔顺眼。我以前做model好有信心，但我嚟到呢到（TVB），我冇哂，我冇嘢back up，实则上或者关系上，记得喺《与敌同行》𠮶阵，我上过去讨论区睇，但发现俾人闹到我一文不值，当时我以为自己演艺生涯玩完喇，好彩珍姐安排咗我去拍处境剧，等我慢慢嚟过。”

入行14年有目标：我唔介意等十几年

何绮云当模特儿时，收入不俗，月入平均三万，但在电视台初时月入5千以下，最令她辛苦的不是收入，而是不稳定的际遇，她说：“我对钱银唔敏感，多有多洗，少有少洗，唔开心匿埋喺屋企喊，喊过好多次，我只系试过一次拍紧嘢时候喊，但你唔好问我系边一次，我唔想提到任何人，我相信唔止我一个艺员会系咁，我哋呢类艺员匿埋喊系好平常。俾人白眼、侮辱，由唔开心变到冇感觉，叫你做阿喂，阿边个边个埋位，听到冇反应喇，做啦，唔好谂喇，但我觉得用心做嘢会有人睇到㗎，有人可能要一年、两年先得到，可能我要等十几年啰，但如果要十几年先达到目标，我唔介意。”